ക്വാലാലംപൂര്‍: മലേഷ്യയിലേക്ക് ഒരു ട്രിപ്പ് പ്ലാന്‍ ചെയ്യുന്നവരാണോ നിങ്ങള്‍...? എങ്കില്‍ ഇതാ നിങ്ങള്‍ക്ക് ഒരു സന്തോഷവാര്‍ത്തയുണ്ട്. ഇനി ഇന്ത്യയില്‍ നിന്നും മലേഷ്യയിലേക്ക് പോകാന്‍ വിസയുടെ ആവശ്യമുണ്ടായിരിക്കില്ല (Visa Free Entry for Indian Citizens In Malaysia).
ഇന്ത്യയില്‍ നിന്നും ചൈനയില്‍ നിന്നുമുള്ളവര്‍ക്ക് വിസയില്ലാതെ 30 ദിവസം രാജ്യത്ത് തുടരാമെന്ന നിര്‍ണായക പ്രഖ്യാപനം (30 Day Visa-free Entry for Indian and Chinese citizens In Malaysia) നടത്തിയിരിക്കുകയാണ് മലേഷ്യന്‍ പ്രധാനമന്ത്രി അന്‍വര്‍ ഇബ്രാഹിം (Malaysian Prime Minister Anwar Ibrahim). പീപ്പിള്‍സ് ജസ്റ്റിസ് പാര്‍ട്ടിയുടെ വാർഷിത കോണ്‍ഗ്രസില്‍ സംസാരിക്കുമ്പോഴായിരുന്നു പ്രധാനമന്ത്രിയുടെ പ്രഖ്യാപനം. ഡിസംബര്‍ 1 മുതലാണ് ഈ തീരുമാനം പ്രാബല്യത്തില്‍ വരുന്നത്.
ഇന്ത്യയ്‌ക്ക് ഇത്തരത്തിലൊരു സേവനം ലഭ്യമാക്കുന്ന നാലാമത്തെ രാജ്യമാണ് മലേഷ്യ. നേരത്തെ ശ്രീലങ്ക, വിയറ്റ്‌നാം, തായ്‌ലന്‍റ് എന്നീ രാജ്യങ്ങളാണ് ഇന്ത്യന്‍ പൗരന്മാര്‍ക്ക് തങ്ങളുടെ രാജ്യത്ത് വിസ രഹിത എന്‍ട്രി അനുവദിച്ചത്. ഇവിടങ്ങളിലെ പോലെ തന്നെ ടൂറിസത്തെ പ്രോത്സാഹിപ്പിക്കുന്നതിനാണ് മലേഷ്യയും ഇപ്പോള്‍ ഇത്തരമൊരു തീരുമാനം എടുത്തിരിക്കുന്നത്. അതേസമയം, എത്ര നാളുകള്‍ വരെയാണ് മലേഷ്യ നല്‍കുന്ന ഇളവ് തുടരുന്നത് എന്നതില്‍ വ്യക്തത ലഭിച്ചിട്ടില്ല.
കൃത്യമായ സുരക്ഷ പരിശോധനകള്‍ നടത്തിയ ശേഷമായിരിക്കും പൗരന്മാര്‍ക്ക് തങ്ങളുടെ രാജ്യത്തേക്ക് പ്രവേശനം അനുവദിക്കുക എന്നും മലേഷ്യന്‍ പ്രധാനമന്ത്രി വ്യക്തമാക്കി. 'സുരക്ഷ വളരെ പ്രധാനപ്പെട്ട ഒരു കാര്യമാണ്. മലേഷ്യയിലേക്ക് എത്തുവരെയെല്ലാം പ്രാരംഭഘട്ടത്തില്‍ കൃത്യമായി നിരീക്ഷിക്കും.
ക്രിമിനല്‍ പശ്ചാത്തലമുള്ളവര്‍ക്കും തീവ്രവാദ ബന്ധം സംശയിക്കുന്നവര്‍ക്കും ഒരു കാരണവശാലും രാജ്യത്തേക്ക് പ്രവേശനം അനുവദിക്കില്ല. സുരക്ഷസേനയും ഇമിഗ്രേഷന്‍ ഡിപ്പാര്‍ട്‌മെന്‍റിനുമായിരിക്കും ഇതിന്‍റെ ചുമതല നല്‍കുക'- അന്‍വര്‍ ഇബ്രാഹിം വ്യക്തമാക്കി.
