ക്രിക്കറ്റ് ലോകത്തിന്‍റെ നെഞ്ചിടിപ്പേറ്റിയ മത്സരങ്ങള്‍. നിര്‍ഭാഗ്യം കൊണ്ടുമാത്രമുണ്ടാകുന്ന തോല്‍വികള്‍... സമീപകാലത്തെ പ്രകടനങ്ങള്‍ പരിശോധിച്ചാല്‍ ഇതാണ് അഫ്ഗാനിസ്ഥാന് ക്രിക്കറ്റ് ടീമെന്ന് (Afghanistan Cricket Team) പറയാം. നിര്‍ഭാഗ്യം കൊണ്ട് മാത്രം നിരവധി മത്സരങ്ങള്‍ കൈവിടേണ്ടി വന്നിട്ടുണ്ട് അഫ്ഗാനിസ്ഥാന്.
2019ലെ ഏകദിന ലോകകപ്പില്‍ ഇന്ത്യയ്‌ക്കെതിരായ മത്സരവും അടുത്തിടെ അവസാനിച്ച ഏഷ്യ കപ്പിലെ ശ്രീലങ്കയ്‌ക്കെതിരായ പോരാട്ടവും അതിന് ഉദാഹരണങ്ങള്‍ മാത്രം. അതെല്ലാം പഴയ കഥകളാണ്. ഇനി അവര്‍ക്ക് മുന്നിലുള്ളത് ഏകദിന ലോകകപ്പ് എന്ന വലിയ കടമ്പയും. ഇന്ത്യയില്‍ ഇക്കുറി വിരുന്നെത്തിയിരിക്കുന്ന ഏകദിന ലോകകപ്പില്‍ ഭാഗ്യക്കേടുകളെല്ലാം മാറ്റി സ്വപ്‌ന തുല്യമായൊരു കുതിപ്പാണ് അഫ്ഗാനിസ്ഥാന് ക്രിക്കറ്റ് ടീം ലക്ഷ്യമിടുന്നത്.
റാഷിദ് ഖാന്‍ (Rashid Khan), മുജീബ് ഉര്‍ റഹ്മാന് (Mujeeb Ur Rahman), നൂര്‍ അഹമ്മദ് (Noor Ahmad).. ഏത് ബാറ്റിങ് നിരയേയും കറക്കി വീഴ്‌ത്താന്‍ കെല്‍പ്പുള്ള സ്‌പിന്നര്‍മാരാണ് അഫ്‌ഗാന്‍ ടീമിന്‍റെ കരുത്ത്. മുഹമ്മദ് നബിയെന്ന വെറ്ററന്‍ ഓള്‍റൗണ്ടറുടെ സേവനം ലോകകപ്പ് വേദിയില്‍ അവര്‍ക്ക് കരുത്താകും. പ്രവചാനീതമാണ് അഫ്‌ഗാന്‍ ബാറ്റിങ് നിരയുടെ പ്രകടനം.
ക്യാപ്റ്റന് ഹഷ്‌മത്തുള്ള ഷാഹിദി, നജീബുള്ള സദ്രാന്‍, ഇബ്രാഹിം സദ്രാന്‍, വിക്കറ്റ് കീപ്പര്‍ ബാറ്റര്‍ റഹ്മാനുള്ള ഗുര്‍ബാസ് എന്നിവരിലാണ് ടീം ബാറ്റിങ്ങില്‍ പ്രതീക്ഷയര്‍പ്പിക്കുന്നത്. വാലറ്റത്ത് മിന്നലാട്ടങ്ങള്‍ നടത്താന്‍ റാഷിദ് ഖാനുള്ളത് അവര്‍ക്ക് ആശ്വാസമായിരിക്കും. ഐപിഎല്ലിനിടെ വാര്‍ത്തകളില്‍ ഇടം പിടിച്ച നവീന്‍ ഉല്‍ ഹഖ്, ഫസല്‍ഹഖ് ഫറൂഖി എന്നിവരിലായിരിക്കും അഫ്‌ഗാന്‍റെ ബൗളിങ് പ്രതീക്ഷകള്‍.
