ന്യൂകാസില്‍ (ഇംഗ്ലണ്ട്): ന്യൂസിലന്‍ഡിന്‍റെ പ്രധാനമന്ത്രിക്കസേരയില്‍ നിന്ന് ഏവരെയും ഞെട്ടിച്ചുകൊണ്ട് ഇറങ്ങിനടന്ന ജസിന്ത ആര്‍ഡേന്‍റെ അപ്രതീക്ഷിതമായി രാജിപ്രഖ്യാപനം ശരിയായ സമയത്തായിരുന്നോ എന്നുള്ള ചര്‍ച്ചകള്‍ക്ക് ചൂടേറുന്നു. തന്നോട് തന്നെ നീതി കാണിച്ചുകൊണ്ടാണ് ജസിന്ത അധികാരമൊഴിഞ്ഞതെന്നും മറ്റ് ലോകനേതാക്കളില്‍ നിന്നും എപ്പോഴത്തെയും പോലെ ഇത്തവണയും അവര്‍ വേറിട്ടുനിന്നുവെന്നുമെല്ലാമുള്ള പ്രശംസകളാണ് ഇവയില്‍ ഏറെയും. അതേസമയം സ്ഥാനമൊഴിഞ്ഞ പ്രധാനമന്ത്രിക്ക് പിന്‍ഗാമിയായും ന്യൂസിലൻഡിന്‍റെ 41ാമത് പ്രധാന മന്ത്രിയായും ക്രിസ്‌ ഹിപ്‌കിന്‍സ് (44) ഇന്നലെ ചുമതലേയേറ്റു.
നേട്ടങ്ങളെല്ലാം കോട്ടങ്ങളായോ?: ന്യൂസിലന്‍ഡിന്‍റെ പരമാധികാരക്കസേരയിലെത്തിയ പ്രായം കുറഞ്ഞയാള്‍ എന്ന ഒറ്റ വിശേഷണത്തോടെയാണ് ജസീന്ത ലോകത്തിന് മുന്നില്‍ തന്നെ ഒരു അടയാളചിഹന്മായി മാറിയത്. ജോലിയും വ്യക്തിജീവിതവും എങ്ങനെ സമന്വയിപ്പിച്ചുകൊണ്ടുപോകാം എന്നതിലൂടെ ജസിന്ത ആര്ഡേന് ലോകത്തെ ഞെട്ടിച്ചു. ഐക്യരാഷ്‌ട്ര സഭയുടെ ജനറല്‍ അസംബ്ലിയെ കൈയില്‍ കൈക്കുഞ്ഞുമായെത്തി അഭിസംബോധന ചെയ്‌തതുമെല്ലാം ജസിന്തയ്‌ക്ക് പ്രസിദ്ധിനേടിക്കൊടുത്തുവെങ്കില്‍ നിലവിലെ വിടവാങ്ങലിലൂടെ ഇവയെല്ലാം തന്നെ അവരെ പിറകോട്ടടിക്കാനായും ചിലര്‍ ഉപയോഗിക്കുന്നുണ്ട്.
'ബുദ്ധിശൂന്യത'യെന്ന് പരിഹസിക്കാമോ: ജസിന്തയുടെ രാജിപ്രഖ്യാപനത്തെ വിമര്‍ശിക്കുന്നവര്‍ പ്രധാനമായും ഉയര്‍ത്തിക്കാണിക്കുന്നത് അവര്‍ക്ക് തന്‍റെ പരിധിയെക്കുറിച്ച് യഥാര്‍ഥ ബോധ്യമില്ലായിരുന്നു എന്നതാണ്. വിടവാങ്ങലില്‍ പോലും ജനങ്ങളോട് ശക്തരായി നിലകൊള്ളാന്‍ ആവശ്യപ്പെട്ട അവര്‍ക്ക് സ്വയമേവ ഇത് സാധ്യമാകാതെ പോയി എന്നും നീളുന്നു വിമര്‍ശകരുടെ പക്ഷം. അതേസമയം ആരോഗ്യമേഖലയില്‍ പ്രവര്‍ത്തിക്കുന്നവരില്‍ ജോലിപരമായി സാധ്യമായതെല്ലാം ചെയ്‌ത ശേഷമുണ്ടാകുന്ന ഇത്തരം മാനസിക തളര്‍ച്ച അംഗീകാരമായി പരിഗണിക്കാറുണ്ട്. എന്നാല്‍ ജസിന്ത ആര്‍ഡേന്‍റെ വിടവാങ്ങലില്‍ മുഴങ്ങിക്കേട്ടത് മുന്നോട്ടുപോകാനുള്ള ഊര്‍ജം തനിക്ക് നഷ്‌ടമായി എന്നതാണെന്നും ആ ജോലിയില്‍ തുടരുന്നത് അവരെ അസ്വസ്ഥമാക്കുന്നു എന്നുമാണ് പ്രധാനമായി ഉയരുന്ന വാദം.
