ബാലനടനായി മികച്ച പ്രകടനം കാഴ്ച വെച്ച് ദേശീയ പുരസ്കാരം അടക്കം സ്വന്തമാക്കിയ നടനാണ് കാളിദാസ് ജയറാം. ഇപ്പോള്‍ മികവാര്‍ന്ന പ്രകടനവുമായി പാവ കഥൈകള്‍ എന്ന ആന്തോളജിയിലൂടെ തന്നിലെ നടന്‍റെ വ്യാപ്തി തെളിയിക്കാനൊരുങ്ങുകയാണ് താരം. പാവ കഥൈകളിലെ തങ്കം എന്ന ചിത്രത്തിലാണ് ഒരു സുപ്രധാന വേഷത്തില്‍ കാളിദാസ് എത്തുന്നത്. സുധ കൊങരയാണ് തങ്കം സംവിധാനം ചെയ്‌തിരിക്കുന്നത്. ശന്തനു ഭാഗ്യരാജാണ് തങ്കത്തില്‍ മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. ഇതുവരെ കണ്ടിട്ടില്ലാത്ത വേഷപകര്‍ച്ചയാണ് കാളിദാസ് ചിത്രത്തില്‍ നടത്തിയിരിക്കുന്നത്. ഇപ്പോള്‍ പുറത്തിറങ്ങിയ ടീസറും ഏറെ പ്രതീക്ഷ നല്‍കുന്നതാണ്.
തമിഴില്‍ ഒരുങ്ങുന്ന ആന്തോളജി പാവ കഥൈകളുടെ ട്രെയിലര്‍ നേരത്തെ പുറത്തിറങ്ങിയിരുന്നു. ബഹുമാനം, സ്‌നേഹം, പാപം, അഭിമാനം എന്നിവയാണ് ആന്തോളജിയില്‍ അടങ്ങിയിരിക്കുന്ന നാല് കൊച്ചുസിനിമകളുടെ പ്രമേയം. ചിത്രത്തിൽ കാളിദാസ് ജയറാം, സായ് പല്ലവി, പ്രകാശ് രാജ്, സിമ്രാൻ, അഞ്ജലി, ഗൗതം മേനോൻ, കല്‍ക്കി കോച്ച്ലില്‍ എന്നിങ്ങനെ വലിയ താര നിര അഭിനയിച്ചിട്ടുണ്ട്. താരങ്ങളുടെ അമ്പരപ്പിക്കുന്ന പ്രകടനമാണ് ട്രെയിലറിനെ പ്രേക്ഷകര്‍ക്കിടയില്‍ ശ്രദ്ധേയമാക്കിയത്.
- " class="align-text-top noRightClick twitterSection" data="">
സുധ കൊങര, വിഘ്‌നേഷ് ശിവന്‍, ഗൗതം വാസുദേവ് മേനോന്‍, വെട്രിമാരന്‍ എന്നീ നാല് സംവിധായകർ ചേർന്നാണ് ആന്തോളജി ഒരുക്കിയിരിക്കുന്നത്. വ്യക്തികളുടെ സ്വാതന്ത്ര്യത്തെയും തെരഞ്ഞെടുപ്പിനെയും സമൂഹം എങ്ങനെ കാണുന്നുവെന്നതാണ് ആന്തോളജിയുടെ പ്രമേയമെന്ന് നേരത്തെ സംവിധായകര്‍ വ്യക്തമാക്കിയിരുന്നു. ഡിസംബര്‍ 18ന് സിനിമ നെറ്റ്ഫ്ളിക്‌സില്‍ സ്ട്രീം ചെയ്‌ത് തുടങ്ങും.
