മിസ്റ്ററി ത്രില്ലർ 'ഇരുൾ'; ഫഹദ് ഫാസിൽ ചിത്രത്തിന്‍റെ ട്രെയിലർ പുറത്തിറങ്ങി

ഫഹദ് ഫാസിൽ, സൗബിൻ ഷാഹിർ, ദർശന രാജേന്ദ്രൻ എന്നിവർ കേന്ദ്രകഥാപാത്രങ്ങളാകുന്ന ഇരുൾ സിനിമയുടെ ട്രെയിലർ പുറത്തിറങ്ങി. ഏപ്രിൽ രണ്ടിന് ചിത്രം ഒടിടി റിലീസായി പുറത്തിറങ്ങും.

"വർഷങ്ങൾക്ക് മുമ്പ് നടന്ന കൊലപാതകത്തെ അടിസ്ഥാനമാക്കിയാണ് താങ്കളാ കൃതി എഴുതിയത്....

ആറല്ല, അഞ്ച് കൊലപാതകങ്ങൾ... കാരണം പക... സ്‌ത്രീകളോട്," നിഗൂഢതയും സസ്‌പെൻസും ത്രില്ലറും ഇരുളിൽ കലർത്തി ഒരുക്കിയ ട്രെയിലർ. ഫഹദ് ഫാസിൽ, സൗബിൻ ഷാഹിർ, ദർശന രാജേന്ദ്രൻ എന്നിവർ കേന്ദ്രകഥാപാത്രങ്ങളാകുന്ന 'ഇരുൾ' ചിത്രത്തിന്‍റെ ട്രെയിലർ പുറത്തിറങ്ങി. സി യൂ സൂൺ സിനിമയിലെ താരങ്ങളായ ഫഹദ് ഫാസിലും ദർശനയും വീണ്ടും ഇരുളിലൂടെ ഒരുമിക്കുകയാണ്. ഫഹദിനെയും സൗബിനെയും ദർശനയെയും മാത്രമാണ് മിസ്റ്ററി ത്രില്ലർ ചിത്രത്തിന്‍റെ ട്രെയിലറിലും കാണിക്കുന്നത്. അതിനാൽ, ചിത്രം മൂന്ന് കഥാപാത്രങ്ങളിലൂടെ മാത്രം കഥ പറയുന്നുവെന്ന സൂചനയാണ് ട്രെയിലർ തരുന്നത്.

• " class="align-text-top noRightClick twitterSection" data="">

നവാഗതനായ നസീഫ് യൂസഫ് ഇസുദ്ധീനാണ് ഇരുളിന്‍റെ സംവിധായകൻ. സുനിൽ യാദവ് ചിത്രത്തിന്‍റെ കഥ, തിരക്കഥ, സംഭാഷണം എന്നിവ ഒരുക്കുന്നു. അഭിരാം രാധാകൃഷ്‌ണനും സിനിമയുടെ തിരക്കഥയിലും സംഭാഷണത്തിലും പങ്കാളിയാകുന്നു. ജോമോൻ ടി. ജോൺ ഛായാഗ്രഹണം നിർവഹിക്കുന്ന ഇരുളിന്‍റെ എഡിറ്റർ ചാർലി, തണ്ണീർ മത്തൻ ദിനങ്ങൾ ചിത്രങ്ങളിലൂടെ സുപരിചിതനായ ഷമീർ മുഹമ്മദാണ്. ശ്രീരാഗ് സജി സംഗീതം ഒരുക്കുന്നു. ആന്‍റോ ജോസഫ്, ജോമോൻ ടി. ജോൺ, ഷമീർ മുഹമ്മദ് എന്നിവർ ചേർന്നാണ് ചിത്രം നിർമിക്കുന്നത്. ഏപ്രിൽ രണ്ടിന് നെറ്റ്ഫ്ലിക്സിലൂടെ ഇരുൾ റിലീസ് ചെയ്യും.