ബെംഗളൂരു : ഏകദിന ക്രിക്കറ്റ് ലോകകപ്പില്‍ (Cricket World Cup 2023) ഇന്ന് (ഒക്ടോബര്‍ 20) ഓസ്ട്രേലിയ പാകിസ്ഥാന്‍ (Australia vs Pakistan) ടീമുകള്‍ നേര്‍ക്കുനേര്‍ പോരിനിറങ്ങുന്നു. ഉച്ചയ്‌ക്ക് രണ്ട് മണിക്ക് ബെംഗളൂരു ചിന്നസ്വാമി സ്റ്റേഡിയത്തിലാണ് മത്സരം. ഇന്ത്യയോടേറ്റ വമ്പന്‍ തോല്‍വിയില്‍ നിന്നും കരകയറാനായി പാകിസ്ഥാനെത്തുമ്പോള്‍ വിജയവഴിയില്‍ കുതിപ്പ് തുടരാനാകും കങ്കാരുപ്പടയുടെ ശ്രമം.
മുന്‍ ചാമ്പ്യന്മാരായ ഓസ്ട്രേലിയക്ക് ഏറെ നിര്‍ണായകമാണ് ഇന്ന്. ഇനിയുള്ള തോല്‍വികള്‍ അവരുടെ സെമി സാധ്യതകള്‍ക്ക് മങ്ങലേല്‍പ്പിച്ചേക്കാം. ഇന്ത്യ ദക്ഷിണാഫ്രിക്ക ടീമുകളോട് തോറ്റുകൊണ്ടായിരുന്നു കങ്കാരുപ്പട ഇക്കുറി ലോകകപ്പ് യാത്ര തുടങ്ങിയത്.
തുടര്‍ തോല്‍വികള്‍ക്ക് പിന്നാലെ മൂന്നാം മത്സരത്തില്‍ ശ്രീലങ്കയെ തോല്‍പ്പിച്ച് ആത്മവിശ്വാസം വീണ്ടെടുക്കാന്‍ പാറ്റ് കമ്മിന്‍സിനും സംഘത്തിനും സാധിച്ചിട്ടുണ്ട്. പേരുകേട്ട വമ്പന്‍ താരങ്ങള്‍ ഉണ്ടെങ്കിലും അവരെല്ലാം ഫോം ഔട്ടായതാണ് കങ്കാരുപ്പടയ്‌ക്ക് തിരിച്ചടിയായിരിക്കുന്നത്. കൂടാതെ, ഫീല്‍ഡിങ്ങിലെ പിഴവുകളും ഓസ്ട്രേലിയക്ക് പരിഹരിക്കേണ്ടതുണ്ട്. ലോകകപ്പ് സന്നാഹ മത്സരത്തില്‍ പാകിസ്ഥാനെ തോല്‍പ്പിക്കാന്‍ സാധിച്ചുവെന്നത് കങ്കാരുപ്പടയ്‌ക്ക് ആത്മവിശ്വാസം നല്‍കുന്ന കാര്യമാണ്.
മറുവശത്ത് വിജയവഴിയിലേക്ക് തിരിച്ചെത്താനുള്ള ശ്രമത്തിലാണ് ബാബര്‍ അസമും സംഘവും. ബാറ്റിങ്ങിലും ബൗളിങ്ങിലും ടീമിനുള്ള ശക്തിദൗര്‍ബല്യങ്ങള്‍ മനസിലാക്കി നല്‍കിയതായിരുന്നു അഹമ്മദാബാദില്‍ ഇന്ത്യയ്‌ക്കെതിരായ ടീമിന്‍റെ തോല്‍വി. ആ മത്സരത്തില്‍ നായകന്‍ ബാബര്‍ അസം താളം കണ്ടെത്തിയത് പാക് പടയ്‌ക്ക് ആശ്വാസം.
സ്റ്റാര്‍ പേസര്‍ ഷഹീന്‍ അഫ്രീദി ഫോമിലേക്ക് ഉയരാത്തത് പാകിസ്ഥാന്‍ ക്രിക്കറ്റ് ടീമിന് തലവേദനയാണ്. അതേസമയം, ഇന്ന് ഓസ്ട്രേലിയക്ക് എതിരെ കളിക്കാനിറങ്ങുമ്പോള്‍ പാകിസ്ഥാന്‍ പ്ലെയിങ് ഇലവനില്‍ മാറ്റം ഉണ്ടാകാനാണ് സാധ്യത.
ലോകകപ്പ് ചരിത്രത്തില്‍ പാകിസ്ഥാനും ഓസ്‌ട്രേലിയയും പത്ത് മത്സരങ്ങളിലാണ് ഏറ്റുമുട്ടിയിട്ടുള്ളത്. അതില്‍ ആറ് മത്സരങ്ങളില്‍ പാക് പടയെ തകര്‍ക്കാന്‍ ഓസീസിനായിട്ടുണ്ട്. ലോകകപ്പില്‍ ഓസ്‌ട്രേലിയക്കെതിരെ നാല് മത്സരങ്ങളിലാണ് പാകിസ്ഥാന്‍ ജയം പിടിച്ചിട്ടുള്ളത്.
ഏകദിന ക്രിക്കറ്റ് ലോകകപ്പ് 2023 ഓസ്ട്രേലിയ സ്ക്വാഡ് (Cricket World Cup 2023 Australia Squad): ട്രാവിസ് ഹെഡ്, ഡേവിഡ് വാര്‍ണര്‍, മിച്ചല്‍ മാര്‍ഷ്, മാര്‍നസ് ലബുഷെയ്‌ന്‍, സ്റ്റീവ് സ്‌മിത്ത്, മാര്‍ക്കസ് സ്റ്റോയിനിസ്, ഗ്ലെന്‍ മാക്‌സ്‌വെല്‍, കാമറൂണ്‍ ഗ്രീന്‍, അലക്‌സ് കാരി, ജോഷ് ഇംഗ്ലിസ്, പാറ്റ് കമ്മിന്‍സ് (ക്യാപ്‌റ്റന്‍), ജോഷ് ഹെയ്‌സല്‍വുഡ്, മിച്ചല്‍ സ്റ്റാര്‍ക്, ആദം സാംപ, സീന്‍ ആബോട്ട്.
പാകിസ്ഥാന്‍ ഏകദിന ക്രിക്കറ്റ് ലോകകപ്പ് 2023 സ്ക്വാഡ് (Cricket World Cup 2023 Pakistan Squad): അബ്‌ദുല്ല ഷഫീഖ്, ഇമാം ഉല്‍ ഹഖ്, ബാബർ അസം (ക്യാപ്‌റ്റന്‍), മുഹമ്മദ് റിസ്‌വാൻ (വിക്കറ്റ് കീപ്പര്‍), ഫഖർ സമാൻ, സൗദ് ഷക്കീൽ, സൽമാൻ അലി ആഘ, ഷദാബ് ഖാൻ, ഇഫ്‌തിഖർ അഹമ്മദ്, മുഹമ്മദ് നവാസ്, ഷഹീൻ അഫ്രീദി, ഹാരിസ് റൗഫ്, ഹസൻ അലി, ഉസാമ മിർ, മുഹമ്മദ് വസീം.
