ഏഷ്യ കപ്പില്‍ (Asia Cup) തകര്‍പ്പന്‍ ഫോമിലാണ് ഇന്ത്യന്‍ നായകന്‍ രോഹിത് ശര്‍മ (Rohit Sharma). മഴയെ തുടര്‍ന്ന് ഉപേക്ഷിച്ച പാകിസ്ഥാനെതിരായ ആദ്യ മത്സരത്തില്‍ മാത്രമായിരുന്നു രോഹിത് മികവിലേക്ക് ഉയരാതിരുന്നത്. തുടര്‍ന്ന് ഗ്രൂപ്പ് ഘട്ടത്തില്‍ നേപ്പാളിനെതിരെയും (Nepal) സൂപ്പര്‍ ഫോറില്‍ (Asia Cup Super 4) പാകിസ്ഥാന്‍ (Pakistan Cricket Team), ശ്രീലങ്ക (Srilanka Cricket Team) ടീമുകള്‍ക്കെതിരെയും രോഹിത് അര്‍ധസെഞ്ച്വറി നേടി.
ശ്രീലങ്കയ്‌ക്കെതിരായ മത്സരത്തില്‍ മറ്റ് ഇന്ത്യന്‍ ബാറ്റര്‍മാരില്‍ പലരും റണ്‍സടിക്കാന്‍ ബുദ്ധിമുട്ടിയ സാഹചര്യത്തിലാണ് രോഹിത് അര്‍ധസെഞ്ച്വറിയുമായി ടീമിനെ മുന്നില്‍ നിന്നും നയിച്ചത്. ഈ മത്സരത്തിലെ പ്രകടനത്തോടെ അന്താരാഷ്‌ട്ര ഏകദിന ക്രിക്കറ്റില്‍ വിരാട് കോലിക്ക് ശേഷം അതിവേഗം 10,000 റണ്‍സ് നേടുന്ന രണ്ടാമത്തെ താരമായി മാറാനും രോഹിതിനായിരുന്നു (Fastest 10000 Runs In ODI Cricket). ഇതിന് പിന്നാലെയിപ്പോള്‍ രോഹിതിന് പ്രശംസയുമായി രംഗത്തെത്തിയിരിക്കുകയാണ് മുന്‍ ദക്ഷിണാഫ്രിക്കന്‍ സൂപ്പര്‍ താരം എ ബി ഡിവില്ലിയേഴ്‌സ് (AB De Villiers Praised Rohit Sharma).
'അന്താരാഷ്‌ട്ര ക്രിക്കറ്റില്‍ വളരെ പതിയെ 2,000 റണ്‍സ് പൂര്‍ത്തിയാക്കിയ താരമാണ് രോഹിത് ശര്‍മ. എന്നാല്‍, ഇപ്പോള്‍ അതിവേഗത്തില്‍ പതിനായിരം റണ്‍സടിച്ച രണ്ടാത്തെ താരമായാണ് അയാള്‍ മാറിയിരിക്കുന്നത്. ഇത്തരത്തിലൊരു തിരിച്ചുവരവ് എങ്ങനെയാണ് സാധ്യമായിരിക്കുന്നത്. ഞാന്‍ അവനെ വളരയേറെ ബഹുമാനിക്കുന്നു.
ആദ്യം രോഹിതിന്‍റെ പ്രകടനം കണ്ടപ്പോള്‍ തന്നെ ഇയാള്‍ക്ക് എന്തോ പ്രത്യേകത ഉണ്ടായിരുന്നുവെന്ന് എനിക്ക് തോന്നിയിരുന്നു. കരിയറിന്‍റെ തുടക്കം മുതല്‍ തന്നെ തോല്‍ക്കാന്‍ മനസില്ലാത്ത ആളാണ് രോഹിത്. പിന്നിലേക്ക് വീഴാതിരിക്കാന്‍ വേണ്ടി എന്തിനോടും രോഹിത് പോരാടിയിരുന്നു.
Also Read : Asia Cup Super 4 India vs Bangladesh: ഇന്ന് ഒരുക്കം, ബംഗ്ലാദേശിനെ നേരിടാന്‍ ടീം ഇന്ത്യ; സാധ്യത ഇലവന്‍
ഡെയില്‍ സ്റ്റെയ്ൻ, മോര്‍ണി മോര്‍ക്കിള്‍ ഉള്‍പ്പടെയുള്ള പ്രോട്ടീസ് പേസര്‍മാര്‍ക്കെതിരെ പോലും മികച്ച പോരാട്ടവീര്യം രോഹിത് പുറത്തെടുത്തിട്ടുണ്ട്. ഡര്‍ബനില്‍ നടന്ന ഒരു ടെസ്റ്റ് മത്സരത്തില്‍ മാനസികമായും ഞങ്ങളുടെ താരങ്ങളെ അവന്‍ നേരിട്ടിട്ടുണ്ട്. ആ സമയത്ത് രോഹിതിന്‍റെ പ്രവര്‍ത്തി എനിക്ക് ആസ്വദിക്കാന്‍ കഴിഞ്ഞിരുന്നില്ല. കാരണം, ഞാനും ആ ടീമിന്‍റെ ഭാഗമായിരുന്നു. എന്നാല്‍, ഇപ്പോള്‍ പഴയ കാര്യങ്ങള്‍ ഓര്‍ത്തെടുക്കുമ്പോള്‍ അന്നും ഇന്നും രോഹിതിന്‍റെ പോരാട്ടവീര്യത്തില്‍ മാറ്റമുണ്ടായിട്ടില്ല' എബി ഡിവില്ലിയേഴ്‌സ് പറഞ്ഞു.
യുവതാരം ശുഭ്മാന്‍ ഗില്ലിനൊപ്പം ചേര്‍ന്ന് മികച്ച രീതിയിലാണ് രോഹിത് ശര്‍മ റണ്‍സ് കണ്ടെത്തുന്നതെന്നും ഏകദിന ലോകകപ്പില്‍ അത് ഇന്ത്യയ്‌ക്ക് ഏറെ ഗുണം ചെയ്യുമെന്നും ഡിവില്ലിയേഴ്‌സ് കൂട്ടിച്ചേര്‍ത്തു. ഇന്ത്യയ്‌ക്കായി അതിവേഗം 1000 റണ്‍സ് കൂട്ടുകെട്ട് ഉണ്ടാക്കിയിട്ടുള്ള താരങ്ങളാണ് രോഹിതും ഗില്ലും. 13 ഇന്നിങ്‌സില്‍ നിന്നായിരുന്നു ഇവര്‍ ഈ നേട്ടം കൈവരിച്ചത്.
