കറാച്ചി : ഏഷ്യ കപ്പും പിന്നാലെ ഏകദിന ലോകകപ്പും പടിവാതില്‍ക്കലെത്തി നില്‍ക്കെ അടുത്ത ഏതാനും മാസങ്ങൾക്കുള്ളിൽ ചിരവൈരികളായ ഇന്ത്യയും പാകിസ്ഥാനും ഒന്നിലധികം മത്സരങ്ങളില്‍ ഏറ്റുമുട്ടാന്‍ ഒരുങ്ങുകയാണ്. രാഷ്‌ട്രീയ കാരണങ്ങളാല്‍ പരമ്പരകള്‍ കളിക്കാത്ത ഇരു ടീമുകളും പ്രധാന ടൂര്‍ണമെന്‍റുകളില്‍ മാത്രമാണ് നിലവില്‍ പരസ്‌പരം പോരടിക്കുന്നത്. ഇതോടെ ഇന്ത്യ-പാക് മത്സരങ്ങളുടെ ആവേശം കളിക്കളത്തിന് അകത്തും പുറത്തും പതിന്മടങ്ങ് വര്‍ധിക്കും.
2022-ലെ ടി20 ലോകകപ്പിലായിരുന്നു ഇരു ടീമുകളും അവസാനമായി മത്സരിച്ചിരുന്നത്. അന്ന് വിരാട് കോലിയുടെ ഒറ്റയാള്‍ പോരാട്ടത്തിന്‍റെ മികവില്‍ ഇന്ത്യ മത്സരം പിടിച്ചിരുന്നു. മെല്‍ബണ്‍ ക്രിക്കറ്റ് ഗ്രൗണ്ടില്‍ പാകിസ്ഥാന്‍ ഉയര്‍ത്തിയ 159 റണ്‍സിന്‍റെ വിജയ ലക്ഷ്യം പിന്തുടരാന്‍ ഇറങ്ങിയ ഇന്ത്യ ഒരു ഘട്ടത്തില്‍ തോല്‍വി മുന്നില്‍ കണ്ടിരുന്നു. എന്നാല്‍ 52 പന്തിൽ 83 റൺസെടുത്ത വിരാട് കോലിയുടെ ഐതിഹാസിക പ്രകടനം പാകിസ്ഥാനെ കരയിപ്പിച്ചു. ഇപ്പോഴിതാ കോലിയുടെ ഈ പ്രകടനം ഓര്‍ത്തെടുത്തിരിക്കുകയാണ് പാകിസ്ഥാന്‍ ഇതിഹാസ താരം ഷൊയ്‌ബ് അക്തര്.
മെല്‍ബണ്‍ ക്രിക്കറ്റ് ഗ്രൗണ്ടിലെ അന്നത്തെ വേദി കോലിക്കായി ദൈവം ഒരുക്കിയതായിരുന്നു എന്നാണ് റാവല്‍പിണ്ടി എക്സ്പ്രസ് അഭിപ്രായപ്പെട്ടിരിക്കുന്നത്. "മെല്‍ബണിലെ ആ ഇന്ത്യ-പാകിസ്ഥാന്‍ മത്സരം പൂര്‍ണമായും വിരാട് കോലിയെ സംബന്ധിച്ചതായിരുന്നു. ക്രിക്കറ്റ് ദൈവങ്ങൾ അവനുവേണ്ടി അത് ചെയ്യാൻ ആഗ്രഹിച്ചു. അവന് തന്‍റെ മികച്ച ഫോമില്‍ ആയിരുന്നില്ല. ഇന്ത്യയില്‍ നിന്നുള്‍പ്പടെ കടുത്ത വിമര്‍ശനങ്ങളായിരുന്നു അവന് നേരെ ഉയര്‍ന്നിരുന്നത്.
മുഴുവന്‍ മാധ്യമങ്ങളും അവന് പിന്നാലെയായിരുന്നു. എന്നാല്‍ 'ഇതുനിന്‍റെ വേദിയാണെന്നും, വീണ്ടും രാജാവായി ഉയരാനും' ദൈവം കോലിയോട് പറഞ്ഞ രീതിയായിരുന്നു അതെന്നാണ് എനിക്ക് തോന്നുന്നത്. സ്റ്റേഡിയത്തിലെ ഒരു ലക്ഷത്തോളം ആളുകള്‍ക്ക് പുറമെ ലോകത്തിന്‍റെ വിവിധ ഭാഗങ്ങളിലായി കോടിക്കണക്കിന് ആളുകള്‍ കണ്ടൊരു മത്സരമായിരുന്നു അത്.
കോലിക്കായി ദൈവം തീര്‍ത്ത ആ വേദികണ്ട് ലോകം മുഴുവന്‍ അമ്പരന്നിരുന്നു എന്ന് വേണം പറയാന്‍. അത്രയും മഹത്തരമായ ഒരു വേദിയായിരുന്നു അത്. ഹാരിസ് റൗഫിന്‍റെ അവസാന ഓവറില്‍ രണ്ട് സിക്‌സറുകൾ കൂടി ചേർത്തപ്പോൾ, ആ മത്സരം അവന് തന്‍റെ സാമ്രാജ്യം തിരികെ നൽകി. മെല്‍ബണ്‍ ക്രിക്കറ്റ് ഗ്രൗണ്ടിലെ അന്നത്തെ വേദി കോലിക്ക് വേണ്ടി ദൈവം ഒരുക്കിയതാണെന്ന് തന്നെയാണ് ഞാൻ കരുതുന്നത്' - ഷൊയ്‌ബ് അക്തര് പറഞ്ഞു.
അതേസമയം ഈ വര്‍ഷത്തെ ഏകദിന ലോകകപ്പിന് ശേഷം 35-കാരനായ വിരാട് കോലി കൂടുതല്‍ ഏകദിന മത്സരങ്ങള്‍ കളിക്കുമെന്ന് തോന്നുന്നില്ലെന്നും റാവല്‍പിണ്ടി എക്സ്പ്രസ് അഭിപ്രായപ്പെട്ടു. ടി20 ഫോര്‍മാറ്റിലും സമാനമായ സാഹചര്യമാണുള്ളതെന്ന് കരുതുന്നു. എന്നാല്‍ കുറഞ്ഞത് ഇനിയും ആറ് വർഷമെങ്കിലും കോലി കളിക്കണമെന്നും സച്ചിൻ ടെണ്ടുൽക്കറുടെ 100 സെഞ്ച്വറി എന്ന റെക്കോഡ് തകര്‍ക്കണമെന്നുമാണ് താന്‍ ആഗ്രഹിക്കുന്നത്. ഇതിനായി ഈ ലോകകപ്പിന് ശേഷം താരം ടെസ്റ്റ് ക്രിക്കറ്റിൽ കൂടുതല്‍ ശ്രദ്ധ കേന്ദ്രീകരിക്കണമെന്നും അക്തര് പറഞ്ഞു.
ALSO READ: Virat Kohli| കോലിയുടെ റണ്‍സ് ദാഹം; വിക്കറ്റുകള്‍ക്കിടയില്‍ ഓടിയത് 510 കിലോ മീറ്റര്‍
