യൂ ട്യൂബ് വ്ളോഗര്‍മാരായ ഇ ബുൾ ജെറ്റ് സഹോദരന്മാരുടെ അറസ്റ്റിനെ അനുകൂലിച്ചും പ്രതികൂലിച്ചും സമൂഹ മാധ്യമങ്ങളിൽ അഭിപ്രായ പ്രകടനങ്ങൾ നടക്കുന്നതിനിടെ സംഭവത്തിൽ വ്യത്യസ്ത കുറിപ്പുമായി ഗായകൻ ഹരീഷ് ശിവരാമകൃഷ്ണൻ.
എല്ലാ നിയമലംഘനവും കാണുമ്പോഴുണ്ടാകാത്ത പ്രത്യേക തരം നിയമ സ്നേഹം കാണുമ്പോൾ പഴയ അമ്മാവൻമാരുടെ യൗവനം നഷ്ടപ്പെട്ടതിന്‍റെ ചൊരുക്ക് ഓർമ വരുന്നു എന്ന് ഹരീഷ് ഫേസ്ബുക്കിൽ കുറിച്ചു.
ഇപ്പോഴത്തെ പല ട്രോളുകളും കാണുമ്പോൾ ചെത്തുപിള്ളേരെ ഒതുക്കാൻ നടക്കുന്ന അമ്മാവൻമാരെ ഓർമ വരുന്നുവെന്ന് ഹരീഷ് പറയുന്നു.
ഇ ബുൾ ജെറ്റ് എന്താണെന്ന് തനിക്ക് അറിയില്ലെന്നും അവർക്ക് പിന്തുണയുമായി ഗായകൻ ഹരീഷ് ശിവരാമൻ എന്ന് ലേഖനം എഴുതരുതെന്നും അദ്ദേഹം അഭ്യര്‍ഥിക്കുന്നുമുണ്ട്. തനിക്ക് സ്വന്തമായി ഒരു കൗ ജെറ്റ് പോലും ഇല്ലെന്നും ഹരീഷ് പറയുന്നു.
ഹരീഷ് ശിവരാമകൃഷ്ണന്‍റെ ഫേസ്ബുക്ക് കുറിപ്പിന്‍റെ പൂർണരൂപം:
മോഡിഫൈഡ് വണ്ടിക്ക് പൊലീസ് ഫൈൻ അടിച്ചു എന്നതാണോ അതോ ആ ഫ്രീക്ക് പിള്ളേർക്ക് ഒരു പണി കിട്ടി എന്നതിലാണോ നമുക്ക് സന്തോഷം എന്ന് മാത്രം മനസിലായില്ല. നിയമം തെറ്റിച്ചാൽ ഫൈൻ കിട്ടും, കിട്ടണം. വണ്ടി തോന്നിയ പോലെ മോഡിഫൈ ചെയ്താൽ മോട്ടോർ വാഹന വകുപ്പ് ഫൈൻ അടിക്കും.
എന്‍റെ കൗതുകം വേറെയാണ്. പലയിടത്തും കൺവെൻഷനിൽ നിന്ന് മാറി സഞ്ചരിച്ചവർക്ക് ഒരു പണി കിട്ടിയതിൽ ഉള്ള ഒരു ക്രൂരമായ സംതൃപ്തി ആണ് പലർക്കും എന്ന് തോന്നിപ്പോവുകയാണ്. എല്ലാ നിയമ ലംഘനവും കാണുമ്പോൾ ഉണ്ടാവാത്ത ഒരു പ്രത്യേക തരം നിയമസ്നേഹം പലയിടത്തും കാണുമ്പോൾ പഴയ ഒരു കാര്യം ഓർമ വന്നതാണ്.
പണ്ട് ഞാൻ സ്കൂളിൽ പഠിക്കുമ്പോ സൈലൻസർ മോഡിഫൈ ചെയ്ത ബുള്ളറ്റ് കാണുമ്പോ പല അമ്മാവന്മാർക്കും 'ഇവനെ പൊലീസിൽ പിടിപ്പിക്കണം...' എന്ന് തോന്നാറുണ്ടായിരുന്നു.
ശബ്ദ മലിനീകരണം ആണ് കാരണം എന്നൊക്കെ അവർ തള്ളാറുണ്ടായിരുന്നെങ്കിലും, യഥാർഥ കാരണം ഈ 'ചെത്തു' പിള്ളേരെ ഒന്നു നിലയ്ക്ക് നിർത്തണം എന്ന യൗവനം നഷ്ടപ്പെട്ടവരുടെ ചൊരുക്ക് ആയിരുന്നു. ഇപ്പോഴത്തെ ഓരോ ട്രോൾ കണ്ടപ്പോൾ ആ അമ്മാവന്മാരെ ഓർമ വന്നു. അത്രേ ഉള്ളൂ.
Also Read: സഹോദരങ്ങളായ വ്ളോഗര്‍മാര്‍ പിടിയില്‍; ചുമത്തിയത് 9 കുറ്റങ്ങള്‍
ഈ ബുൾ ജെറ്റ് എന്താണെന്ന് എനിക്ക് അറീല്ല, ഈ ബുൾ ജെറ്റിന് പിന്തുണയുമായി കവർ ഗായകൻ ഹരീഷ് ശിവരാമൻ എന്ന് ദയവായി ലേഖനം എഴുതരുത്. സ്വന്തമായി ഒരു കൗ ജെറ്റ് പോലും എനിക്ക് ഇല്ല.
Also Read: ETV BHARAT EXCLUSIVE: പൊലീസ് വാഹനത്തില്‍ ആത്മഹത്യ ഭീഷണി മുഴക്കി യു ട്യൂബ് വ്ളോഗർ
