ഹൈദരാബാദ്: ന്യൂസിലന്‍ഡിനെതിരെ നടന്ന മൂന്ന് മത്സരങ്ങളില്‍ രണ്ടും ജയിച്ച് ഇന്ത്യന്‍ ക്രിക്കറ്റ് ടീമുകൾ. ദക്ഷിണാഫ്രിക്കയിലും ന്യൂസിലന്‍ഡിലുമായാണ് മത്സരങ്ങൾ നടന്നത്. ന്യൂസിലന്‍ഡില്‍ നടന്ന മത്സരത്തില്‍ ഇന്ത്യന്‍ സീനിയർ ടീമും ദക്ഷിണാഫ്രിക്കയില്‍ നടന്ന മത്സരത്തില്‍ അണ്ടർ-19 ടീമും ജയം സ്വന്തമാക്കിയപ്പോൾ ന്യൂസിലന്‍ഡില്‍ നടന്ന മത്സരത്തില്‍ ഇന്ത്യന്‍ എ ടീം പരാജയം രുചിച്ചു.
ഇന്ത്യന്‍ സീനിയർ ടീമിന്‍റെ ന്യൂസിലന്‍ഡ് പര്യടനത്തിന്‍റെ ഭാഗമായുള്ള ആദ്യ മത്സരമാണ് ഇന്നലെ നടന്നത്. ഓക്‌ലാന്‍ഡില്‍ നടന്ന സീനിയർ ടീമിന്‍റെ ആദ്യ ടി20 മത്സരത്തില്‍ ഇരുപക്ഷത്തും ബാറ്റ്‌സ്‌മാന്‍മാര്‍ നിറഞ്ഞാടി. ആദ്യം ബാറ്റ് ചെയ്‌ത കിവീസ് 20 ഓവറില്‍ അഞ്ച് വിക്കറ്റ് മാത്രം നഷ്‌ടപ്പെടുത്തി 204 റണ്‍സ് നേടി. 205 റണ്‍സ് വിജയലക്ഷ്യം പിന്തുടര്‍ന്ന കോലിപ്പട ആറ് പന്തുകള്‍ ബാക്കി നില്‍ക്കേ നാല് വിക്കറ്റുകള്‍ മാത്രം നഷ്‌ടപ്പെടുത്തി ജയം സ്വന്തമാക്കി. ന്യൂസിലാന്‍ഡ് പര്യടനത്തിലെ ആദ്യ ടി20 മത്സരം കൂടിയാണ് ഓക്‌ലാന്‍ഡില്‍ നടന്നത്. വിക്കറ്റ് കീപ്പർ ബാറ്റ്സ്‌മാനും ഓപ്പണറുമായ ലോകേഷ് രാഹുല്‍ 27 പന്തില്‍ അർധ സെഞ്ച്വറിയോടെ 56 റണ്‍സെടുത്തു. നായകന്‍ വിരാട് കോലി 32 പന്തില്‍ 45 റണ്‍സെടുത്തു. ഇരുവരും ചേർന്ന് 99 റണ്‍സിന്‍റെ രണ്ടാം വിക്കറ്റ് കൂട്ടുകെട്ടാണ് ഉണ്ടാക്കിയത്. 29 പന്തിൽ അർധസെഞ്ച്വറിയോടെ പുറത്താകാതെ 58 റണ്‍സെടുത്ത ശ്രേയസ് അയ്യർ ഇന്ത്യയുടെ ജയം അനായാസമാക്കി.
ദക്ഷിണാഫ്രിക്കയില്‍ നടന്ന അണ്ടര്‍ 19 ക്രിക്കറ്റ് ലോകകപ്പിലായിരുന്നു ഇന്ത്യന്‍ ടീമിന്‍റെ മറ്റൊരു ജയം. ന്യൂസിലാന്‍ഡിനെതിരെ മഴ തടസപ്പെടുത്തിയ മത്സരത്തില്‍ ഡക്ക്‌വർത്ത് ലൂയിസ് നിയമപ്രകാരം 44 റണ്‍സിന്‍റെ ജയമാണ് ടീം ഇന്ത്യ സ്വന്തമാക്കിയത്. മഴകാരണം മത്സരം 23 ഓവറാക്കി ചുരുക്കി. വിക്കറ്റൊന്നും നഷ്‌ടമാകാതെ 115 റണ്‍സ് ടീം ഇന്ത്യ 23 ഓവറില്‍ സ്വന്തമാക്കി. എന്നാല്‍ സ്‌കോര്‍ പുതുക്കി നിശ്ചയിപ്പോള്‍ ന്യൂസിലന്‍ഡിന്‍റെ വിജയലക്ഷ്യം 192 റണ്‍സായി. മറുപടി ബാറ്റിങ്ങിന് ഇറങ്ങിയ ന്യൂസിലന്‍ഡ് 21 ഓവറില്‍ 147-ന് കൂടാരം കയറി.
അതേസമയം ന്യൂസിലാന്‍ഡ് പര്യടനത്തിലുള്ള ഇന്ത്യന്‍ എ ടീം തോല്‍വി ഏറ്റുവാങ്ങി. ഇന്ത്യന്‍ എ ടീമിനെതിരെ ന്യൂസിലാന്‍ഡിന് 29 റണ്‍സിന്‍റെ വിജയം. നേരത്തെ ടോസ്‌ നേടിയ ഇന്ത്യ ബോളിങ് തെരഞ്ഞെടുത്തു. ആദ്യം ബാറ്റ് ചെയ്‌ത ആതിഥേയർ ഏഴ് വിക്കറ്റ് നഷ്‌ടത്തില്‍ 295 റണ്‍സെടുത്തു. മറുപടി ബാറ്റിങ്ങിന് ഇറങ്ങിയ ഇന്ത്യ നിശ്ചിത 50 ഓവറില്‍ ഒമ്പത് വിക്കറ്റ് നഷ്‌ടത്തില്‍ 266 റണ്‍സെടുക്കാനെ ആയുള്ളൂ. ന്യൂസിലാന്‍ഡിന് വേണ്ടി ജോർജ് വർക്കർ 135 റണ്‍സോടെ സ്ഞ്ച്വറി സ്വന്തമാക്കി. ഇന്ത്യക്കായി ക്രുണാല്‍ പാണ്ഡ്യ അർധ സെഞ്ച്വറിയോടെ അർധസെഞ്ച്വറി സ്വന്തമാക്കി.