ചരിത്രം രചിക്കാന്‍ അഫ്ഗാനിസ്ഥാന്: ക്രിക്കറ്റ് ചരിത്രത്തില്‍ തങ്ങളുടെ മൂന്നാമത്തെ മാത്രം ഏകദിന ലോകകപ്പ് കളിക്കാനുള്ള ഒരുക്കത്തിലാണ് അഫ്ഗാനിസ്ഥാന് ക്രിക്കറ്റ് ടീം. 2015ലായിരുന്നു അവര്‍ ആദ്യമായി ലോകകപ്പ് യോഗ്യത നേടുന്നത്. ഓസ്‌ട്രേലിയ -ന്യൂസിലന്‍ഡ് എന്നിവിടങ്ങളില്‍ നടന്ന ലോകകപ്പില്‍ ഗ്രൂപ്പ് സ്റ്റേജിലെ അഞ്ചാം മത്സരത്തില്‍ സ്‌കോട്‌ലന്‍ഡിനെ തകര്‍ക്കാന്‍ അവര്‍ക്കായി. ആ ജയം മാത്രമായിരുന്നു ആദ്യ ലോകകപ്പിലെ അഫ്‌ഗാന്‍റെ സമ്പാദ്യം.
2019ല്‍ ഇംഗ്ലണ്ടില്‍ നടന്ന ലോകകപ്പിലും പോരടിക്കാന്‍ അഫ്ഗാനിസ്ഥാന് ഉണ്ടായിരുന്നു. എന്നാല്‍, 9 മത്സരം കളത്തിലിറങ്ങിയിട്ടും ഒരു ജയം പോലും നേടാനാകാതെ ആയിരുന്നു അവരുടെ മടക്കം. എന്നാല്‍, ഗ്രൂപ്പ് ഘട്ടത്തില്‍ ഇന്ത്യയെ വിറപ്പിച്ചായിരുന്നു അവര്‍ കീഴടങ്ങിയത്.
ഇക്കുറി, നേരിട്ട് ലോകകപ്പ് യോഗ്യത ഉറപ്പാക്കാന്‍ അഫ്ഗാനിസ്ഥാന് സാധിച്ചു എന്നത് ശ്രദ്ധേയമാണ്. ചുരുങ്ങിയ കാലം കൊണ്ടാണ് അഫ്‌ഗാന്‍ ക്രിക്കറ്റ് ഇന്ന് ഈ കാണുന്ന നിലയില്‍ എത്തിയത്. 2001ല്‍ ഐസിസിയുടെ അഫിലിയേറ്റ് അംഗവും 2003ല്‍ ഏഷ്യന്‍ ക്രിക്കറ്റ് കൗണ്‍സിലിന്‍റെ അസോസിയേറ്റ് അംഗവുമായി അഫ്ഗാനിസ്ഥാന് മാറി.
തുടര്‍ന്ന് അസോസിയേറ്റ് രാഷ്‌ട്രങ്ങള്‍ക്കെതിരെയുള്ള മത്സരങ്ങളില്‍ മിന്നും പ്രകടനം അവര്‍ പുറത്തെടുത്തു. 2010ലെ ടി20 ലോകകപ്പിന് യോഗ്യത നേടിയെങ്കിലും വമ്പന്‍മാര്‍ക്ക് മുന്നില്‍ അവരുടെ കാലിടറി. 2011 ഏകദിന ലോകകപ്പിന് യോഗ്യത ഉറപ്പാക്കാന്‍ അവര്‍ക്ക് കഴിഞ്ഞിരുന്നില്ല. 2017ലായിരുന്നു ഐസിസിയുടെ ടെസ്റ്റ് പദവി അഫ്ഗാനിസ്ഥാന് ലഭിച്ചത്.
അഫ്ഗാനിസ്ഥാന് ഏകദിന ലോകകപ്പ് 2023 സ്‌ക്വാഡ്: ഹഷ്‌മത്തുള്ള ഷാഹിദി (ക്യാപ്റ്റന്), റഹ്മാനുള്ള ഗുർബാസ്, ഇബ്രാഹിം സദ്രാൻ, റിയാസ് ഹസ്സൻ, റഹ്മത്ത് ഷാ, നജീബുള്ള സദ്രാൻ, മുഹമ്മദ് നബി, ഇക്രം അലിഖിൽ, അസ്‌മത്തുള്ള ഒമർസായി, റാഷിദ് ഖാൻ, മുജീബ് ഉർ റഹ്മാൻ, നൂർ അഹമ്മദ്, ഫസല്‍ഹഖ് ഫറൂഖി, അബ്‌ദുല്‍ റഹ്മാന്, നവീന്‍ ഉല്‍ ഹഖ്.
