ധര്‍മ്മശാല : ഏകദിന ലോകകപ്പില്‍ (Cricket World Cup 2023) ബംഗ്ലാദേശിനെതിരായ മത്സരത്തില്‍ ഇംഗ്ലണ്ടിന് മികച്ച സ്‌കോര്‍ (England vs Bangladesh Score updates). ആദ്യം ബാറ്റ് ചെയ്‌ത ഇംഗ്ലണ്ട് നിശ്ചിത 50 ഓവറില്‍ ഒമ്പത് വിക്കറ്റ് നഷ്‌ടത്തില്‍ 364 റണ്‍സടിച്ചു. ഡേവിഡ് മലാന്‍റെ തകര്‍പ്പന്‍ സെഞ്ചുറിയാണ് ഇംഗ്ലീഷ് ഇന്നിങ്‌സിന്‍റെ നട്ടെല്ല്.
107 പന്തുകളില്‍ 140 റണ്‍സാണ് താരം അടിച്ചെടുത്തത്. അര്‍ധ സെഞ്ചുറിയുമായി ജോണി ബെയര്‍സ്റ്റോ (59 പന്തില്‍ 52), ജോ റൂട്ട് (68 പന്തില്‍ 82) എന്നിവരും മിന്നി. ബംഗ്ലാദേശിനായി മെഹ്‌ദി ഹസന്‍ നാല് വിക്കറ്റുകള്‍ വീഴ്‌ത്തിയപ്പോള്‍ ഷോരിഫുൾ ഇസ്ലാം മൂന്ന് വിക്കറ്റുകള്‍ സ്വന്തമാക്കി.
മിന്നും തുടക്കമായിരുന്നു ഇംഗ്ലണ്ടിന് ഓപ്പണര്‍മാരായ ജോണി ബെയർസ്റ്റോയും ഡേവിഡ് മലാനും ചേര്‍ന്ന് നല്‍കിയത്. 17.5 ഓവര്‍ നീണ്ട ഒന്നാം വിക്കറ്റില്‍ 115 റണ്‍സാണ് ഇരുവരും ചേര്‍ന്ന് ഇംഗ്ലണ്ടിന്‍റെ സ്‌കോര്‍ബോര്‍ഡില്‍ ചേര്‍ത്തത്. ബെയർസ്റ്റോ പിന്തുണയേകി കളിച്ചപ്പോള്‍ മലാനായിരുന്നു ആക്രമണകാരി. 39 പന്തുകളില്‍ നിന്നും ഡേവിഡ് മലാന്‍ അര്‍ധ സെഞ്ചുറി പൂര്‍ത്തിയാക്കി.
പിന്നാലെ അര്‍ധ സെഞ്ചുറിയിലേക്ക് എത്തിയ ബെയർസ്റ്റോയെ വീഴ്‌ത്തി ഷാക്കിബ് അൽ ഹസനാണ് ബംഗ്ലാദേശിന് ആശ്വാസം നല്‍കിയത്. തുടര്‍ന്നെത്തിയ ജോ റൂട്ടിനൊപ്പം 151 റണ്‍സ് മലാന്‍ കൂട്ടിച്ചേര്‍ത്തു. 32-ാം ഓവറില്‍ 92 പന്തുകളില്‍ നിന്നും സെഞ്ചുറി തികച്ചതിന് ശേഷം ഡേവിഡ് മലാന്‍ ആക്രമണം കടുപ്പിച്ചു. വൈകാതെ 44 പന്തുകളില്‍ നിന്നും ജോ റൂട്ടും അര്‍ധ സെഞ്ചുറി പിന്നിട്ടു.
38-ാം ഓവറിലാണ് ബംഗ്ലാദേശിന് ഈ കൂട്ടുകെട്ട് പിരിക്കാന്‍ കഴിയുന്നത്. മലാനെ മെഹ്‌ദി ഹസന്‍ ബൗള്‍ഡാക്കുകയായിരുന്നു. 16 ബൗണ്ടറികളും ആറ് സിക്‌സുകളും അടങ്ങുന്നതാണ് താരത്തിന്‍റെ ഇന്നിങ്‌സ്. ജോസ് ബട്‌ലര്‍ക്ക് (15 പന്തില്‍) പിടിച്ചുനില്‍ക്കാനായില്ല. പിന്നാലെ റൂട്ടും മടങ്ങിയതോടെ ഇംഗ്ലണ്ടിന്‍റെ കുതിപ്പ് അവസാനിച്ചു.
ലിയാം ലിവിങ്‌സ്റ്റണ്‍ (1 പന്തില്‍ 0), ഹാരി ബ്രൂക്ക് (15 പന്തില്‍ 20), സാം കറന്‍ (15 പന്തില്‍ 11), ആദില്‍ റഷീദ് (7 പന്തില്‍ 11), ക്രിസ് വോക്‌സ് (11 പന്തില്‍ 14) എന്നിവര്‍ നിരാശപ്പെടുത്തി. മാർക്ക് വുഡ് (5 പന്തില്‍ 6), റീസ് ടോപ്ലി (2 പന്തില്‍ 1) എന്നിവര്‍ പുറത്താവാതെ നിന്നു.
ഇംഗ്ലണ്ട് പ്ലെയിങ് ഇലവന്‍ (England Playing XI): ജോണി ബെയർസ്റ്റോ, ഡേവിഡ് മലാൻ, ജോ റൂട്ട്, ഹാരി ബ്രൂക്ക്, ജോസ് ബട്‌ലർ (ക്യാപ്റ്റന്), ലിയാം ലിവിങ്സ്റ്റൺ, സാം കറൻ, ക്രിസ് വോക്‌സ്, ആദിൽ റഷീദ്, മാർക്ക് വുഡ്, റീസ് ടോപ്ലി.
ബംഗ്ലാദേശ് പ്ലെയിങ് ഇലവന്‍ (Bangladesh Playing XI) : തൻസിദ് ഹസൻ, ലിറ്റൺ ദാസ്, നജ്‌മുൽ ഹൊസൈൻ ഷാന്‍റോ, മെഹിദി ഹസൻ, ഷാക്കിബ് അൽ ഹസൻ (ക്യാപ്റ്റന്), മുഷ്‌ഫിഖുർ റഹീം (വിക്കറ്റ് കീപ്പര്‍), തൗഹിദ് ഹൃദോയ്, മഹെദി ഹസന്‍, തസ്‌കിൻ അഹമ്മദ്, ഷോരിഫുൾ ഇസ്ലാം, മുസ്‌തഫിസുർ റഹ്‌മാൻ.
