പരിനീതി ചോപ്ര, കൃതി കുല്‍ഹരി, അതിഥി റാവു ഹൈദരി എന്നിവര്‍ കേന്ദ്രകഥാപാത്രങ്ങളാകുന്ന ത്രില്ലര്‍ സിനിമ ദി ഗേള്‍ ഓണ്‍ ദി ട്രെയിനിന്‍റെ ട്രെയിലര്‍ പുറത്തിറങ്ങി. നെറ്റ്‌ഫ്ലിക്‌സ് ചിത്രമായ സിനിമ എഴുതി സംവിധാനം ചെയ്‌തിരിക്കുന്നത് റിഭു ദാസ്‌ഗുപ്തയാണ്. മീര കപൂര്‍ എന്നാണ് പരിനീതി ചോപ്ര അവതരിപ്പിക്കുന്ന കഥാപാത്രത്തിന്‍റെ പേര്. ഒരു പെണ്‍കുട്ടിയുടെ കൊലപാതകവും അതേ തുടര്‍ന്നുള്ള അന്വേഷണവും കേസില്‍ പ്രതി ചേര്‍ക്കപ്പെടുന്ന പരിനീതി ചോപ്രയുടെ കഥാപാത്രമായ മീരയുടെ അതിജീവനവുമെല്ലാമാണ് സിനിമ ചര്‍ച്ച ചെയ്യുന്നത്.
- " class="align-text-top noRightClick twitterSection" data="">
മറവിരോഗം ബാധിച്ച സ്ത്രീയാണ് പരിനീതി അവതരിപ്പിക്കുന്ന കഥാപാത്രം. പൗല ഹോക്കിന്‍സിന്‍റെ ഇതേ പേരിലുള്ള നോവലിനെ അടിസ്ഥാനമാക്കിയാണ് സിനിമ ഒരുക്കിയിരിക്കുന്നത്. നേരത്തെ നോവലിനെ അടിസ്ഥാനമാക്കി ഹോളിവുഡിലും ഒരു സിനിമ ഇറങ്ങിയിരുന്നു. എമിലി ബ്ലണ്ടാണ് സിനിമയില്‍ അന്ന് കേന്ദ്രകഥാപാത്രത്തെ അവതരിപ്പിച്ചത്. ഏറെ സന്തോഷത്തോടെയാണ് ചലഞ്ചിങ്ങായ മീരയുടെ കഥാപാത്രത്തെ അവതരിപ്പിച്ചതെന്നും ഒരു നടിയെന്ന നിലയില്‍ ഇത്തരം വെല്ലുവിളികള്‍ ഏറ്റെടുത്ത് ചെയ്യുന്നതിനെ താന്‍ ഇഷ്ടപ്പെടുന്നുവെന്നും പരിനീതി ചോപ്ര പറഞ്ഞിരുന്നു.
