നീണ്ട ഇടവേളയ്ക്ക്ശേഷം ദുല്‍ഖര്‍ സല്‍മാന്‍ മലയാള സിനിമയിലേക്ക് തിരിച്ചെത്തുന്ന ചിത്രം 'ഒരു യമണ്ടന്‍ പ്രേമകഥ'യുടെ ഫസ്റ്റ്ലുക്ക് പോസ്റ്റര്‍ പുറത്തുവിട്ടു. ദുൽഖറിനൊപ്പം സൗബിൻ ഷാഹിർ, സലിംകുമാർ, വിഷ്ണു ഉണ്ണികൃഷ്ണൻ എന്നിവരടങ്ങുന്ന വർണ്ണാഭമായ ആദ്യലുക്കാണ് അണിയപ്രവർത്തകർ പുറത്തുവിട്ടിരിക്കുന്നത്. ഏപ്രിൽ 25നാണ് ചിത്രത്തിൻ്റെറിലീസ് തിയതി പ്രഖ്യാപിച്ചിരിക്കുന്നത്.
നവാഗതനായ ബിസി നൗഫലാണ് ചിത്രം സംവിധാനം ചെയ്യുന്നത്. അമര്‍ അക്ബര്‍ അന്തോണി, കട്ടപ്പനയിലെ ഹൃത്വിക് റോഷന്‍ എന്നീ ചിത്രങ്ങൾക്ക് ശേഷം വിഷ്ണു ഉണ്ണികൃഷ്ണനും ബിബിൻ ജോർജും ചേര്‍ന്നാണ് യമണ്ടന്‍ പ്രേമകഥയ്ക്ക് തിരക്കഥ ഒരുക്കിയിരിക്കുന്നത്.
ചിത്രത്തില്‍ സലിം കുമാര്‍, സുരാജ് വെഞ്ഞാറമ്മൂട്, ഹരീഷ് കണാരന്‍, സൗബിന്‍ ഷാഹിര്‍, ധര്‍മ്മജന്‍, വിഷ്ണു ഉണ്ണികൃഷ്ണന്‍ തുടങ്ങി മലയാളത്തിലെ ഒട്ടുമിക്ക ഹാസ്യതാരങ്ങളും വേഷമിടുന്നുണ്ട്. സംയുക്ത മേനോനും നിഖില വിമലുമാണ് ചിത്രത്തില്‍ നായികമാരായെത്തുന്നത്.
ഫോര്‍ട്ട് കൊച്ചിയും മട്ടാഞ്ചേരിയുമാണ് ചിത്രത്തിൻ്റെപ്രധാന ലൊക്കേഷനുകള്‍. ആൻ്റോജോസഫ് നിര്‍മ്മിക്കുന്ന ചിത്രത്തിന് നാദിര്‍ഷ സംഗീതം നല്‍കുന്നു. പി. സുകുമാറാണ് ഛായാഗ്രാഹകന്‍. ചിത്രത്തിൻ്റെഅവസാന ഷെഡ്യൂൾ പുരോഗമിക്കുകയാണ്.
