വാഷിങ്ടണ്‍: ഏറ്റവും ജനപ്രിയമായ ലോങ്-ഫോം വീഡിയോ സ്ട്രീമിങ് പ്ലാറ്റ്‌ഫോമാണ് യൂട്യൂബ് (YouTube). ഇന്ന് പലരുടെയും ഉപജീവന മാർഗം കൂടിയാണ് യൂട്യൂബ്. ലോകത്ത് ഏറ്റവും കൂടുതൽ ആളുകൾ വീഡിയോ കാണാൻ ഉപയോഗിക്കുന്നതും യൂട്യൂബ് തന്നെ.
പ്ലാറ്റ്‌ഫോം നിലനിർത്തുന്നതിനും സൃഷ്‌ടാക്കളെ സാമ്പത്തികമായി പിന്തുണയ്ക്കുന്നതിനുമുള്ള യൂട്യൂബിന്‍റെ ഉപാധിയാണ് പരസ്യങ്ങൾ. യൂട്യൂബ് വീഡിയോകളിലെ പരസ്യ ഇടവേളകൾ കാഴ്‌ചക്കാർ അനുവദിക്കുകയാണെങ്കിൽ സാധാരണയായി ഒരു വീഡിയോ ആരംഭിക്കുന്നതിന് മുമ്പും വീഡിയോയ്ക്കിടയിലുമാണ് ദൃശ്യമാകുക. ഈ ഇടവേളകൾ കുറച്ച് സെക്കന്‍ഡുകള്‍ മുതല്‍ മിനിറ്റുകൾ വരെ നീണ്ടുനിൽക്കുന്നതായിരിക്കും.
ദൈർഘ്യമേറിയ പരസ്യങ്ങൾ സാധാരണയായി ഒരു നിശ്ചിത സമയത്തിന് ശേഷം ഒഴിവാക്കാനുള്ള ഓപ്ഷനോടെയാണ് (Skip) വരുന്നത്. ഈ വർഷത്തിന്‍റെ തുടക്കം മുതൽ വീഡിയോകൾ ആരംഭിക്കുന്നതിന് മുന്‍പുള്ള യൂട്യൂബ് പരസ്യങ്ങളുടെ എണ്ണം വർധിച്ചു. കുറച്ച് നാളുകള്‍ക്ക് മുൻപ് വീഡിയോയുടെ ഇടവേളകളില്‍ 15 സെക്കൻഡ് ദൈർഘ്യമുള്ള ഒഴിവാക്കാനാവാത്ത (Unskippable Ads) മൂന്ന് പരസ്യങ്ങൾ വരെ ഉണ്ടായിരുന്നു. ജനുവരിയിൽ പ്ലാറ്റ്‌ഫോം ഇത് 20 സെക്കൻഡ് പരസ്യങ്ങളായി ഉയർത്തി, മാർച്ചിൽ തുടർച്ചയായി മൂന്ന് 15 സെക്കൻഡ് പരസ്യങ്ങൾ ആക്കി.
പരസ്യം വന്ന വഴി: കാഴ്‌ചക്കാർക്ക് പരസ്യങ്ങളിൽ നിന്ന് രക്ഷപ്പെടാന്‍ പ്രീമിയർ അംഗത്വം നേടാം. എങ്കിലും സൗജന്യ സേവനത്തിന് വലിയ ബുദ്ധിമുട്ടുകൾ ഇല്ലാത്തപ്പോൾ പണം നൽകി അതേ സേവനം ആസ്വദിക്കുന്നവർ വളരെ ചുരുക്കമായിരിക്കും.
നമ്മൾ തെരഞ്ഞെടുക്കുന്ന വീഡിയോ ആരംഭിക്കുന്നതിന് മുൻപ് 10 ഒഴിവാക്കാനാവാത്ത പരസ്യങ്ങൾ വരെ പ്ലേ ചെയ്‌ത് യൂട്യൂബ് അടുത്തിടെ ഒരു പരീക്ഷണം നടത്തിയിരുന്നു. ഇത്തരത്തിലുള്ള പരസ്യങ്ങളെ ബമ്പർ പരസ്യങ്ങൾ എന്നാണ് വിളിക്കുന്നത്. യൂട്യൂബിലെ ഫീഡ്ബാക്ക് ടൂൾ ഉപയോഗിച്ച് കാഴ്‌ചക്കാർക്ക് ഇതിനെക്കുറിച്ച് അഭിപ്രായം രേഖപ്പെടുത്താനും അവസരം ഉണ്ടായിരുന്നു. എന്നാൽ, ഈ പരീക്ഷണം അവസാനിപ്പിക്കുകയാണെന്ന് യൂട്യൂബ് അറിയിച്ചിരിക്കുകയാണ്.
