ധര്‍മ്മശാല : ഏകദിന ക്രിക്കറ്റ് ലോകകപ്പില്‍ (Cricket World Cup 2023) തുടര്‍ച്ചയായ മൂന്നാം ജയം തേടി ദക്ഷിണാഫ്രിക്ക (South Africa) ഇന്ന് (ഒക്‌ടോബര്‍ 17) ഇറങ്ങും. ലോകകപ്പിലെ കന്നി ജയത്തിനായി കാത്തിരിപ്പ് തുടരുന്ന നെതര്‍ലന്‍ഡ്‌സാണ് പ്രോട്ടീസിന്‍റെ എതിരാളികള്‍. ധര്‍മ്മശാലയില്‍ ഉച്ചയ്‌ക്ക് രണ്ട് മണിക്കാണ് മത്സരം ആരംഭിക്കുന്നത് (South Africa vs Netherlands Match Preview).
മൂന്നാം ജയത്തോടൊപ്പം പോയിന്‍റ് പട്ടികയിലെ ഒന്നാം സ്ഥാനവുമാണ് ദക്ഷിണാഫ്രിക്കയുടെ ലക്ഷ്യം. ശ്രീലങ്ക, ഓസ്ട്രേലിയ എന്നീ ടീമുകളെ തകര്‍ത്ത് തരിപ്പണമാക്കിക്കൊണ്ടാണ് പ്രോട്ടീസിന്‍റെ വരവ്. ഡച്ചുപടയെ നേരിടാന്‍ ഇറങ്ങുമ്പോള്‍ പ്രോട്ടീസിന് പ്രത്യേകിച്ച് തലവേദനകളൊന്നുമില്ല.
ബാറ്റര്‍മാരും ബൗളര്‍മാരും ഇന്ത്യന്‍ സാഹചര്യങ്ങള്‍ക്ക് അനുസരിച്ച് മികവ് കാട്ടുന്നത് അവര്‍ക്ക് ആശ്വാസമാണ്. മികച്ച ഫോമിലുള്ള വിക്കറ്റ് കീപ്പര്‍ ബാറ്റര്‍ ക്വിന്‍റണ്‍ ഡി കോക്കും എയ്‌ഡന്‍ മാര്‍ക്രവുമാണ് പ്രോട്ടീസ് ബാറ്റിങ് നിരയിലെ വജ്രായുധങ്ങള്‍. ഇവര്‍ക്കൊപ്പം ഡേവിഡ് മില്ലര്‍, ഹെൻറിച്ച് ക്ലാസന്‍ എന്നിവരുടെ മികവും ചേരുമ്പോള്‍ ദക്ഷിണാഫ്രിക്കന്‍ നിരയെ പിടിച്ചുകെട്ടാന്‍ നെതര്‍ലന്‍ഡ്‌സിന് വിയര്‍ക്കേണ്ടി വരും. ബൗളിങ് നിരയിലും കാര്യമായ വെല്ലുവിളികളൊന്നും ദക്ഷിണാഫ്രിക്കയ്‌ക്കില്ല. പേസര്‍മാരും സ്പിന്നര്‍മാരും ഒരുപോലെ തന്നെ മികവ് തുടരുന്നുണ്ട്.
പാകിസ്ഥാന്‍, ന്യൂസിലന്‍ഡ് ടീമുകളോട് തോല്‍വി വഴങ്ങിയ നെതര്‍ലന്‍ഡ്‌സിന്‍റെ ലക്ഷ്യം ടൂര്‍ണമെന്‍റിലെ ആദ്യ ജയമാണ്. പാകിസ്ഥാനോട് ആദ്യ കളിയില്‍ 81 റണ്‍സിനും ന്യൂസിലന്‍ഡിനോട് 99 റണ്‍സിനുമായിരുന്നു ഡച്ച് പടയുടെ തോല്‍വി. നിലവില്‍ പോയിന്‍റ് പട്ടികയില്‍ പത്താം സ്ഥാനത്താണ് നെതര്‍ലന്‍ഡ്‌സിന്‍റെ സ്ഥാനം.
ബാസ് ഡി ലീഡ്, വിക്രംജീത് സിങ്, കോളിന്‍ അക്കര്‍മാന്‍ ഉള്‍പ്പടെയുള്ള താരങ്ങള്‍ റണ്‍സ് കണ്ടെത്തുന്നുണ്ടെങ്കിലും സ്ഥിരത പുലര്‍ത്താന്‍ ബുദ്ധിമുട്ടുന്നതാണ് ടീമിന് തിരിച്ചടി. വലിയ മത്സരങ്ങളിലെ പരിചയക്കുറവും ടീമിന്‍റെ പ്രകടനങ്ങളെ ബാധിച്ചിട്ടുണ്ട്.
ഇരു ടീമുകളും ഇതിന് മുന്‍പ് ഏഴ് മത്സരങ്ങളിലാണ് ഏറ്റുമുട്ടിയിട്ടുള്ളത്. അതില്‍ 6 ജയവും സ്വന്തമാക്കിയത് ദക്ഷിണാഫ്രിക്കയായിരുന്നു. ഒരു മത്സരം ഫലമില്ലാതെ ഉപേക്ഷിച്ചു.
ദക്ഷിണാഫ്രിക്ക ഏകദിന ക്രിക്കറ്റ് ലോകകപ്പ് 2023 സ്ക്വാഡ് (Cricket World Cup 2023 South Africa Squad): ക്വിന്‍റണ്‍ ഡി കോക്ക് (വിക്കറ്റ് കീപ്പര്‍), ടെംബ ബാവുമ (ക്യാപ്‌റ്റന്‍), റാസി വാന്‍ഡര്‍ ഡസന്‍, എയ്‌ഡന്‍ മാര്‍ക്രം, റീസ ഹെൻഡ്രിക്‌സ്, ഡേവിഡ് മില്ലർ, ഹെൻറിച്ച് ക്ലാസൻ, മാർക്കോ യാൻസെൻ, ജെറാൾഡ് കോയറ്റ്സീ, ആൻഡിലെ ഫെഹ്‌ലുക്‌വായോ, ലുങ്കി എൻഗിഡി, കാഗിസോ റബാഡ, കേശവ് മഹാരാജ്, തബ്രയിസ് ഷംസി, ലിസാദ് വില്യംസ്.
നെതര്‍ലന്‍ഡ്‌സ് ഏകദിന ലോകകപ്പ് 2023 സ്ക്വാഡ് (Cricket World Cup 2023 Netherlands Squad): വിക്രം സിങ്, മാക്‌സ് ഒഡൗഡ്, സ്‌കോട്ട് എഡ്വേർഡ്‌സ് (ക്യാപ്‌റ്റന്‍), തേജ നിദാമനുരു, ബാസ് ഡി ലീഡ്, കോളിൻ അക്കർമാൻ, ലോഗൻ വാൻ ബീക്ക്, പോൾ വാൻ മീകെരെൻ, റോലോഫ് വാൻ ഡെർ മെർവെ, സാഖിബ് സുൽഫിഖര്‍, ആര്യൻ ദത്ത്, ഷാരിസ് അഹമ്മദ്, റയാൻ ക്ലെയ്‌ൻ, സിബ്രാൻഡ് ഏംഗൽബ്രെച്ച്‌, വെസ്‌ലി ബറേസി.
