കൊല്ലം: നടന്‍ ശ്രീനിവാസനെതിരെ കേസെടുത്ത് വനിതാ കമ്മിഷന്‍. ഒരു സ്വകാര്യ ചാനലിന് നല്‍കിയ അഭിമുഖത്തില്‍ അങ്കണവാടി ടീച്ചര്‍മാര്‍ക്കെതിരെ മോശം പരാമര്‍ശം നടത്തിയതിലാണ് കേസെടുത്തത്. ശ്രീനിവാസന്‍റേത് അപക്വവും അപലപനീയവുമായ പരാമർശമെന്ന് കമ്മിഷൻ വിലയിരുത്തി. ശ്രീനിവാസൻ നടത്തിയ പരാമർശം പിൻവലിക്കണമെന്നും സ്ത്രീകൾക്കെതിരെ നടത്തിയ പരാമർശത്തിന്‍റെ പേരിലാണ് കേസെടുത്തതെന്നും കമ്മിഷന്‍ അംഗം ഷാഹിദാ കമാൽ പറഞ്ഞു. വിദേശരാജ്യങ്ങളിൽ വിദഗ്‌ദരാണ് കുട്ടികളെ പഠിപ്പിക്കുന്നതെന്നും ഇവിടെ ഒരു വിദ്യാഭ്യാസവും ഇല്ലാത്ത ആളുകളാണ് അങ്കണവാടികളിൽ പഠിപ്പിക്കുന്നതെന്നുമായിരുന്നു സ്വകാര്യ ചാനലിന് നൽകിയ അഭിമുഖത്തിൽ ശ്രീനിവാസന്‍റെ പരാമർശം.
നടന്‍ ശ്രീനിവാസനെതിരെ വനിതാ കമ്മിഷന്‍ കേസെടുത്തു
