തിരുവനന്തപുരം: നിലക്കാത്ത ആ വയലിൻ നാദം സഹപാഠികളുടെയും അധ്യാപകരുടെയും ഓർമകളിലൂടെ വീണ്ടും വിതുമ്പി. അകാലത്തിൽ വിടപറഞ്ഞ പ്രിയ സുഹൃത്തിന്‍റെ അനുസ്‌മരണചടങ്ങിൽ, ബാലുവിന്റെ ഓർമകൾ നൊമ്പരമുണർത്തി. തിരുവനന്തപുരം ഗവൺമെന്റ് മോഡൽ ഹയർ സെക്കൻഡറി സ്‌കൂളിലായിരുന്നു വയലിനിലൂടെയും സംഗീതത്തിലൂടെയും മാന്ത്രികം സൃഷ്‌ടിച്ച ബാലഭാസ്കറിന്റെ അഞ്ചാം ക്ലാസ് മുതൽ പത്താം ക്ലാസ് വരെയുള്ള വിദ്യാഭ്യാസം.
നിലക്കാത്ത ആ വയലിൻ നാദത്തെ അനുസ്‌മരിച്ച് സഹപാഠികളും അധ്യാപകരും 2018 സെപ്‌തംബറിൽ അപ്രതീക്ഷിതമായുണ്ടായ അപകടത്തിൽ ബാലുവും കുഞ്ഞും മരിച്ചു. അദ്ദേഹത്തിന്റെ വിയോഗത്തിൽ ഓർമകൾ പുതുക്കുകയാണ് അന്നത്തെ അധ്യാപകരും അദ്ദേഹത്തിന്റെ സഹപാഠികളും. മോഡൽ സ്കൂളിൽ സംഘടിപ്പിച്ച ചടങ്ങിൽ പ്രമുഖർ ബാലഭാസ്കറിനെ അനുസ്മരിച്ചു. നിർമാതാവ് സുരേഷ് കുമാർ, ഗായകൻ കാവാലം ശ്രീകുമാർ തുടങ്ങിയവരും ഓർമകൾ പങ്കുവച്ചു. അതുല്യ കലാകാരന് ആദരവ് അർപ്പിച്ച് സ്കൂളിലെ വിദ്യാർഥികളുടെ സംഗീതാർച്ചനയും നടന്നു. ഒപ്പം ബാലുവിന്റെ സംഗീത പ്രകടനങ്ങൾ വേദിയിൽ പ്രദർശിപ്പിച്ചപ്പോൾ പലർക്കും കരച്ചിലടക്കാനുമായില്ല.
