മെൽബൺ: ക്രിക്കറ്റ് ഓസ്ട്രേലിയയുടെ ഈ പതിറ്റാണ്ടിലെ ഏകദിന ടീം ക്യാപ്റ്റനായി മഹേന്ദ്ര സിങ് ധോണിയെ തെരഞ്ഞെടുത്തു. അന്താരാഷ്ട്ര ക്രിക്കറ്റില്‍ 15 വര്‍ഷം പൂര്‍ത്തിയാക്കിയ ധോണിക്ക് തന്‍റെ കരിയറില്‍ മറ്റൊരു സുവര്‍ണ നിമിഷം കൂടി. ഓസ്ട്രേലിയക്കെതിരായ മൂന്ന് ഏകദിന ടീമിനെ ഇന്നലെ പ്രഖ്യാപിച്ചിരുന്നു.
ധോണിയുള്‍പ്പെടെ മൂന്ന് ഇന്ത്യന്‍ താരങ്ങള്‍ ക്രിക്കറ്റ് ഓസ്ട്രേലിയയുടെ ഇലവനില്‍ ഇടംപിടിച്ചു. രോഹിത് ശര്‍മ, വിരാട് കോലി എന്നിവരാണ് മറ്റ് രണ്ട് താരങ്ങള്‍. 2011ല്‍ സ്വന്തം മണ്ണില്‍ ലോകകപ്പില്‍ രാജ്യത്തിന്‍റെ യശസ് വാനോളമുയര്‍ത്തിയ വലംകൈയ്യനാണ് ധോണിയെന്ന് ക്രിക്കറ്റ് ഓസ്ട്രേലിയ പ്രശംസിച്ചു. എം എസ് ധോണിയുടെ ബാറ്റിങ് കരുത്തിലാണ് ഇന്ത്യ ഏകദിന ടീമില്‍ സുവര്‍ണ കാലം രചിച്ചത്. മുംബൈ വാങ്കട സ്റ്റേഡിയത്തില്‍ 28 വര്‍ഷത്തിന് ശേഷം ഇന്ത്യ ലോകകപ്പ് ഉയര്‍ത്തിയത് ധോണിയുടെ നേതൃത്വത്തിലാണ്.
വിക്കറ്റ് കീപ്പര്‍ എന്ന നിലയില്‍ ബൗളര്‍മാര്‍ക്ക് എന്നും പേടി സ്വപ്നമായിരുന്നു ധോണി. 90 ടെസ്റ്റുകള്‍ കളിച്ചിട്ടുള്ള ധോണി 38.09 റണ്‍സ് ശരാശരിയില്‍ 4876 റണ്‍സ് നേടിയിട്ടുണ്ട്. 35 ഏകദിന മത്സരങ്ങള്‍ കളിച്ചിട്ടുള്ള അദ്ദേഹം 50.57 ശരാശരിയില്‍ 103773 റണ്‍സും 98 ട്വന്‍റി 20 മത്സരങ്ങളില്‍ നിന്നും 37.60 ശരാശരിയില്‍ 1617 റണ്‍സും നേടിയിട്ടുണ്ട്. അന്താരാഷ്ട്ര ക്രിക്കറ്റില്‍ മൊത്തം 17,266 റണ്‍സാണ് ധോണിയുടെ സമ്പാദ്യം.
2019 ലെ ഐസിസി ക്രിക്കറ്റ് ലോകകപ്പിൽ സെമി ഫൈനലിൽ നിന്ന് പുറത്തായതിന് ശേഷം ധോണി ടീമിനായി ക്രീസിലിറങ്ങിയിട്ടില്ല. മന്ദഗതിയിലുള്ള റണ്‍വേട്ടയെന്ന വിമര്‍ശനം സമീപ കാലങ്ങളില്‍ ധോണി ഏറെ നേരിടേണ്ടി വന്നിട്ടുണ്ട്. പ്രത്യേകിച്ചും ഇംഗ്ലണ്ടിനും ന്യൂസിലന്‍ഡിനുമെതിരായ മത്സരങ്ങളില്‍.
സിഎയുടെ ഈ ദശകത്തിലെ ഏകദിന ടീം: രോഹിത് ശർമ, ഹാഷിം അംല, വിരാട് കോഹ്‌ലി, എ ബി ഡിവില്ലിയേഴ്സ്, ഷാക്കിബ് അൽ ഹസൻ, ജോസ് ബട്‌ലർ, എം എസ് ധോണി(ക്യാപ്റ്റന്‍), മിച്ചൽ സ്റ്റാർക്ക്, ട്രെന്റ് ബോൾട്ട്, ലസിത് മലിംഗ, റാഷിദ് ഖാൻ.
പരിക്കില്‍ നിന്നും മുക്തനായ ജസ്‌പ്രീത് ബൂംമ്രക്കും ഓപ്പണര്‍ ശിഖര്‍ ധവാനും പ്രത്യേക പരാമര്‍ശം.
സിഎയുടെ ഈ ദശകത്തിലെ ടെസ്റ്റ് ടീം: അലിസ്റ്റർ കുക്ക്, ഡേവിഡ് വാർണർ, കെയ്ൻ വില്യംസൺ, സ്റ്റീവ് സ്മിത്ത്, വിരാട് കോഹ്‌ലി (ക്യാപ്റ്റന്‍), എ ബി ഡിവില്ലിയേഴ്സ്, ബെൻ സ്റ്റോക്സ്, ഡെയ്ല്‍ സ്റ്റെയ്ൻ, സ്റ്റുവർട്ട് ബ്രോഡ്, നഥാൻ ലിയോൺ, ജെയിംസ് ആൻഡേഴ്സൺ.
