പൃഥ്വിരാജ്- നയൻതാര ചിത്രം 'ഗോൾഡ്' തുടങ്ങി. നേരം, പ്രേമം എന്നീ ചിത്രങ്ങളിലൂടെ മലയാളത്തിലും തമിഴിലും പ്രശസ്‌തനായ യുവസംവിധായകൻ അൽഫോൺസ് പുത്രനാണ് ചിത്രം സംവിധാനം ചെയ്യുന്നത്. സിനിമയുടെ ചിത്രീകരണം ആലുവയിൽ ആരംഭിച്ചു. എന്നാൽ, സിനിമയുടെ ഷൂട്ടിങ്ങിലേക്ക് പൃഥ്വിരാജ് എത്തിയിട്ടില്ല. സെപ്‌തംബർ നാലാം വാരം മുതലായിരിക്കും താരം സിനിമയുടെ ഭാഗമാകുന്നത്.
അൽഫോൺസ് പുത്രന്‍റെ തിരക്കഥ ഇഷ്‌ടപ്പെട്ട് ഷൂട്ടിങ് സമയം നിശ്ചയിക്കാൻ പൃഥ്വിരാജ് സംവിധായകനോട് പറയുകയായിരുന്നു എന്നാണ് റിപ്പോർട്ടുകൾ. ഇതേ തുടർന്ന് സിനിമയുടെ പ്രഖ്യാപനത്തിന് ദിവസങ്ങൾക്കുള്ളിൽ തന്നെ നിർമാണവും ആരംഭിച്ചു.
More Read: അൽഫോണ്‍സ് പുത്രന്‍റെ 'ഗോൾഡ്' ; പൃഥ്വിരാജും നയൻതാരയും ലീഡ് റോളിൽ
മലയാളിയായ തെന്നിന്ത്യൻ താരം അജ്‌മൽ അമീറും ഗോൾഡ് എന്ന ചിത്രത്തിൽ നിർണായക കഥാപാത്രമാകുന്നുണ്ട്. നെട്രിക്കണ്ണിന് ശേഷം നയൻതാരയും അജ്‌മലും വീണ്ടും ഒരുമിച്ച് അഭിനയിക്കുന്ന ചിത്രം കൂടിയാണിത്. പൃഥ്വിരാജ് പ്രൊഡക്ഷൻസും മാജിക് ഫ്രെയിംസും ചേർന്നാണ് ഗോൾഡ് എന്ന ചിത്രം നിർമിക്കുന്നത്.
ഇക്കഴിഞ്ഞ തിങ്കളാഴ്‌ചയായിരുന്നു 44 ദിവസത്തെ ഷൂട്ടിങ് പൂർത്തിയാക്കി പൃഥ്വിരാജ് സംവിധാനം ചെയ്‌ത മോഹൻലാൽ ചിത്രം ബ്രോ ഡാഡിയുടെ പാക്ക് അപ്പ് കഴിഞ്ഞത്.
