പുത്തൻ കഥാപ്രമേയങ്ങളും അവതരണവും 2019ലെ മലയാളസിനിമയിൽ പ്രകടമായിരുന്നു. അതിനാൽ തന്നെ പതിവുകളെ തെറ്റിച്ച് പുതിയ പരീക്ഷണങ്ങളുമായെത്തിയ മലയാളം ഫീച്ചർ സിനിമകൾ അന്താരാഷ്ട്ര ചലച്ചിത്രമേളയിലും തിളങ്ങി. മലയാളം, ഹിന്ദി ഭാഷകളിലായി ടൊറന്‍റോ രാജ്യാന്തര ചലച്ചിത്ര മേളയിലും 21-ാമത് ജിയോ മാമി ഫെസ്റ്റിവലിലും നിവിൻ പോളിയുടെ കരിയർ ബസ്റ്റെന്ന് കൂടി പറയാവുന്ന 'മൂത്തോൻ' പ്രദർശിപ്പിച്ചിരുന്നു. ഗീതു മോഹൻദാസിന്‍റെ സംവിധാനമികവ് പ്രതിഫലിച്ച ചിത്രം ജിയോ മാമി ഫിലിം ഫെസ്റ്റിവൽ എന്നറിയപ്പെടുന്ന മുംബൈ ചലച്ചിത്രമേളയുടെ ഉദ്ഘാടനചിത്രമായാണ് തെരഞ്ഞെടുത്തത്.
മലയാളം, ഹിന്ദി ഭാഷകളിലായി ടൊറന്‍റോ രാജ്യാന്തര ചലച്ചിത്ര മേളയിൽ 'മൂത്തോൻ' പ്രദർശിപ്പിച്ചു. ലിജോ ജോസ് പെല്ലിശ്ശേരിയുടെ 'ജല്ലിക്കെട്ട്' ഐഎഫ്‌എഫ്‌ഐയിലും ഐഎഫ്‌എഫ്‌കെയിലും ടോറന്‍റോ ഫിലിം ഫെസ്റ്റിവലിലും പ്രദർശിപ്പിച്ചു. ഓഗസ്റ്റ് 28മുതൽ സെപ്‌തംബർ 9വരെ നടന്ന വെനീസ് ഫിലിം ഫെസ്റ്റിവലിലും മലയാളത്തിന്‍റെ കയ്യൊപ്പുണ്ടായിരുന്നു. സനല്‍കുമാര്‍ ശശിധരന്‍ സംവിധാനം ചെയ്‌ത 'ചോല' വെനീസ് ചലച്ചിത്രമേളയിൽ പ്രദർശിപ്പിക്കുകയും മികച്ച പ്രതികരണം നേടുകയും ചെയ്‌തു. എന്നാൽ, ഇത് ഐഎഫ്‌എഫ്‌കെയിലെ പ്രദർശനലിസ്റ്റിൽ നിന്നും പിന്‍വലിച്ചിരുന്നു.
'ചോല'ക്ക് വെനീസ് ചലച്ചിത്രമേളയിൽ മികച്ച പ്രതികരണം ലഭിച്ചു. സെപ്റ്റംബറിൽ ബോസ്റ്റണിൽ നടന്ന ഇന്ത്യൻ ഇന്‍റർനാഷണൽ ഫിലിം ഫെസ്റ്റിവലിൽ പാർവ്വതി തിരുവോത്ത് അവിസ്‌മരണീയമാക്കിയ 'ഉയരെ' ചിത്രം പ്രദർശിപ്പിച്ചിരുന്നു. ആസിഡ് ആക്രമണത്തിന് ഇരയാകുന്ന പെൺകുട്ടിയുടെ കഥയാണ് മനു അശോകൻ സംവിധാനം ചെയ്‌ത മലയാള ചിത്രം അവതരിപ്പിച്ചത്. വാഷിംഗ്‌ടൺ ഡിസി സൗത്ത് ഏഷ്യൻ ഫിലിം ഫെസ്റ്റിവലിലും ഉയരെ ഭാഗമായി.
പാർവ്വതി തിരുവോത്ത് മുഖ്യവേഷത്തിലെത്തിയ ഉയരെ ചലച്ചിത്രമേളകളിലും തെരഞ്ഞെടുക്കപ്പെട്ടു. കുമ്പളങ്ങി നൈറ്റ്സ് തിയേറ്ററുകളിലും ചലച്ചിത്രമേളയിലും പ്രശംസ നേടി. ഉണ്ട ഈ വർഷത്തെ മികച്ച സിനിമകളിലൊന്നാണ്. 