ഇന്ത്യയില്‍ നിന്നുമാണ് മലേഷ്യയിലേക്ക് കൂടുതല്‍ ടൂറിസ്റ്റുകള്‍ എത്തുന്നത് എന്നാണ് റിപ്പോര്‍ട്ടുകള്‍. 2022ല്‍ ആകെ ഇന്ത്യയില്‍ നിന്നും 324,548 വിനോദ സഞ്ചാരികള്‍ മലേഷ്യയിലേക്ക് എത്തിയെന്നാണ് കണക്കുകള്‍. 2023ന്‍റെ ആദ്യ പാദത്തില്‍ 164,566 ഇന്ത്യൻ ടൂറിസ്റ്റുകൾ മലേഷ്യ സന്ദര്‍ശിച്ചുവെന്നാണ് മലേഷ്യന്‍ ടൂറിസത്തിന്‍റെ കണക്കുകള്‍ സൂചിപ്പിക്കുന്നത്.
നിലവില്‍ ഇന്ത്യയില്‍ നിന്നും മലേഷ്യയിലേക്ക് പ്രതിവാരം 30,032 സീറ്റുകളുള്ള 158 വിമാനങ്ങളാണ് സര്‍വീസ് നടത്തുന്നത്. മലേഷ്യൻ എയർലൈൻസ്, ബാത്തിക് എയർ, എയർ ഏഷ്യ, ഇൻഡിഗോ എന്നീ വിമാന കമ്പനികളുടേതാണ് സര്‍വീസുകള്‍.
അടുത്തിടെ ഇന്ത്യ ഉള്‍പ്പടെയുള്ള ആറ് രാജ്യങ്ങളില്‍ നിന്നുള്ളവര്‍ക്ക് ശ്രീലങ്ക വിസ രഹിത എന്‍ട്രി അനുവദിച്ചിരുന്നു. ഇന്ത്യയ്‌ക്ക് പുറമെ ചൈന, റഷ്യ, മലേഷ്യ, ജപ്പാൻ, ഇന്തോനേഷ്യ, തായ്‌ലൻഡ് എന്നീ രാജ്യങ്ങളില്‍ നിന്നുമുള്ളവര്‍ക്കാണ് ശ്രീലങ്ക 30 ദിവസത്തെ വിസ രഹിത പ്രവേശനം അനുവദിച്ചത്. 2024 മാർച്ച് 31 വരെയാണ് ഈ ഇളവ് ലഭിക്കുന്നത്.
ഇന്ത്യ, തായ്‌വാന്‍ എന്നിവിടങ്ങളില്‍ നിന്നുള്ളവര്‍ക്കാണ് തായ്‌ലന്‍ഡും വിസ നിബന്ധനകളില്‍ ഇളവ് പ്രഖ്യാപിച്ചത്. വിസയില്ലാതെ ഇന്ത്യന്‍ പൗരന്മാര്‍ക്ക് 30 ദിവസം വരെ തായ്‌ലന്‍ഡില്‍ തങ്ങാനാണ് അനുമതി. ഇക്കഴിഞ്ഞ നവംബര്‍ 10ന് ഇന്ത്യക്കാര്‍ക്ക് ഇത്തരത്തില്‍ തായ്‌ലന്‍ഡ് പ്രവേശനം നല്‍കി തുടങ്ങുകയും ചെയ്‌തിരുന്നു. 2024 മെയ്‌ 10നാണ് വിസ നിബന്ധനകളിലെ ഇളവ് അവസാനിക്കുന്നത്.
Also Read : ഇസ്രയേലിനും ഹമാസിനും മുകളില്‍ വെള്ളരിപ്രാവുകള്‍ പറക്കുന്നു; പരസ്‌പരമുള്ള ബന്ദികളുടെ കൈമാറ്റം പുരോഗമിക്കുന്നു
