ഗന്ധർവ കഥാകാരനും ഭരത സംവിധാനവും. മലയാള സിനിമയുടെ ഏറ്റവും സർഗാത്മകമായ കൂട്ടുകെട്ട്. ആദ്യ സിനിമാ സംവിധാനത്തിനായി സ്വന്തം സമ്പാദ്യത്തിൽ നിന്നും നിർമാതാവിന്‍റെ കുപ്പായം ഭരതൻ എടുത്തണിഞ്ഞപ്പോൾ കാമ്പുള്ള കഥയുമായി പത്മരാജനും ഒപ്പം ചേർന്നു. അരങ്ങേറ്റം അതിഗംഭീരം. "പ്രയാണം" എന്ന ചിത്രം അക്ഷരാർഥത്തില്‍ മലയാള സിനിമയുടെ പുതിയ പ്രയാണം തന്നെയായിരുന്നു. മലയാളിയുടെ ഹൃദയത്തിലേക്കാണ് സംസ്ഥാന പുരസ്‌കാരങ്ങൾക്കൊപ്പം പ്രയാണം യാത്രയായത്.
സ്വപ്‌നങ്ങളും ഭാവങ്ങളും പ്രണയവും ചാലിച്ച് പപ്പേട്ടന്‍റെ തൂലിക പടർന്നു കയറിയപ്പോൾ വർണങ്ങൾ ചാലിച്ച ദൃശ്യങ്ങളുമായി ഭരതൻ ഒപ്പം നിന്നു. കലാമൂല്യത്തിനും വാണിജ്യ വിജയത്തിനും ഒരു പോലെ പ്രാധാന്യം. രതിനിർവേദം, തകര, ലോറി, ഈണം, ഒഴിവുകാലം മികച്ച സംവിധാന- തിരക്കഥാ കൂട്ടുകെട്ടായി ഇരുവരും മാറി. പത്മരാജൻ തിരക്കഥയും ഭരതൻ സംവിധാനവും നിർവഹിച്ച് ആറു സിനിമകൾ പുറത്തിറങ്ങി.
പ്രയാണം
രതിയുടെ ഗൂഢസൗന്ദര്യവും പറയാത്ത കഥകളുമാണ് പത്മരാജൻ പ്രയാണത്തിലെ വാക്കുകളായി സൂക്ഷിച്ചിരുന്നത്. ഭരതൻ ഒരു ചിത്രകാരന്‍റെ മനസ്സിലൂടെ അവയെ കാമറയുടെ കണ്ണുകളിലൂടെ പ്രേക്ഷകനിലേക്ക് പകർന്നു. 1975ൽ റിലീസിനെത്തിയ പ്രയാണത്തിൽ കൊട്ടാരക്കര ശ്രീധരൻ നായർ, മോഹൻ ശർമ, നന്ദിതാ ബോസ്, മാസ്റ്റർ രഘു എന്നിവരാണ് കേന്ദ്ര കഥാപാത്രങ്ങളെ അവതരിപ്പിച്ചത്. എഴുപതുകളിലെ നമ്പൂതിരി സമുദായത്തിലെ അന്ധവിശ്വാസങ്ങളെയും അനാചാരങ്ങളെയും തുറന്നുകാട്ടിയ പ്രയാണം മികച്ച കലാസംവിധായകനുള്ള പുരസ്‌കാരം ഭരതന് സമ്മാനിച്ചു. ചിത്രം തമിഴിലേക്ക് സാവിത്രിയെന്ന പേരിൽ റീമേക്ക് ചെയ്‌തെങ്കിലും പ്രതീക്ഷിച്ച വിജയം കണ്ടില്ല.
രതിനിർവേദം
1978ൽ ഭരതന്‍റെ സംവിധാനത്തിൽ പുറത്തിറങ്ങിയ രതിനിർവേദത്തിന്‍റെ രചനയും പപ്പേട്ടനായിരുന്നു. പത്‌മരാജന്‍റെ ഇതേ പേരിലുള്ള നോവലിൽ നിന്നാണ് അദ്ദേഹം ചലച്ചിത്രരൂപത്തിലേക്ക് കഥ സ്വീകരിച്ചത്. കൗമാരക്കാരനായ അപ്പുവിന് യുവതിയായ രതിയോട് തോന്നുന്ന അനുരാഗം, ജയഭാരതിയിലൂടെയും കൃഷ്‌ണചന്ദ്രനിലൂടെയും ഭരതൻ വിവരിച്ചു. അന്നുവരെ സിനിമയിൽ പ്രയോഗിക്കാത്ത കഥാതന്തുവും അവതരണവുമാണ് ഇരുവരും ധൈര്യത്തോടെ അഭ്രപാളിയിലേക്ക് പകർത്തിയത്. അങ്ങനെ വിപ്ലവം സൃഷ്‌ടിച്ച രതിനിർവേദം അഭിനയമികവിലൂടെയും അവതരണത്തിലെ ഒഴുക്കിലൂടെയും പുതിയ നിർവചനങ്ങൾ എഴുതി. 2011ൽ ഭരതൻ ചിത്രത്തെ ടി.കെ രാജീവ് കുമാർ പുനഃസൃഷ്‌ടിച്ചിരുന്നു. പക്ഷേ തീയേറ്ററില്‍ ചിത്രം പരാജയപ്പെട്ടു.
