'കാണാതിരിക്കുമ്പോൾ എന്നും ഓർക്കുന്നില്ല എന്നതാണ് സത്യം. ഓരോ മുഖം കാണുമ്പോഴും ഓർക്കും മുഖങ്ങളുടെ എണ്ണം ഇങ്ങനെ കൂടിക്കൊണ്ടിരിക്കല്ലേ.. അങ്ങനെ കൂടി കൂടി ഒരു ദിവസം ഇതങ്ങ് മറക്കുമായിരിക്കും അല്ലേ.. പിന്നെ മറക്കാതെ.. പക്ഷേ എനിക്ക് മറക്കണ്ടാ....'
പ്രണയം നനുത്തിറങ്ങുമ്പോൾ മലയാളിയിലേക്ക് മഴ ക്ലാരയായി പെയ്‌തുചൊരിയും... പ്രണയത്തിന് കാലം പുതിയ നിർവചനങ്ങൾ നൽകിയാലും, ഉദകപ്പോളയിൽ നിന്നും മലയാളസിനിമയിലേക്ക് ചേക്കേറിയ 'തൂവാനത്തുമ്പികൾ' മലയാളമുള്ളിടത്തോളം കാലം പ്രണയാർദ്രതയോടെ പറന്നുനടക്കും.
പത്‌മരാജനെ ഇഷ്‌ടപ്പെടുന്നവർ എന്നും ഇഷ്‌ടപ്പെടുന്ന കഥാഗന്ധർവന്‍റെ ആവിഷ്‌കാരം. മലയാളത്തിന്‍റെ കൾട്ട് ക്ലാസിക് ചിത്രം പുറത്തിറങ്ങിയിട്ട് ഇന്നേക്ക് 34 വർഷങ്ങൾ...
'എനിക്കാ ഭ്രാന്തന്‍റെ കാലിലെ മുറിവാകാൻ കൊതിയാകുവാ.. ചങ്ങലയുടെ ഒറ്റക്കണ്ണിയുമായിട്ട് മാത്രം ബന്ധമുള്ള ഉണങ്ങാത്ത ഒരു മുറിവ്...' തീക്ഷ്ണമായ പ്രണയത്തിന്‍റെ ചട്ടക്കൂടിനുള്ളിൽ ബന്ധിക്കപ്പെടാൻ ആഗ്രഹിച്ചിരുന്നവൾ ആയിരുന്നില്ല ക്ലാര... പ്രമാണിയും പിശുക്കനുമെല്ലാമാകുമ്പോഴും സുഹൃത്തുക്കൾക്ക് അയാൾ വളരെ പ്രിയങ്കരൻ.
പെണ്ണിനോട് ഭ്രമം തോന്നാത്ത ജയകൃഷ്ണൻ ക്ലാര എന്ന മഴയിൽ നനഞ്ഞ് അലിഞ്ഞുപോകുന്നു. പിന്നീട് രാധ അയാൾക്കായി ഒരു വസന്തമൊരുക്കുമ്പോൾ താൻ നനഞ്ഞ ആ മഴയെ കുറിച്ച് നിഷ്‌കളങ്കതയോടെ അവളോട് തുറന്നുപറയുന്നു.
ജയകൃഷ്ണനും ക്ലാരയും ഭ്രാന്തമായി പ്രണിയിച്ചുനടക്കുമ്പോഴും, താൻ സ്‌നേഹിക്കുന്നയാൾ മറ്റാരുടേയോ ഇഷ്‌ടങ്ങളുടെ പരിധിക്കുള്ളിലാണെന്ന് അറിഞ്ഞിട്ടും അയാളെ നിഷ്‌കളങ്കമായി സ്‌നേഹിക്കുന്ന രാധയും മലയാളിയുടെ നെഞ്ചോട് ചേർന്നുനിൽക്കുന്ന കഥാപാത്രമാണ്.
