മുംബൈ: റെക്കോഡുകള്‍ തകര്‍ക്കപ്പെടാനുള്ളതാണ്. എന്നാല്‍ ചില റെക്കോഡുകള്‍ തകര്‍ക്കുക അത്ര എളുപ്പമുള്ള കാര്യമല്ല. അക്കൂട്ടത്തിലുള്ളതാണ് വെസ്റ്റ് ഇന്‍ഡീസ് ഇതിഹാസ താരം ബ്രയാന്‍ ലാറയുടെ ടെസ്റ്റ്, ഫസ്റ്റ് ക്ലാസ് ക്രിക്കറ്റുകളിലെ ഒരു ഇന്നിങ്‌സിലെ ഏറ്റവും ഉയര്‍ന്ന വ്യക്തിഗ സ്‌കോര്‍ എന്ന റെക്കോഡ്. 2004-ല്‍ ഇംഗ്ലണ്ടിനെതിരെ സെന്‍റ്‌ ജോണ്‍സില്‍ പുറത്താവാതെ 400 റണ്‍സടിച്ചാണ് ടെസ്റ്റില്‍ ഏറ്റവും ഉയര്‍ന്ന വ്യക്തിഗത സ്‌കോര്‍ എന്ന നേട്ടത്തിലേക്ക് ലാറ എത്തിയത്. (Brian Lara Test Record)
582 പന്തില്‍ 43 ബൗണ്ടറികളും നാല് സിക്‌സുറുകളും സഹിതമായിരുന്നു ലാറയുടെ പ്രകടനം. ഇതിന് മുന്നെ തന്നെ 1994-ല്‍ കൗണ്ടി ചാമ്പ്യന്‍ഷിപ്പില്‍ പുറത്താവാതെ 501 റണ്‍സടിച്ച് ഫസ്റ്റ് ക്ലാസ് ക്രിക്കറ്റിലെ റെക്കോഡും ലാറ തൂക്കിയിരുന്നു. വാർവിക്‌ഷെയറിന് വേണ്ടി കളിച്ച ലാറ ഡർഹാമിനെതിരെ ആയിരുന്നു മിന്നിയത്.
ഇപ്പോഴിതാ തന്‍റെ ഈ റെക്കോഡുകളെല്ലാം തകര്‍ക്കപ്പെടുമെന്ന് പ്രതികരിച്ചിരിക്കുകയാണ് 54-കാരന്‍. അതിന് കഴിയുക ഒരു ഇന്ത്യന്‍ താരത്തിനാണെന്നും ലാറ പറഞ്ഞു. വിരാട് കോലിയ്‌ക്കോ രോഹിത് ശര്‍മയ്‌ക്കോ നേരെയല്ല യുവ ഓപ്പണര്‍ ശുഭ്‌മാന്‍ ഗില്ലിന്‍റെ നേര്‍ക്കാണ് വിന്‍ഡീസ് ഇതിഹാസം തന്‍റെ വിരല്‍ ചൂണ്ടിയിരിക്കുന്നത് (Brian Lara on Shubman Gill)
"ശുഭ്‌മാന്‍ ഗില്ലിന് എന്‍റെ രണ്ട് റെക്കോഡുകള്‍ തകര്‍ക്കാന്‍ കഴിയും. ടെസ്റ്റില്‍ തീര്‍ച്ചയായും അവന് 400 റണ്‍സ് മറികടക്കാന്‍ കഴിയും. അന്നത്തെ ക്രിക്കറ്റും ഇന്നത്തെ ക്രിക്കറ്റും ഏറെ മാറ്റമുണ്ട്. പ്രത്യേകിച്ച് ബാറ്റിങ്ങില്‍.
ബാറ്റര്‍മാര്‍ ലോകത്തെമ്പാടും ടി20 ലീഗുകള്‍ കളിക്കുന്നു. ഐപിഎല്ലാണ് എല്ലാത്തിനേയും മാറ്റി മറിച്ചത്. സ്‌കോറിങ് റേറ്റ് ഏറെ ഉയര്‍ന്നു. അതിനാല്‍ മത്സരങ്ങളില്‍ വലിയ സ്‌കോറുകള്‍ പിറക്കുന്നത് തുടര്‍ന്നും കാണാം. ശുഭ്‌മാന്‍ ഗില്ലിന് വമ്പന്‍ സ്‌കോറുകള്‍ നേടാന്‍ കഴിയും. എന്‍റെ ഈ വാക്കുകള്‍ കുറിച്ചിട്ടോളൂ...
പുതിയ തലമുറയില്‍ ഏറ്റവും പ്രതിഭാധനനായ ക്രിക്കറ്ററാണ് ഗില്‍. അവരും വര്‍ഷങ്ങളില്‍ ക്രിക്കറ്റ് ലോകത്തെ അടക്കി ഭരിക്കാന്‍ പോകുന്നത് അവന് തന്നെയാണ്. എന്‍റെ പല റെക്കോഡുകളും അവന് തകര്‍ക്കുമെന്നാണ് ഞാന്‍ വിശ്വസിക്കുന്നത്" ഒരു അഭിമുഖത്തില്‍ ബ്രയാന്‍ ലാറ പറഞ്ഞു.
ഇന്ത്യയുടെ ദക്ഷിണാഫ്രിക്കന്‍ പര്യടനത്തിന് തൊട്ടുമുമ്പാണ് ലാറയുടെ വാക്കുകള്‍ (India tour of South Africa). ദക്ഷിണാഫ്രിക്കയ്‌ക്ക് എതിരെ മൂന്ന് വീതം ടി20യും, ഏകദിനങ്ങളും രണ്ട് ടെസ്റ്റുകളുമാണ് ഇന്ത്യ കളിക്കുന്നത്. (India vs South Africa) ഏകദിന പരമ്പരയില്‍ വിശ്രം അനുവദിച്ചതിനാല്‍ ടി20, ടെസ്റ്റ് ഫോര്‍മാറ്റില്‍ ശുഭ്‌മാന്‍ ഗില്‍ ഇന്ത്യയ്‌ക്കായി കളത്തിലിറങ്ങും. നിലവില്‍ ഇന്ത്യയ്‌ക്കായി 18 മത്സരങ്ങളില്‍ നിന്നും 32 ശരാശരിയില്‍ രണ്ടു സെഞ്ചുറികളും നാല് അര്‍ധ സെഞ്ചുറികളും സഹിതം 966 റണ്‍സാണ് താരം നേടിയിട്ടുള്ളത് (Shubman Gill Test Runs)