തകര
പൊതുവേ സംവിധായകർ പറയാതിരുന്ന കഥകളെ അപരിചിതമായ ശൈലിയിലൂടെ അശ്ലീലമില്ലാതെ അവതരിപ്പിക്കുകയായിരുന്നു തകരയിലൂടെ ഭരതനും പത്മരാജനും. മാനസിക വളർച്ച കുറഞ്ഞ തകരയെയും മനോഹരമായ ഫ്രെയിമുകളിലൂടെ സുഭാഷിണിയെയും ഭരതൻ വരച്ചിട്ടു. പ്രതാപ് പോത്തൻ, സുരേഖ, നെടുമുടി വേണു മലയാളം ഇന്നുവരെ കാണാത്ത കഥാവതരണം. തകരയുടെ അഭിനയനിര മികച്ച പ്രകടനം കാഴ്‌ചവെച്ചതും 1979ലെ ചിത്രത്തിന് മുതൽക്കൂട്ടായി. 1992ൽ തകരയെ ആവാരം പൂ എന്ന പേരില്‍ ഭരതൻ തമിഴിലേക്ക് മാറ്റിയെഴുതി.
ലോറി
എവർഗ്രീൻ ക്ലാസിക്കായാണ് മലയാള സിനിമയിൽ ലോറിയുടെ സ്ഥാനം. പ്രതാപ് പോത്തൻ, നിത്യ, അച്ചൻകുഞ്ഞ് തുടങ്ങിയ താരനിരയിലൂടെ റാണിയെന്ന പെൺകുട്ടിയുടെ ദുരവസ്ഥയും വേലനെന്ന സർക്കസുകാരന്‍റെ ക്രൂരതയും പത്മരാജൻ എഴുതി. അത് ഭരതൻ സ്പർശം നിറച്ച് പ്രേക്ഷകരിലെത്തി. 1980ലെ വിജയ ചിത്രം നിരൂപക പ്രശംസയും നേടിയിട്ടുണ്ട്.
ഈണം
വേണു നാഗവള്ളി, ശാന്തി കൃഷ്‌ണ, ഭരത് ഗോപി, അടൂർ ഭാസി എന്നിവർക്ക് പ്രാധാന്യമുള്ള വേഷങ്ങൾ നൽകി പത്മരാജൻ ഈണം രചിച്ചു. 1983ൽ ഭരതൻ സംവിധാനം ചെയ്‌ത ചിത്രത്തിന് പിന്നെയുമുണ്ട് എടുത്തുപറയേണ്ട പ്രത്യേകതകൾ. ഔസേപ്പച്ചൻ പശ്ചാത്തല സംഗീതമൊരുക്കിയ ഈണത്തിലെ ഈണങ്ങൾ സംവിധായകൻ ഭരതന്‍റേത് തന്നെയാണ്. ചിത്രത്തിലെ ഗാനങ്ങൾക്ക് സംഗീതമൊരുക്കുക മാത്രമല്ല ഭരതൻ ചെയ്‌തത്, "മാലേയ ലേപനം" എന്ന ഗാനത്തിന്‍റെ വരികളും അദ്ദേഹം എഴുതി.
ഒഴിവുകാലം
തന്‍റെ സിനിമകളിൽ പൂർണത വേണമെന്ന് ശാഠ്യം പിടിക്കുന്ന ഭരതന്‍റെ മറ്റൊരു മാസ്റ്റർപീസാണ് ഒഴിവുകാലം. പ്രേംനസീർ, ശ്രീവിദ്യ, രോഹിണി എന്നിവർ അഭിനയിച്ച മലയാള ചലച്ചിത്രം 1985ൽ പ്രദർശനത്തിനെത്തി. കൗമാരക്കാരിയായ മകളുടെയും മുൻ കാമുകന്‍റെയും ഇടയിൽപെട്ട വിധവയായ സ്‌ത്രീയുടെ അനുഭവമാണ് ഒഴിവുകാലത്തിനായി പത്മരാജൻ ഒരുക്കിയത്. ഭരതനും പത്മരാജനും കൂട്ടുകെട്ട് ആവർത്തിച്ച ചിത്രം ബോക്‌സ് ഓഫീസിൽ വിജയം കണ്ടെത്തുന്നതിൽ പിന്നിലായി.