10 പരസ്യം കണ്ടിട്ട് കാണാം വീഡിയോ: കഴിഞ്ഞ കുറച്ച് മാസങ്ങളായി ചില യൂട്യൂബ് ഉപയോക്താക്കൾ സൈറ്റിലെ പരസ്യങ്ങളുടെ ദൈർഘ്യവും എണ്ണവും ഗണ്യമായി വർധിച്ചതായി റിപ്പോർട്ട് ചെയ്‌തു. പ്ലാറ്റ്‌ഫോമിലെ പരസ്യങ്ങളുടെ ദൈര്‍ഘ്യത്തിലും എണ്ണത്തിലും പ്രത്യേകിച്ച് ഒഴിവാക്കാനാവാത്ത ഫോർമാറ്റുകളിൽ വളരെയധികം മാറ്റങ്ങളുള്ളതായി കാഴ്‌ചക്കാർ അഭിപ്രായപ്പെട്ടു.
തുടർച്ചയായി ഒഴിവാക്കാനാവാത്ത 10 പരസ്യങ്ങളുള്ള ഇടവേളകൾ ആപ്ലിക്കേഷൻ കാണിച്ചിരുന്നു. എന്നാൽ, ഇത് ഒരു ചെറിയ പരീക്ഷണമായിരുന്നെന്നും ഇത് അവസാനിച്ചതായും യൂട്യൂബ് വ്യക്തമാക്കി. ഈ പരസ്യങ്ങൾ വളരെ നീണ്ടതല്ല. സാധാരണയായി അഞ്ചോ ആറോ സെക്കൻഡ് ദൈർഘ്യമുള്ളതാണ്. തൽഫലമായി പരസ്യ ഇടവേളകൾ 60 സെക്കൻഡ് മാത്രം നീണ്ടുനിൽക്കുന്നു.
പരീക്ഷണം അവസാനിപ്പിച്ച് യൂട്യൂബ്: 'ആഡ് പോഡുകൾ' എന്ന് വിളിക്കുന്ന ഉയർന്ന അളവിലുള്ള പരസ്യ ഇടവേളകൾ ഒരു ആഗോള പരീക്ഷണത്തിന്‍റെ ഭാഗമാണെന്ന് യൂട്യൂബ് സ്ഥിരീകരിച്ചു. ഈ 'ചെറിയ പരീക്ഷണം' ഇപ്പോൾ അവസാനിച്ചതായി കമ്പനി സ്ഥിരീകരിച്ചു.
''യൂട്യൂബിൽ ലോകമെമ്പാടുമുള്ള പ്രേക്ഷകരുമായി ബന്ധപ്പെടാൻ ബ്രാൻഡുകളെ സഹായിക്കുന്നതിൽ ഞങ്ങൾ ശ്രദ്ധ കേന്ദ്രീകരിക്കുന്നു. കാഴ്‌ചക്കാരുടെ അനുഭവം മെച്ചപ്പെടുത്തുന്ന പരസ്യങ്ങൾ നൽകുന്നതിനുള്ള പുതിയ വഴികൾ ഞങ്ങൾ എപ്പോഴും പരീക്ഷിച്ചുകൊണ്ടിരിക്കുകയാണ്.
കണക്റ്റ് ചെയ്‌ത ടിവികളിൽ കാഴ്‌ചക്കാർ ദൈർഘ്യമേറിയ വീഡിയോകൾ കാണുമ്പോൾ ഒരു പരസ്യ പോഡിൽ ഒന്നിലധികം പരസ്യങ്ങൾ നൽകുന്ന ഒരു ചെറിയ പരീക്ഷണം ഞങ്ങൾ ആഗോളതലത്തിൽ നടത്തി. പരസ്യ ഇടവേളകൾ കുറച്ചുകൊണ്ട് കാഴ്‌ചക്കാർക്ക് മികച്ച അനുഭവം സൃഷ്‌ടിക്കുകയാണ് ലക്ഷ്യം. ഞങ്ങൾ ഈ ചെറിയ പരീക്ഷണം അവസാനിപ്പിച്ചു,'' യൂട്യൂബ് വക്താവ് വ്യക്തമാക്കി.
