പൂനെ: ഏകദിന ക്രിക്കറ്റില്‍ വണ്‍ ഡൗണായി ഇറങ്ങി പതിനായിരം റണ്‍സ് തികക്കുന്ന ബാറ്റ്‌സ്‌മാന്‍മാരുടെ ക്ലബില്‍ ഇനി ഇന്ത്യന്‍ നായകന്‍ വിരാട് കോലിയും. 190 ഇന്നിങ്സുകളില് നിന്നാണ് കോലി ഈ നേട്ടം കൊയ്‌തത്. മുന്‍ ഓസ്‌ട്രേലിയന്‍ നായകന്‍ റിക്കി പോണ്ടിങ്ങാണ് ഇതിന് മുമ്പ് മൂന്നാമനായി ഇറങ്ങി പതിനായിരത്തിലധികം റണ്‍സ് സ്വന്തമാക്കിയത്. 330 ഇന്നിങ്സുകളില് നിന്നായി 12,662 റണ്‍സാണ് പോണ്ടിങ്ങിന്റെ പേരിലുള്ളത്. പട്ടികയില്‍ മൂന്നാം സ്ഥാനത്തുള്ള മുന്‍ ശ്രീലങ്കന്‍ ബാറ്റ്‌സ്‌മാന്‍ കുമാര്‍ സംഗക്കാരയുടെ പേരില്‍ 238 ഇന്നിങ്സുകളില് നിന്നായി 9747 റണ്‍സാണുള്ളത്. ഏകദിനത്തില്‍ മൂന്നാമനായി ഇറങ്ങി വേഗത്തില്‍ പതിനായിരം കടക്കുന്ന ബാറ്റ്‌സ്‌മാനെന്ന റെക്കോഡും പൂനെയില്‍ കോലി സ്വന്തം പേരില്‍ കുറിച്ചു.
മുന്‍ ദക്ഷിണാഫ്രിക്കന്‍ നായകന്‍ ഗ്രെയിം സ്‌മിത്തിനെ മറികടന്ന് മറ്റൊരു നേട്ടം കൂടി കോലി സ്വന്തമാക്കി. ഏകദിനത്തില്‍ നായകനെന്ന നിലയില്‍ കൂടുതല്‍ റണ്‍സെടുത്തവരുടെ പട്ടികയില്‍ സ്‌മിത്തിനെ മറികടന്ന് കോലി അഞ്ചാമതായി. പൂനെയില്‍ ഇംഗ്ലണ്ടിനെതിരെ 41 റണ്‍സെടുത്തതോടെയാണ് സ്‌മിത്തിനെ മറികടക്കാനായത്. 150 ഏകദിനങ്ങളില്‍ നിന്നും സ്‌മിത്ത് സ്വന്തമാക്കിയ 5,416 റണ്‍സെന്ന നേട്ടമാണ് കോലി തന്‍റെ 94ാമത്തെ ഏകദിനത്തില്‍ മറികടന്നത്. \
കൂടുതല്‍ വായനക്ക്: രാഹുലും പന്തും തകര്‍ത്തു; ഇംഗ്ലണ്ടിന് ജയിക്കാന്‍ 337 റണ്‍സ്
പട്ടകയില്‍ ഒന്നാം സ്ഥാനത്ത് മുന്‍ ഓസ്‌ട്രേലിയന്‍ നായകന്‍ റിക്കി പോണ്ടിങ്ങാണ്. നായകനെന്ന നിലയില്‍ 234 ഏകദിനങ്ങളില്‍ നിന്നും നിന്ന് 8497 റണ്‍സാണ് പോണ്ടിങ്ങിന്റെ അക്കൗണ്ടിലുള്ളത്. പട്ടികില്‍ രണ്ടാമതുള്ള മുന്‍ ഇന്ത്യന്‍ ക്യാപ്റ്റന്‍ എംഎസ്‌ ധോണിക്ക് 200 ഏകദിനങ്ങളില്‍ നിന്ന് 6641 റണ്‍സാണുള്ളത്. മുന്‍ ന്യൂസീലന്‍ഡ് നായകന്‍ സ്റ്റീഫന്‍ ഫ്‌ളെമിങ്ങ് മൂന്നാമതും മുന്‍ ശ്രീലങ്കന്‍ നായകന്‍ അര്‍ജുന രണതുങ്കെ നാലാമതുമാണ്.
പൂനെയിലെ രണ്ടാം ഏകദിനത്തില്‍ അവസാനം വിവരം ലഭിക്കുമ്പോള്‍ ഇന്ത്യ ഉയര്‍ത്തിയ 337 റണ്‍സെന്ന സ്‌കോര്‍ പിന്തുടര്‍ന്ന ഇംഗ്ലണ്ട് ഒരു വിക്കറ്റ് നഷ്‌ടത്തില്‍ 130 റണ്‍സെടുത്തു. അര്‍ദ്ധസെഞ്ച്വറിയോടെ 56 റണ്‍സെടുത്ത ഓപ്പണര്‍ ജോണി ബെയര്‍സ്റ്റോയും 16 റണ്‍സെടുത്ത ഓള്‍ റൗണ്ടര്‍ ബെന്‍ സ്റ്റോക്‌സുമാണ് ക്രീസില്‍. അര്‍ദ്ധസെഞ്ച്വറിയോടെ 55 റണ്‍സെടുത്ത ഓപ്പണര്‍ ജേസണ്‍ റോയിയുടെ വിക്കറ്റാണ് ഇംഗ്ലണ്ടിന് നഷ്‌ടമായത്.
