വര്‍ഷങ്ങള്‍ക്ക് ശേഷം ആക്ഷന്‍ സ്റ്റാര്‍ ബാബു ആന്‍റണി നായക വേഷത്തിലെത്തുന്ന ഒമര്‍ ലുലു ചിത്രം പവര്‍സ്റ്റാറിന്‍റെ അണിയറപ്രവര്‍ത്തനങ്ങള്‍ പുരോഗമിക്കുകയാണ്. വെര്‍ച്വല്‍ പ്രൊഡക്ഷന്‍സിന്‍റെ ബാനറില്‍ രതീഷ്‌ ആനേടത്താണ് പവര്‍സ്റ്റാര്‍ നിര്‍മിക്കുന്നത്. ബഹുഭാഷാ ചിത്രമായ പവര്‍സ്റ്റാറിന് സംഗീതം ഒരുക്കുന്നത് പാന്‍ ഇന്ത്യന്‍ സിനിമയായ ബ്രഹ്മാണ്ഡചിത്രം കെജിഎഫിന്‍റെ സംഗീത സംവിധായകന്‍ രവി ഭാസുറാണെന്ന് അറിയിച്ചിരിക്കുകയാണ് ഒമര്‍ ലുലു. കെജിഎഫിലൂടെയാണ് സംഗീത സംവിധായകനായ രവി ഭാസുര്‍ ഇന്ത്യയൊട്ടാകെ ശ്രദ്ധനേടുന്നത്. കെജിഎഫ് രണ്ടാം ഭാഗവുമായി ബന്ധപ്പെട്ട ജോലികള്‍ പൂര്‍ത്തീകരിച്ചശേഷമാണ് അദ്ദേഹം പവര്‍ സ്റ്റാര്‍ ടീമിനൊപ്പം ചേര്‍ന്നിരിക്കുന്നത്.
- " class="align-text-top noRightClick twitterSection" data="
">
ഡെന്നിസ് ജോസഫാണ് പവര്‍സ്റ്റാറിന്‍റെ തിരക്കഥ ഒരുക്കിയിരിക്കുന്നത്. ഒമര്‍ ലുലുവിന്‍റെ ആദ്യ ആക്ഷന്‍ മാസ് ചിത്രം കൂടിയായിരിക്കും ഇത്. പവര്‍ സ്റ്റാറില്‍ ഹോളിവുഡ് സൂപ്പര്‍ താരം ലൂയിസ് മാന്‍റിലോര്‍, അമേരിക്കന്‍ ബോക്‌സിങ് ഇതിഹാസം റോബര്‍ട്ട് പര്‍ഹാം എന്നിവരും അഭിനയിക്കുന്നുണ്ട്. കന്നഡ യുവതാരം ശ്രേയസ് മാഞ്ചുവും ചിത്രത്തിന്‍റെ ഭാഗമാകും. ബാബുരാജ്, റിയാസ് ഖാന്‍, അബു സലീം എന്നിവരാണ് മറ്റ് അഭിനേതാക്കള്‍. കേരളത്തിനകത്തും രാജ്യത്തിന്‍റെ മറ്റ് ഭാഗങ്ങളിലുമായി ചിത്രത്തിന്‍റെ ഷൂട്ടിങ് ഉടന്‍ ആരംഭിക്കും.
