ചെന്നൈ : പ്രശസ്‌ത ചലച്ചിത്ര പിന്നണി ഗായിക കല്യാണി മേനോന് അന്തരിച്ചു. എൺപത് വയസായിരുന്നു. ഹൃദയാഘാതത്തെ തുടർന്ന് ചെന്നൈയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് അന്ത്യം.
മലയാളത്തിലും തമിഴിലുമായി നൂറിലധികം പാട്ടുകള്‍ പാടിയിട്ടുണ്ട്. തമിഴകത്തെ പ്രമുഖ സംവിധായകൻ രാജീവ് മേനോന്‍റെ അമ്മയാണ്. 2018ല്‍ പുറത്തിറങ്ങിയ വിജയ് സേതുപതി ചിത്രം 96ലെ കാതലേ കാതലേ അടക്കം പാടി പുതിയ സിനിമകളിലും സജീവമായിരുന്നു. 76ാം വയസ്സിലാണ് ഈ ഗാനം ആലപിച്ചത്.
പവനരച്ചെഴുതുന്നു...(വിയറ്റ്നാം കോളനി) ജലശയ്യയില്‍ തളിരമ്പിളി...(മൈ മദേഴ്‌സ് ലാപ്ടോപ്പ്) ഋതുഭേദകല്‍പ്പന ചാരുതയേകുന്നു...(മംഗളം നേരുന്നു)നിനക്കും നിലാവില്‍..., (മുല്ലവള്ളിയും തേന്‍മാവും) തുടങ്ങിയവയാണ് പ്രധാന ഗാനങ്ങള്‍.
എറണാകുളം കാരയ്‌ക്കാട്ട് മാറായിൽ ബാലകൃഷ്‌ണ മേനോന്‍റെയും രാജമ്മയുടെയും ഏക മകളാണ്. കലാലയ യുവജനോത്സവത്തിലൂടെ സംഗീതമേഖലയിൽ തുടക്കം കുറിച്ച് 1973ല്‍ തോപ്പില്‍ ഭാസിയുടെ 'അബല'യിലൂടെ സിനിമാരംഗത്തെത്തി.
Also Read: സംഗീതത്തിലെ ലയമാധുര്യം ; ദക്ഷിണാമൂർത്തിയുടെ ഓർമകള്‍ക്ക് എട്ടാണ്ട്
1979ല്‍ ശിവാജി ഗണേശൻ ചിത്രം 'നല്ലതൊരു കുടുംബ'ത്തിലൂടെ തമിഴകത്തും അരങ്ങേറ്റം കുറിച്ചു. അലൈപായുതേ, മുത്തു, കാതലന്‍ തുടങ്ങിയ സിനിമകളിലൂടെ എ.ആര്‍ റഹ്മാനുമായി നിരവധി പാട്ടുകളിൽ ഒരുമിച്ച് പ്രവർത്തിച്ചു. ഏറ്റവുമൊടുവിൽ പാടിയ ഗാനം 96ലേതാണ്.
തമിഴ്‌നാട് സര്‍ക്കാരിന്‍റെ കലൈമാമണി പുരസ്‌കാരമുള്‍പ്പടെ നിരവധി അംഗീകാരങ്ങള്‍ നേടിയിട്ടുണ്ട്.
