ദുബായ്: ഏഷ്യ കപ്പ് ക്രിക്കറ്റില്‍ പാകിസ്ഥാനെതിരായ മത്സരത്തിലെ തോല്‍വിക്ക് പിന്നാലെ കടുത്ത സൈബര്‍ ആക്രമണമാണ് യുവ പേസര്‍ അര്‍ഷ്‌ദീപ് സിങ്ങിന് നേരെ നടക്കുന്നത്. മത്സരത്തിലെ നിര്‍ണായക ഘട്ടത്തില്‍ ക്യാച്ച് പാഴാക്കിയ അര്‍ഷ്‌ദീപിന്‍റെ കുടുംബത്തെ വരെ അധിക്ഷേപിച്ച് ഒരു വിഭാഗം ആളുകള്‍ രംഗത്തെത്തി. എന്നാല്‍ താരത്തിന് പൂര്‍ണ പിന്തുണയുമായി രംഗത്തെത്തിയിരിക്കുകയാണ് മുന്‍ ഇന്ത്യന്‍ ക്യാപ്‌റ്റന്‍ വിരാട് കോലി.
കടുത്ത സമ്മര്‍ദമുള്ള ഘട്ടത്തില്‍ തെറ്റുകള്‍ ആര്‍ക്കും സംഭവിക്കാവുന്നതാണെന്നും അതില്‍ നിന്നും പാഠങ്ങള്‍ ഉള്‍ക്കൊണ്ട് മുന്നോട്ട് പോവുകയാണ് ചെയ്യേണ്ടതെന്നും കോലി പറഞ്ഞു. മത്സര ശേഷമുള്ള വാര്‍ത്ത സമ്മേളനത്തിലാണ് കോലിയുടെ പ്രതികരണം.
"സമ്മര്‍ദ ഘട്ടത്തില്‍ ആര്‍ക്കും തെറ്റ് സംഭവിക്കാം. കടുത്ത സമ്മര്‍ദം നിറഞ്ഞ മത്സരമായിരുന്നുവിത്. അതിനാല്‍ തെറ്റുകളും സംഭവിക്കാം. ചാമ്പ്യന്‍സ് ട്രോഫിയില്‍ എന്‍റെ ആദ്യ മത്സരം പാകിസ്ഥാന് എതിരെ കളിച്ചത് ഇപ്പോഴും ഓര്‍മയുണ്ട്.
ഷാഹിദ് അഫ്രീദിക്കെതിരെ വളരെ മോശം ഷോട്ടാണ് ഞാന്‍ കളിച്ചിരുന്നത്. അന്നെനിക്ക് ഉറങ്ങാന്‍ കഴിഞ്ഞില്ല. വെളുപ്പിന് അഞ്ച് വരെ ഞാന്‍ സീലിങ്‌ നോക്കി കിടന്നു. എന്‍റെ കരിയര്‍ അവസാനിച്ചു എന്നാണ് ഞാന്‍ കരുതിയിരുന്നത്. എന്നാല്‍ ഇത്തരം സംഭവങ്ങള്‍ സ്വാഭാവികമാണ്", കോലി പറഞ്ഞു.
"നിനക്ക് ചുറ്റും മുതിര്‍ന്ന താരങ്ങളുണ്ട്. ഇപ്പോഴത്തെ ടീം അന്തരീക്ഷവും നല്ലതാണ്. അതിന്‍റെ ക്രെഡിറ്റ് ക്യാപ്‌റ്റനും കോച്ചിനുമാണ് ഞാന്‍ നല്‍കുന്നത്. കളിക്കാര്‍ അവരുടെ തെറ്റുകളില്‍ നിന്ന് പഠിക്കും. തെറ്റുകള്‍ അംഗീകരിക്കുകയും ഇതേ സമ്മര്‍ദം വരുമ്പോള്‍ എങ്ങനെ പരിഹരിക്കാമെന്ന് ആലോച്ച് മുന്നോട്ട് പോവുകയുമാണ് ഒരാള്‍ ചെയ്യേണ്ടത്", വിരാട് കോലി പറഞ്ഞു.
