Aaraattu on amazon prime: മോഹന്‍ലാലിനെ നായകനാക്കി ബി.ഉണ്ണികൃഷ്‌ണന്‍ സംവിധാനം ചെയ്‌ത മാസ്‌ ചിത്രം 'ആറാട്ട്' ആമസോണ്‍ പ്രൈമിലും. മാര്‍ച്ച്‌ 20 മുതല്‍ 'ആറാട്ട്' ആമസോണ്‍ പ്രൈമില്‍ സ്‌ട്രീമിങ്‌ ആരംഭിച്ചു. തിയേറ്ററുകളിലെത്തി 31ാം ദിനമാണ് ചിത്രം ആമസോണ്‍ പ്രൈമിലെത്തുന്നത്‌. ഫെബ്രുവരി 18നാണ്‌ 'ആറാട്ട്' തിയേറ്ററുകളിലെത്തിയത്‌.
Aaraattu screening : ആദ്യ ദിനം തന്നെ റെക്കോര്‍ഡ്‌ കളക്ഷന്‍ നേടിയ ചിത്രത്തിന് സമ്മിശ്ര പ്രതികരണമാണ് ലഭിച്ചത്‌. ഈ വര്‍ഷത്തെ മികച്ച ഓപ്പണിംഗ്‌ നേടിയ ചിത്രമെന്നും റിപ്പോര്‍ട്ടുകളുണ്ടായിരുന്നു. കേരളത്തില്‍ മാത്രം 522 സ്‌ക്രീനുകളിലെത്തിയ ചിത്രം ലോകമെമ്പാടും 2700 സ്‌ക്രീനുകളിലാണ് ആദ്യ ദിനം പ്രദര്‍ശനത്തിനെത്തിയത്‌. 17.80 കോടിയാണ്‌ 'ആറാട്ടി'ന്‍റെ ആദ്യ മൂന്ന്‌ ദിന ആഗോള കലക്ഷന്‍.
Mohanlal's mass look in Aaraattu: ഒരിടവേളയ്‌ക്ക്‌ ശേഷം മോഹന്‍ലാല്‍ മാസ്‌ ലുക്കിലെത്തിയ ചിത്രമായിരുന്നു ആറാട്ട്. സിനിമാസ്വാദകരും ആരാധകരും റിലീസ്‌ ആഘോഷമാക്കി മാറ്റിയിരുന്നു. കോമഡിക്കൊപ്പം ആക്ഷനും പ്രാധാന്യം നല്‍കി ഒരുക്കിയിരിക്കുന്ന ചിത്രത്തില്‍ നെയ്യാറ്റിന്‍കര ഗോപന്‍ എന്ന കഥാപാത്രത്തെയാണ് മോഹന്‍ലാല്‍ അവതരിപ്പിക്കുന്നത്‌. നെയ്യാറ്റിന്‍കര സ്വദേശിയായ ഗോപന്‍ ഒരു പ്രത്യേക ലക്ഷ്യത്തോടെ പാലക്കാട്ടെ ഒരു ഗ്രാമത്തില്‍ എത്തുന്നതും തുടര്‍ന്നുള്ള സംഭവ വികാസങ്ങളുമാണ് ചിത്രപശ്ചാത്തലം.
Mohanlal heroine in Aaraattu: ശ്രദ്ധ ശീനാഥാണ് ചിത്രത്തില്‍ മോഹന്‍ലാലിന്‍റെ നായികയായെത്തുന്നത്‌. ഐ.എ.എസ്‌ ഓഫിസറുടെ വേഷമാണ് ചിത്രത്തില്‍ ശ്രദ്ധയ്‌ക്ക്‌. 'കെജിഎഫി'ല്‍ ഗരുഡ എന്ന കഥാപാത്രത്തിലൂടെ ശ്രദ്ധേയമായ രാമചന്ദ്ര രാജുവും 'ആറാട്ടി'ല്‍ സുപ്രധാന വേഷത്തിലെത്തുന്നുണ്ട്‌.
Aaraattu cast and crew: നെടുമുടി വേണു, ഇന്ദ്രന്‍സ്‌, സിദ്ദിഖ്‌, സായികുമാര്‍, വിജയരാഘവന്‍, നന്ദു, ജോണി ആന്‍റണി, കോട്ടയം രമേഷ്‌, കൊച്ചു പ്രേമന്‍, ശിവജി ഗുരുവായൂര്‍, പ്രശാന്ത്‌ അലക്‌സാണ്ടര്‍, നേഹ സക്‌സേന, രചന നാരായണന്‍കുട്ടി, സ്വാസ്വിക, മാളവിക മേനോന്‍, സീത, അശ്വിന്‍, അനൂപ് ഡേവിസ്‌, ലുക്‌മാന്‍, പ്രഭാകര്‍ തുടങ്ങി വന്‍ താരനിരയാണ് ചിത്രത്തില്‍ അണിനിരന്നത്‌.
ഉദയകൃഷ്‌ണ ആണ് രചന നിര്‍വഹിച്ചിരിക്കുന്നത്‌. 'പുലിമുരുക'ന് ശേഷം ഉദയകൃഷ്‌ണയും മോഹന്‍ലാലും ഒന്നിച്ച ചിത്രം കൂടിയാണിത്‌. വിജയ്‌ ഉലകനാഥ്‌ ഛായാഗ്രഹണവും ജോസഫ്‌ നെല്ലിക്കല്‍ കലാസംവിധാനവും നിര്‍വഹിക്കുന്നു. രാഹുല്‍ രാജ്‌ ആണ് സംഗീതം. സ്‌റ്റെഫി സേവ്യര്‍ ആണ് വസ്‌ത്രാലങ്കാരം. ആര്‍.ഡി ഇല്യൂമിനേഷന്‍സ്‌ ഇന്‍ അസോസിയേറ്റഡ്‌ വിത്ത്‌ ഹിപ്പോ പ്രൈം പിക്‌ച്ചേഴ്‌സും എം.പി.എം.ഗ്രൂപ്പും ചേര്‍ന്നാണ് ചിത്രത്തിന്‍റെ നിര്‍മാണം നിര്‍വഹിച്ചത്‌.
Also Read: 'യശോദ'യിലെ ആക്ഷന്‍ പഠിക്കാൻ ഹോളിവുഡ്‌ സ്‌റ്റണ്ട്‌ മാസ്‌റ്റര്‍ക്കൊപ്പം സാമന്ത
