ഇടുക്കി: അടിമാലിയില്‍ ദേശീയപാതയോരത്ത് പെട്ടിക്കടയും സാമഗ്രികളും സാമൂഹ്യവിരുദ്ധര്‍ തീയിട്ട് നശിപ്പിച്ചതായി പരാതി. ഭിന്നശേഷിക്കാരനും അടിമാലി കല്ലാര്‍കുട്ടി സ്വദേശിയുമായ വിനോദ് കുമാറിന്‍റെ ഉടമസ്ഥതയില്‍ ആരംഭിക്കാനിരുന്ന പെട്ടികടയാണ് സാമൂഹ്യവിരുദ്ധര്‍ തീയിട്ട് നശിപ്പിച്ചത്. ഭാര്യയും രണ്ട് കുട്ടികളും അടങ്ങുന്ന നിര്‍ധന കുടുംബത്തിന്‍റെ ഏക ഉപജീവനമാര്‍ഗമായിരുന്നു ഈ പെട്ടിക്കട.
കഴിഞ്ഞ ദിവസം കത്തിപ്പാറയില്‍ നിന്നും പെട്ടിക്കട വാങ്ങി ആയിരമേക്കര്‍ കൈത്തറിപ്പടിയില്‍ സൂക്ഷിച്ചിരിക്കുകയായിരുന്നു. വ്യാഴാഴ്‌ച രാവിലെ കച്ചവടം ആരംഭിക്കാനായിരുന്നു ലക്ഷ്യം. പിറ്റേന്ന് കട തുറക്കാനെത്തിയപ്പോഴാണ് തീപിടിച്ച് നശിച്ചതായി കണ്ടെത്തുന്നത്. 75000 രൂപയോളം വിനോദിന് നഷ്ടമായിട്ടുണ്ട്. പലപ്പോഴായി ലഭിച്ച വികലാംഗ പെന്‍ഷനും സുമനസുകളുടെ സഹായങ്ങളും ചേര്‍ത്തുവെച്ചാണ് പെട്ടിക്കട ആരംഭിക്കാനുള്ള തുക വിനോദ് കണ്ടെത്തിയത്. സംഭവത്തില്‍ ഉടമ പൊലീസില്‍ പരാതി നല്‍കി.
