മുംബൈ : ബോളിവുഡിന്‍റെ മുഖശ്രീ ശ്രീദേവിയുടെ 60-ാം ജന്‍മവാര്‍ഷികമാണിന്ന്. (Sridevi birthday) നടിക്ക് ആദര ഡൂഡില്‍ ഒരുക്കിയിരിക്കുകയാണ് ഗൂഗിള്‍ (Google Doodle). ശ്രീദേവിയുടെ അഭിനയ ജീവിതം വിവരിച്ചാണ് ഗൂഗിള്‍ ഡൂഡില്‍.
മുംബൈ സ്വദേശിയായ ആര്‍ട്ടിസ്റ്റ് ഭൂമിക മുഖർജിയാണ് (Bhumika Mukherjee) മനോഹരമായ ഡൂഡില്‍ ഒരുക്കിയിരിക്കുന്നത്. ഇന്ത്യൻ സിനിമയുടെ സത്ത ഉൾക്കൊള്ളുന്നതാണ് ഡൂഡിൽ. അതിന് അനുയോജ്യമായ ഫോണ്ടുകളും ഊഷ്‌മളമായ നിറങ്ങളും ചേര്‍ത്താണ് രൂപകല്‍പ്പന. ഇത് കാണുന്നവരില്‍ ശ്രീദേവിയുടെ ഓര്‍മകള്‍ തിരതല്ലും.
300 ഓളം സിനിമകള്‍ : ശ്രീദേവിയെക്കുറിച്ച് ഗൂഗിള്‍ ഇങ്ങനെ കുറിക്കുന്നു. നാല് പതിറ്റാണ്ടിലേറെ നീണ്ടുനിന്ന കരിയറില്‍ 300 ഓളം ചിത്രങ്ങളില്‍ അഭിനയിച്ച് സിനിമ മേഖലയില്‍ ആദരണീയ വ്യക്തിത്വങ്ങളില്‍ ഒരാളായി മാറുകയായിരുന്നു ശ്രീദേവി. 1963 ഓഗസ്‌റ്റ് 13ന് തമിഴ്‌നാട്ടിലായിരുന്നു ജനനം.
നാലാം വയസ്സില്‍ അരങ്ങേറ്റം: നാലാം വയസ്സിലാണ് ശ്രീദേവി തന്‍റെ അഭിനയ ജീവിതം ആരംഭിക്കുന്നത്. ബാല്യ കാലത്ത് തന്നെ സിനിമകളോട് പ്രണയത്തിലായ ശ്രീദേവി, നാലാം വയസ്സില്‍ 'കണ്ഡന്‍ കരുണൈ' (Kandhan Karunai) എന്ന തമിഴ് ചിത്രത്തിലൂടെ അഭിനയ ജീവിതത്തിന് തുടക്കം കുറിച്ചു. തുടക്ക കാലത്ത് തന്നെ ഒന്നിലധികം ദക്ഷിണേന്ത്യൻ ഭാഷകൾ സംസാരിക്കാൻ ശ്രീദേവി പഠിച്ചു. ഇതോടെ മറ്റ് ഭാഷകളിലേക്ക് ശ്രീദേവിക്ക് അനായാസം ചേക്കാറാനായി.
മൂണ്‍ട്ര് മുടിച്ചുവിലൂടെ ദേശീയ അംഗീകാരം : 1976ൽ കെ.ബാലചന്ദറിന്‍റെ 'മൂണ്‍ട്ര് മുടിച്ചു' (Moondru Mudichu) എന്ന ചിത്രത്തിലൂടെ ശ്രീദേവിക്ക് ദേശീയ അംഗീകരം ലഭിച്ചു. അന്ന് തമിഴകത്ത് മികച്ച താരമായി പരിഗണിക്കപ്പെട്ടിരുന്ന ശ്രീദേവി ബോളിവുഡിന്‍റെ ശ്രദ്ധയാകര്‍ഷിച്ചു.
ദേശീയ ഐക്കണ്‍ : ആക്ഷൻ കോമഡി ചിത്രം 'ഹിമ്മത്‌വാല'യിൽ പ്രധാന വേഷം ചെയ്‌തതോടെ, ശ്രീദേവി ദേശീയ ഐക്കണായി. കൂടാതെ ബോളിവുഡിലെ ബോക്‌സ് ഓഫിസ് ഐക്കണുമായി. 'സദ്‌മ', 'ചാൽബാസ്' തുടങ്ങി വമ്പൻ ഹിറ്റുകളിലൂടെ ശ്രീദേവി അവരുടെ ജനപ്രീതി വ്യാപിപ്പിച്ചു.
ബ്ലോക്ക്ബസ്‌റ്ററുകള്‍ സമ്മാനിച്ച് മുന്നേറ്റം : 'പുരുഷ മേധാവിത്വമുള്ള ബോളിവുഡില്‍ നായക നടന്‍ ഇല്ലാതെ ബ്ലോക്ക്ബസ്‌റ്റര്‍ ഹിറ്റുകള്‍ സമ്മാനിച്ചും അവര്‍ ശ്രദ്ധനേടി.
ഒരു പതിറ്റാണ്ടിന് ശേഷം ശക്തമായ തിരിച്ചുവരവ് : 'മാലിനി', 'കബൂം' തുടങ്ങി ടെലിവിഷൻ ഷോകളിൽ അഭിനയിക്കുന്നതിന് മുമ്പ് 2000കളുടെ തുടക്കത്തിൽ ശ്രീദേവി അഭിനയത്തിൽ നിന്ന് ഇടവേള എടുത്തിരുന്നു. ഒരു പതിറ്റാണ്ട് നീണ്ട ഇടവേളയ്ക്ക് ശേഷം, 2012ൽ 'ഇംഗ്ലീഷ് വിംഗ്ലീഷ്' എന്ന സിനിമയിലൂടെ ശക്തമായ തിരിച്ചുവരവ് നടത്തി.
Also Read: 'ദി ലൈഫ് ഓഫ് എ ലെജന്‍ഡ്' ; ശ്രീദേവിയുടെ ജീവചരിത്രം ഒരുങ്ങുന്നു ; പ്രഖ്യാപിച്ച് ബോണി കപൂര്‍
പത്‌മശ്രീയും ദേശീയ പുരസ്‌കാരവും : 2017ല്‍ രാജ്യം പത്‌മശ്രീ നല്‍കി അവരെ ആദരിച്ചു. 2017ൽ, ക്രൈം ത്രില്ലറായ 'മോം' എന്ന സിനിമയിലെ അഭിനയത്തിന് മികച്ച നടിക്കുള്ള ദേശീയ ചലച്ചിത്ര അവാർഡ് ലഭിച്ചിരുന്നു.
സ്വകാര്യ ജീവിതവും വിയോഗവും : ചലച്ചിത്ര നിർമാതാവ് ബോണി കപൂര്‍ ആണ് ശ്രീദേവിയുടെ ഭര്‍ത്താവ്. ജാൻവി കപൂര്‍, ഖുഷി കപൂര്‍ എന്നിവര്‍ മക്കളാണ്. 2018ൽ ദുബായിൽവച്ചായിരുന്നു ശ്രീദേവിയുടെ അപ്രതീക്ഷിത വിയോഗം.