എന്താവും ആ കാരണം: സാമ്പത്തികവും സാമൂഹികവുമായി പല കാണങ്ങളാല്‍ ചെയ്‌തുവരുന്ന ജോലിയില്‍ നിന്ന് പിരിഞ്ഞുപോകാന്‍ ലോകത്തില്‍ ഒരുപാട് പേര്‍ ആഗ്രഹിക്കുന്നുണ്ടെങ്കിലും ജസിന്ത അവരില്‍ ഒരാളായി മാറുന്നതെങ്ങനെയെന്നാണ് മറ്റൊരു പക്ഷത്തിന്‍റെ ചോദ്യം. ഒരു പ്രധാനമന്ത്രി എന്ന നിലയില്‍ ജസിന്ത ആര്ഡേന് നിരവധി ഉപാധികളുണ്ടായിരുന്നു. അതുകൊണ്ടുതന്നെ എന്തുകൊണ്ടു അവര്‍ ആ പദവിയില്‍ തുടരാന്‍ ആഗ്രഹിച്ചില്ല എന്നതിന് പിന്നാലെ പോകുന്നതിന് പകരം ആ ജോലിയിലെ ഏതെല്ലാം ഘടകങ്ങളാണ് അവരെ ഇത്തരത്തിലേക്ക് ചെന്നെത്തിച്ചത് എന്നു പരിശോധിക്കണമെന്നാണ് ഇവരുടെ ആവശ്യം.
എന്താണ് ബോണ്‍ഔട്ട്: അമിതമായ സമ്മർദം മൂലമുണ്ടാകുന്ന വൈകാരികവും ശാരീരികവും മാനസികവുമായ തളർച്ചയുടെ ഒരു അവസ്ഥയാണ് ബോണ്‍ഔട്ട്. 1. തുടര്‍ച്ചയായ ക്ഷീണം അനുഭവപ്പെടല്‍, 2. ചെയ്യുന്ന ജോലിയോട് കൂടുതലായി വിരക്തി തോന്നുക, 3. തൊഴില്‍ രംഗത്തെ തന്‍റെ പ്രകടനത്തെക്കുറിച്ച് മതിപ്പ് ഇല്ലായ്‌മ എന്നീ മൂന്ന് ഘടകങ്ങളാണ് ബോണ്‍ഔട്ടിനുള്ള പ്രധാനമായ കാരണങ്ങളായി ലോകാരോഗ്യ സംഘടന വിലയിരുത്തപ്പെടുന്നത്.
തെറ്റുപറയാനാകുമോ?: ജസിന്ത ആര്‍ഡേനെ പരിഗണിച്ചാല്‍ ഇവയില്‍ ഏതെങ്കിലും ഒന്നോ അല്ലെങ്കില്‍ ഇവയെല്ലാം ഒന്നിച്ചതുകൊണ്ടോ ആവാം പെട്ടന്നുള്ള രാജിപ്രഖ്യാപനത്തിലേക്ക് നീങ്ങാന്‍ കാരണമെന്നും അഭിപ്രായങ്ങളുണ്ട്. അതേസമയം ഏതൊരു വ്യക്തിയേയും പോലെ ജസിന്തയ്‌ക്കും അവരുടെ വ്യക്തിജീവിതവും സ്വകാര്യതകളും ഉണ്ടാകാമെന്നും അതിലേക്കുള്ള അവരുടെ മടങ്ങിപ്പോകാണ് ഈ രാജിയെങ്കില്‍ അതില്‍ തെറ്റുപറയാനില്ലെന്നും അഭിപ്രായപ്പെടുന്നവുമുണ്ട്.
