കാളിദാസ് ജയറാം പഞ്ചാബി സര്‍ദാറിന്‍റെ വേഷത്തിലെത്തുന്ന പുതിയ ചിത്രമാണ് ഹാപ്പി സര്‍ദാര്‍. പഞ്ചാബി സര്‍ദാറും മലയാളി ക്രിസ്റ്റ്യന്‍ പെണ്‍കുട്ടിയും തമ്മിലുളള പ്രണയകഥ പറയുന്ന സിനിമയിലെ അടുത്ത ഗാനവും പുറത്തിറങ്ങി. "ഹേയ് ഹലോ..." എന്ന് തുടങ്ങുന്ന ഗാനമാണ് ഇന്ന് റിലീസ് ചെയ്‌തത്. ഗോപി സുന്ദർ സംഗീതം നൽകിയ ഗാനം ആലപിച്ചിരിക്കുന്നത് നരേഷ് അയ്യറാണ്. വിനായക് ശശികുമാറാണ് ഹേയ് ഹലോ ഗാനത്തിന്‍റെ രചന നിർവഹിച്ചിരിക്കുന്നത്.
പുതുമുഖം മെറിന്‍ ഫിലിപ്പാണ് ഈ റൊമാന്‍റിക് കോമഡി ചിത്രത്തിലെ നായിക. ദമ്പതിമാരായ സുദീപ് ജോഷി, ഗീതി സുദീപ് എന്നിവര്‍ ചേര്‍ന്നാണ് ചിത്രം സംവിധാനം ചെയ്യുന്നത്. ഹസീബ് ഹനീഫ്, ജോഷ്വിൻ ജോയ്, ശ്വേത കാർത്തിക് എന്നിവരുടെ നിർമാണത്തിലൊരുങ്ങുന്ന ചിത്രത്തിന്‍റെ ഛായാഗ്രഹണം ആമേനിലൂടെ പ്രശസ്‌തനായ അഭിനന്ദം രാമാനുജമാണ്. ബോളിവുഡ് താരം ജാവേദ് ജാഫ്രി കാളിദാസിന്‍റെ അച്ഛനായി വേഷമിടുന്നു. കൂടാതെ, സിദ്ദിഖ്, ശ്രീനാഥ് ഭാസി, ബാലു വര്‍ഗീസ്, ശാന്തി കൃഷ്ണ, സുരാജ് വെഞ്ഞാറമൂട്, വിശാഖ് നായര്‍, രമേഷ് പിഷാരടി, ധര്‍മ്മജന്‍, പ്രവീണ, ബൈജു തുടങ്ങിയ വമ്പൻ താരനിരയും ചിത്രത്തിൽ അണിനിരക്കുന്നുണ്ട്. 
