ഗോൾ(ശ്രീലങ്ക): ടെസ്റ്റ് ക്രിക്കറ്റില്‍ സച്ചിന്‍റെ റെക്കോഡിനൊപ്പമെത്തി ന്യൂസിലൻഡ് പേസർ ടിം സൗത്തി. ടെസ്റ്റില്‍ ഏറ്റവും കൂടുതല്‍ സിക്സുകൾ നേടിയ താരങ്ങളുടെ പട്ടികയില്‍ സച്ചിനൊപ്പമെത്തിയിരിക്കുകയാണ് സൗത്തി.
സച്ചിൻ 329 ഇന്നിങ്സുകളില്‍ നിന്ന് സ്വന്തമാക്കിയ 69 സിക്സറുകളെന്ന നേട്ടത്തിനൊപ്പമാണ് ഇപ്പോൾ സൗത്തി. ഈ നേട്ടത്തിലെത്താൻ സൗത്തിക്ക് വേണ്ടിവന്നത് 89 ഇന്നിങ്സുകൾ മാത്രമാണ്. ശ്രീലങ്കക്കെതിരെ ഗോളില്‍ നടക്കുന്ന ഒന്നാം ക്രിക്കറ്റ് ടെസ്റ്റിന്‍റെ ഒന്നാം ഇന്നിങ്സില്‍ ധനഞ്ജയ ഡി സിസില്‍വയ്ക്കെതിരെ നേടിയ സിക്സോടെയാണ് സൗത്തി സച്ചിനൊപ്പമെത്തിയത്. ഈ പട്ടികയില്‍ ഇപ്പോൾ 17ാം സ്ഥാനത്താണ് സൗത്തി.
176 ഇന്നിങ്സുകളില്‍ നിന്ന് 107 സിക്സുകൾ നേടിയ ന്യൂസിലൻഡ് മുൻ നായകൻ ബ്രണ്ടൻ മക്കലമാണ് ഈ പട്ടികയില്‍ മുന്നില്‍. 100 സിക്സുകൾ നേടിയ ഓസ്ട്രേലിയൻ മുൻ താരം ആദം ഗില്‍ക്രിസ്റ്റ് രണ്ടാമതും 98 സിക്സ് നേടിയ ക്രിസ് ഗെയ്‌ല്‍ മൂന്നാം സ്ഥാനത്തുമാണ്. 180 ഇന്നിങ്സുകളില്‍ നിന്ന് 91 സിക്സുകൾ സ്വന്തമാക്കിയ വീരേന്ദർ സേവാഗാണ് ഇന്ത്യൻ താരങ്ങളില്‍ മുന്നില്‍.
