Aaraattu stream on Amazon prime video: മോഹന്‍ലാലിനെ നായകനാക്കി ബി.ഉണ്ണികൃഷ്‌ണന്‍ സംവിധാനം ചെയ്‌ത മാസ്‌ ചിത്രം 'ആറാട്ട്‌' ഇനി ആമസോണ്‍ പ്രൈമില്‍. വിഷുവിനോടനുബന്ധിച്ച്‌ 'ആറാട്ട്‌' ആമസോണ്‍ പ്രൈമില്‍ റിലീസ്‌ ചെയ്യുമെന്നാണ് റിപ്പോര്‍ട്ടുകള്‍.
B Unnikrishnan about Aaraattu OTT release: സംവിധായകന്‍ ബി.ഉണ്ണികൃഷ്‌ണന്‍ ആണ് ഇക്കാര്യം അറിയിച്ചിരിക്കുന്നത്‌. ഒരു സ്വകാര്യ ചാനലിന്‌ നല്‍കിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയിരിക്കുന്നത്‌. മാര്‍ച്ച്‌ ആദ്യവാരം 'ആറാട്ടി'ന്‍റെ ഒടിടി റിലീസ്‌ ഉണ്ടാകുമെന്ന രീതിയില്‍ നടക്കുന്ന വ്യാജ വാര്‍ത്തകള്‍ നിഷേധിച്ചു കൊണ്ടാണ് സംവിധായകന്‍ ഇക്കാര്യത്തില്‍ വ്യക്തത വരുത്തിയിരിക്കുന്നത്‌.
Aaraattu screening: ഫെബ്രുവരി 18നാണ് 'ആറാട്ട്‌' തിയേറ്ററുകളിലെത്തിയത്‌. ആദ്യ ദിനം തന്നെ റെക്കോര്‍ഡ്‌ കളക്ഷന്‍ നേടിയ ചിത്രത്തിന് സമ്മിശ്ര പ്രതികരണമാണ് ലഭിച്ചുകൊണ്ടിരിക്കുന്നത്‌. ഈ വര്‍ഷത്തെ മികച്ച ഓപ്പണിംഗ്‌ നേടിയ ചിത്രം എന്നും റിപ്പോര്‍ട്ടുകളുണ്ട്‌. കേരളത്തില്‍ മാത്രം 522 സ്‌ക്രീനുകളിലെത്തിയ ചിത്രം ലോകമെമ്പാടും 2700 സ്‌ക്രീനുകളിലാണ് ആദ്യ ദിനം പ്രദര്‍ശനത്തിനെത്തിയത്‌.
Mohanlal's mass look in Aaraattu:ഒരിടവേളയ്‌ക്ക്‌ ശേഷം മോഹന്‍ലാല്‍ മാസ്‌ ലുക്കിലെത്തിയ ചിത്രമെന്ന പ്രത്യേകതയോടു കൂടിയാണ് 'ആറാട്ട്‌' തിയേറ്ററുകളിലെത്തിയത്‌. കാത്തിരിപ്പിനൊടുവില്‍ ചിത്രം തിയേറ്ററുകളില്‍ എത്തിയപ്പോള്‍ 'ആറാട്ടി'ന്‍റെ റിലീസ്‌ ആഘോഷമാക്കി മാറ്റിയിരുന്നു സിനിമാസ്വാദകരും ആരാധകരും.
കോമഡിക്കൊപ്പം ആക്ഷനും പ്രാധാന്യം നല്‍കി ഒരുക്കിയിരിക്കുന്ന ചിത്രത്തില്‍ നെയ്യാറ്റിന്‍കര ഗോപന്‍ എന്ന കഥാപാത്രത്തെയാണ് മോഹന്‍ലാല്‍ അവതരിപ്പിക്കുന്നത്‌. നെയ്യാറ്റിന്‍കര സ്വദേശിയായ ഗോപന്‍ ഒരു പ്രത്യേക ലക്ഷ്യത്തോടെ പാലക്കാട്ടെ ഒരു ഗ്രാമത്തില്‍ എത്തുന്നതും തുടര്‍ന്നുള്ള സംഭവ വികാസങ്ങളുമാണ് ചിത്രപശ്ചാത്തലം.
Mohanlal heroine in Aaraattu: ശ്രദ്ധ ശീനാഥാണ് ചിത്രത്തില്‍ മോഹന്‍ലാലിന്‍റെ നായികയായെത്തുന്നത്‌. ഐ.എ.എസ്‌ ഓഫിസറുടെ വേഷമാണ് ചിത്രത്തില്‍ ശ്രദ്ധയ്‌ക്ക്‌. 'കെജിഎഫി'ല്‍ ഗരുഡ എന്ന കഥാപാത്രത്തിലൂടെ ശ്രദ്ധേയമായ രാമചന്ദ്ര രാജുവും 'ആറാട്ടി'ല്‍ സുപ്രധാന വേഷത്തിലെത്തുന്നുണ്ട്‌.
Aaraattu cast and crew: നെടുമുടി വേണു, ഇന്ദ്രന്‍സ്‌, സിദ്ദിഖ്‌, സായികുമാര്‍, വിജയരാഘവന്‍, നന്ദു, ജോണി ആന്‍റണി, കോട്ടയം രമേഷ്‌, കൊച്ചു പ്രേമന്‍, ശിവാജി ഗുരുവായൂര്‍, പ്രശാന്ത്‌ അലക്‌സാണ്ടര്‍, നേഹ സക്‌സീന, രചന നാരായണന്‍കുട്ടി, സ്വാസ്വിക, മാളവിക മേനോന്‍, സീത, അശ്വിന്‍, അനൂപ് ഡേവിസ്‌, ലുക്‌മാന്‍, പ്രഭാകര്‍ തുടങ്ങീ വന്‍ താരനിരയാണ് ചിത്രത്തില്‍ അണിനിരന്നത്‌.
'ആറാട്ടി'ന്‍റെ രചന നിര്‍വഹിച്ചതും സംവിധായകന്‍ ബി.ഉണ്ണികൃഷ്‌ണനാണ്. ഉദയകൃഷ്‌ണ ആണ് തിരക്കഥ. 'പുലിമുരുക'ന് ശേഷം ഉദയകൃഷ്‌ണയും മോഹന്‍ലാലും ഒന്നിക്കുന്ന ചിത്രം കൂടിയാണിത്‌. വിജയ്‌ ഉലകനാഥ്‌ ഛായാഗ്രഹണവും ജോസഫ്‌ നെല്ലിക്കല്‍ കലാസംവിധാനവും നിര്‍വഹിക്കുന്നു. രാഹുല്‍ രാജ്‌ ആണ് സംഗീതം. സ്‌റ്റെഫി സേവ്യര്‍ ആണ് വസ്‌ത്രാലങ്കാരം. ആര്‍.ഡി ഇല്ലുമിനേഷന്‍സ്‌ ഇന്‍ അസോസിയോറ്റഡ്‌ വിത്ത്‌ ഹിപ്പോ പ്രൈം പിക്‌ച്ചേഴ്‌സും എം.പി.എം.ഗ്രൂപ്പും ചേര്‍ന്നാണ് ചിത്രത്തിന്‍റെ നിര്‍മാണം നിര്‍വഹിച്ചത്‌.
Also Read: 'ശാകുന്തള'ത്തിലെ ശകുന്തള... ഒരു മാലാഖയെ പോലെ സാമന്ത
