ദുബായ്: ഹോങ്കോങ്ങിനെതിരായ ഏഷ്യ കപ്പ് ടി20 മത്സരത്തില്‍ ഇന്ത്യയുടെ വിജയത്തില്‍ നിര്‍ണായക പങ്കാണ് സൂര്യകുമാര്‍ യാദവിനുള്ളത്. നാലാം നമ്പറില്‍ ക്രീസിലെത്തിയ സൂര്യകുമാര്‍ യാദവ് 26 പന്തില്‍ പുറത്താവാതെ 68 റണ്‍സാണ് അടിച്ച് കൂട്ടിയത്. ആറ് വീതം സിക്‌സും ഫോറും സഹിതം 261.53 സ്‌ട്രൈക്ക്‌ റേറ്റിലാണ് സൂര്യകുമാറിന്‍റെ പ്രകടനം.
ഇന്ത്യയുടെ മുന്‍ ക്യാപ്റ്റന്‍ വിരാട് കോലിയെ ഒരറ്റത്ത് കാഴ്‌ചക്കാരനാക്കിയായിരുന്നു സൂര്യകുമാറിന്‍റെ വെടിക്കെട്ട്. ഇന്ത്യയുടെ ഇന്നിങ്‌സ് പൂര്‍ത്തിയായതിന് ശേഷം സൂര്യകുമാറിന് മുന്നില്‍ തലകുനിച്ചാണ് കോലി അഭിനന്ദനം അറിയിച്ചത്. കോലിയുടെ ഈ ആദരവ് ഹൃദയസ്‌പര്‍ശിയായിരുന്നുവെന്ന് സൂര്യകുമാര്‍ വാര്‍ത്ത സമ്മേളനത്തില്‍ പറഞ്ഞു.
കളിക്കളത്തില്‍ കോലിയോടൊപ്പമുള്ള നിമിഷങ്ങളെക്കുറിച്ചും താരം മനസ് തുറന്നു. കോലിയോടൊപ്പം ബാറ്റ് ചെയ്യുന്നത് വളരെ ആസ്വദിച്ചുവെന്നും, പരിചയസമ്പന്നനായ താരത്തോടൊപ്പമുള്ള ചര്‍ച്ചകള്‍ തന്‍റെ പ്രകടനത്തില്‍ നിര്‍ണായകമായതായും സൂര്യകുമാര്‍ പറഞ്ഞു. "തുടക്കത്തിൽ വിക്കറ്റ് അൽപ്പം മന്ദഗതിയിലായതിനാൽ, വേഗത്തിൽ കളിക്കേണ്ട സാഹചര്യമായിരുന്നു.
ക്രീസിലെത്തിയതിന് പിന്നാലെ ഞാന്‍ കോലിയുമായി സംസാരിച്ചു. സ്വയം പ്രകടിപ്പിക്കാനും, സാധാരണ ബാറ്റ് ചെയ്യുന്നത് പോലെ കളിക്കാനുമാണ് അദ്ദേഹം പറഞ്ഞത്. എങ്ങനെ ബാറ്റ് ചെയ്യണം എന്നതിനെക്കുറിച്ചുള്ള എന്‍റെ പദ്ധതികളും വ്യക്തമായിരുന്നതിനാല്‍ അത് രസകരമായിരുന്നു". സൂര്യകുമാര്‍ പറഞ്ഞു.
ഇന്ത്യയ്‌ക്കായി ഏത് പൊസിഷനിലും ബാറ്റ് ചെയ്യാന്‍ തയ്യാറാണെന്നും താരം വ്യക്തമാക്കി. മത്സരത്തില്‍ 44 പന്തില്‍ 59 റണ്‍സടിച്ച് പുറത്താവാതെ നിന്ന കോലിയും തിളങ്ങിയിരുന്നു. നാലാം വിക്കറ്റില്‍ ഇരുവരും ചേര്‍ന്ന് ഉയര്‍ത്തിയ 98 റണ്‍സിന്‍റെ കൂട്ടുകെട്ടാണ് ഇന്ത്യന്‍ വിജയത്തില്‍ നിര്‍ണായകമായത്.
മത്സരത്തില്‍ ഇന്ത്യ 40 റണ്‍സിന് ഹോങ്കോങ്ങിനെ തകര്‍ത്തിരുന്നു. ഇന്ത്യ ഉയര്‍ത്തിയ 193 റണ്‍സ് വിജയലക്ഷ്യം പിന്തുടര്‍ന്ന ഹോങ്കോങ്ങിന്‍റെ പോരാട്ടം 20 ഓവറില്‍ അഞ്ച് വിക്കറ്റ് നഷ്‌ടത്തില്‍ 152ല്‍ അവസാനിക്കുകയായിരുന്നു. സൂര്യകുമാര്‍ യാദവാണ് കളയിലെ താരം.
also read: Asia Cup: ടി20 ക്രിക്കറ്റില്‍ രോഹിത്തിന് ലോക റെക്കോഡ്; മറ്റാര്‍ക്കും തകര്‍ക്കാനാവാത്ത നേട്ടം
