ന്യൂഡല്‍ഹി: ആശയവിനിമയങ്ങളില്‍ തടസമില്ലാതിരിക്കാന്‍ കളിക്കാരും മാനേജ്‌മെന്‍റും തമ്മിൽ സുതാര്യത വേണമെന്ന് മുൻ ഇന്ത്യൻ സ്പിന്നർ അമിത് മിശ്ര. ഇന്ത്യന്‍ ക്രിക്കറ്റ്‌ ടീമിന്‍റെ ഏകദിന ക്യാപ്‌റ്റന്‍ സ്ഥാനത്ത് നിന്നും വിരാട് കോലിയെ നീക്കിയതുമായി ബന്ധപ്പെട്ട വിവാദങ്ങള്‍ക്ക് പിന്നാലെയാണ് മിശ്രയുടെ പ്രതികരണം.
"ആദ്യമായല്ല ഇത് സംഭവിക്കുന്നത്. മുമ്പും ഇത്തരത്തില്‍ സംഭവിച്ചിട്ടുണ്ട്. രാജ്യത്തിന് വേണ്ടി കളിക്കുകയും കഠിനാധ്വാനം ചെയ്യുകയും ചെയ്ത ഒരു കളിക്കാരന് തന്നെ എന്തിനാണ് ടീമിൽ നിന്നോ, ഒരു പ്രത്യേക സ്ഥാനത്ത് നിന്നോ പുറത്താക്കിയതെന്ന് അറിയാനുള്ള അവകാശം ഉണ്ടെന്നാണ് എനിക്ക് തോന്നുന്നത്. അതേസമയം ഒരു കളിക്കാരൻ തനിക്ക് എവിടെയാണ് കുറവുള്ളതെന്ന് അറിയുകയും ആ വശം മെച്ചപ്പെടുത്തുകയും വേണം ” -അമിത് മിശ്ര പറഞ്ഞു.
അതേസമയം വിരാട് കോലിയും രോഹിത് ശര്‍മയും തമ്മില്‍ ഭിന്നതയുണ്ടെന്ന അഭ്യൂഹങ്ങളോടും അമിത് മിശ്ര പ്രതികരിച്ചു. "ഇത്തരങ്ങള്‍ കാര്യങ്ങള്‍ ശരിയല്ല. രണ്ട് കളിക്കാർക്കും ജീവിതത്തോട് അത്ര പോസിറ്റീവായ സമീപനമാണുള്ളത്. കളിക്കളത്തിലായിരിക്കുമ്പോഴും നല്ല ആശയവിനിമയം നടത്തുന്നവരാണ് ഇരുവരും.
ടീമിനായി എല്ലായ്‌പ്പോഴും 100 ശതമാനവും നല്‍കുന്നവരാണ് ഇരുവരും. ഒരു ക്യാപ്റ്റനെന്ന നിലയില്‍ വിരാട് മികച്ച പ്രകടനം നടത്തിയതായാണ് ഞാന്‍ കരുതുന്നത്. ഇനി മികച്ച കളിക്കാരനും ക്യാപ്റ്റനുമാണെന്ന് തെളിയിക്കാനുള്ള രോഹിത്തിന്‍റെ ഊഴമാണ്” അമിത് മിശ്ര കൂട്ടിച്ചേര്‍ത്തു.
