നിവിന്‍ പോളി ചിത്രം കനകം കാമിനി കലഹം ഇന്ന് അര്‍ദ്ധരാത്രി മുതല്‍. നിവിന്‍ പോളിയെ കേന്ദ്രകഥാപാത്രമാക്കി രതീഷ് ബാലകൃഷ്‌ണ പൊതുവാൾ സംവിധാനം ചെയ്യുന്ന ചിത്രമാണ് 'കനകം കാമിനി കലഹം'. ചിത്രം ഡയറക്‌ട്‌ ഒടിടി റിലീസായി ഡിസ്‌നി പ്ലസ് ഹോട്ട്‌സ്‌റ്റാറിലൂടെ ഇന്ന് പ്രേക്ഷകര്‍ക്ക് മുമ്പിലെത്തും.
ഡിസ്‌നി പ്ലസ് ഹോട്ട്‌സ്‌റ്റാറിലൂടെ റിലീസ് ചെയ്യുന്ന മലയാളത്തിലെ ആദ്യ ചിത്രം കൂടിയാണിത്. വേള്‍ഡ് ഡിസ്‌നി ഡേ ആയ നവംബര്‍ 12നാണ് ചിത്രത്തിന്‍റെ റിലീസ് എന്നതും ശ്രദ്ധേയമാണ്. ഒരിടവേളയ്‌ക്ക് ശേഷം കോമഡി എന്‍റര്‍ടെയ്‌നറായി എത്തുന്ന ചിത്രം കൂടിയാണിത്. ചിത്രത്തിലെ ടീസര്‍ അടുത്തിടെ പുറത്തിറങ്ങിയിരുന്നു. ഏവരെയും പൊട്ടിച്ചിരിപ്പിച്ച ടീസര്‍ ആരാധകര്‍ ഇരുകരങ്ങളും നീട്ടി സ്വീകരിച്ചിരുന്നു.
ഗ്രേസ് ആന്‍റണി ആണ് ചിത്രത്തില്‍ നിവിന്‍റെ നായികയായെത്തുന്നത്. വിനയ് ഫോര്‍ട്ട്, ജോയ്‌ മാത്യു, സുധീഷ്, ജാഫര്‍ ഇടുക്കി, സുധീര്‍ പറവൂര്‍, ശിവദാസന്‍ കണ്ണൂര്‍, രാജേഷ്‌ മാധവന്‍, വിന്‍സി അലോഷ്യസ് എന്നിവരും ചിത്രത്തില്‍ വേഷമിടും.
നിവിന്‍ പോളിയുടെ തന്നെ ബാനറായ പോളി ജൂനിയര്‍ പിക്‌ചേഴ്‌സ് ആണ് നിര്‍മ്മാണം. ആന്‍ഡ്രോയ്‌ഡ്‌ കുഞ്ഞപ്പന്‍ വെര്‍ഷന്‍ 5.25ന് ശേഷം രതീഷ് ബാലകൃഷ്‌ണ പൊതുവാൾ ഒരുക്കുന്ന ചിത്രം കൂടിയാണിത്. വിനോദ് ഇല്ലംപള്ളിയാണ് ഛായാഗ്രഹണം.
യാക്‌സിന്‍ ഗാരി പെരേര, നേഹ നായര്‍ എന്നിവര്‍ ചേര്‍ന്നാണ് സംഗീത സംവിധാനം. മനോജ് കണ്ണോത്ത് എഡിറ്റിംഗും, ശ്രീജിത്ത് ശ്രീനിവാസന്‍ സൗണ്ട് ഡിസൈനും അനീസ് നാടോടി കലാസംവിധാനവും, മെല്‍വി ജെ വസ്‌ത്രാലങ്കാരവും, ഷാബു പുല്‍പ്പള്ളി മേക്കപ്പും നിര്‍വഹിക്കും.
Also Read:' ഒരാളുമായി പ്രണയത്തിലാണ്, 5 വര്‍ഷത്തിനുള്ളില്‍ ഭാര്യയും അമ്മയുമാകും': കങ്കണ റണാവത്ത്