കൺമഷി പുരണ്ട കറുത്ത നെടിയ കണ്ണുകളുള്ള രാധ, സ്‌നേഹം പങ്കിട്ടുപോകാൻ ആഗ്രഹിക്കാത്ത, എന്നാൽ ഒരിക്കൽ പോലും ജയകൃഷ്ണനോട് ക്ലാരയെ കാണാൻ പോകരുത് എന്ന് പറയാൻ തുനിയാത്ത പത്മരാജന്‍റെ മറ്റൊരു സങ്കീർണ കഥാപാത്രം.
രാധയില്ലെങ്കിൽ ക്ലാരയുമുണ്ടാകില്ലായിരുന്നു എന്നതിനാൽ തന്നെ തൂവാനത്തുമ്പികളിലെ ഈ മൂന്ന് കഥാപാത്രങ്ങളും പരസ്‌പര പൂരകങ്ങളായി പിണഞ്ഞുകിടക്കുന്നു.
മോഹൻലാലും സുമലതയും പാർവതിയും മുഖ്യകഥാപാത്രങ്ങളായി അഭിനയിച്ച് 1987 ജൂലൈ 31ന് പുറത്തിറങ്ങിയ തൂവാനത്തുമ്പികൾ... സിതാര പിക്‌ചേഴ്‌സിന്‍റെ ബാനറിൽ നിർമിച്ച എവർഗ്രീൻ പ്രണയചിത്രത്തിൽ മഴയുടെ സംഗീതം പെയ്യിച്ചത് ജോൺസൺ മാഷാണ്.
പെരുമ്പാവൂർ ജി. രവീന്ദ്രനാഥ് ഈണം പകർന്ന, ചിത്രത്തിലെ ഗാനങ്ങൾ കെ.ജെ. യേശുദാസും കെ.എസ് ചിത്രയും ജി. വേണുഗോപാലും ചേർന്നാണ് ആലപിച്ചത്.
ഒന്നാം രാഗം പാടി.... മേഘം പൂത്തു തുടങ്ങി.... രാധയുടെയും ക്ലാരയുടെയും പ്രണയം വരികളായി കുറിച്ചത് വിഖ്യാത ഗാനരചയിതാവ് ശ്രീകുമാരൻ തമ്പി.
Also Read: അനുസ്യൂതമൊഴുകുന്ന അതുല്യ സംഗീത ധാര ; റഫിയുടെ ഓർമകൾക്ക് 41 വയസ്‌
പ്രണയം ആരോടും എപ്പോഴും തോന്നാം. രംഗബോധമില്ലാത്ത ഒരു അതിഥിയെ പോലെ മഴയായി അത് മനസിനെ തണുപ്പിക്കുകയും വേർപാടിൽ പേമാരിയായി ഹൃദയത്തെ തകർക്കുകയും ചെയ്യാം. മലയാളിക്ക് ചിര- പരിചിതമല്ലാത്ത പ്രണയസങ്കൽപ്പങ്ങളെയാണ് സ്വതന്ത്രമായി പത്മരാജൻ പകർത്തിവച്ചത്.
കേരളം ഹൃദയം കൊണ്ട് സ്വീകരിച്ച പത്മരാജൻ ചിത്രം ഇന്നും ചർച്ച ചെയ്യപ്പെടുകയും പഠനവിഷയമാകുകയും ചെയ്യുന്നത് അതിന്‍റെ പരമാർഥത്തിൽ അടങ്ങിയിട്ടുള്ള നൂറ്റാണ്ടുകൾ നീണ്ട വീര്യത്താലാണ്.
'എനിക്ക് ഓർമയുണ്ട്. ആദ്യം ഞാൻ അവൾക്ക് കത്തെഴുതുമ്പോൾ മഴ പെയ്‌തിരുന്നു. ആദ്യമായി കണ്ടുമുട്ടുമ്പോഴും മഴ പെയ്‌തിരുന്നു...' ശരിക്കും ജയകൃഷ്‌ണനിലെ ആണിന്‍റെ അഹംഭാവം അലിയിച്ചുകളയുകയായിരുന്നു ഇടയ്‌ക്കിടക്ക് അതിഥിയായെത്തിയ ക്ലാര. വർഷമിനിയും പിന്നിട്ടാലും ഒരു മഴയോട് കൂടിയല്ലാതെ ക്ലാരയെ ഓർക്കുന്നതെങ്ങനെ....
