ജെറുസലേം: ഇന്ത്യയിലുള്ള ഇസ്രയേല്‍ പൗരന്‍മാര്‍ക്ക് യാത്രാ മുന്നറിയിപ്പുമായി ഇസ്രയേല്‍ ദേശീയ സുരക്ഷാ കൗണ്‍സില്‍. കഴിഞ്ഞ ദിവസം ന്യൂഡല്‍ഹിയിലെ ഇസ്രയേല്‍ എംബസിക്ക് സമീപമുണ്ടായ സ്ഫോടനം ഭീകരാക്രമണമാണെന്ന വിലയിരുത്തലിന്‍റെ പശ്ചാത്തലത്തിലാണ് മുന്നറിയിപ്പ് (Alert on Israel citizens in India). ഇന്നലെ വൈകുന്നേരമാണ് ന്യൂഡല്‍ഹിയിലെ ചാണക്യപുരിയിലുള്ള ഇസ്രയേല്‍ നയതന്ത്രകാര്യാലയത്തിന് സമീപം പൊട്ടിത്തെറിയുണ്ടായത്(Israel Embassy in New Delhi blast).
സ്ഫോടനത്തില്‍ ആര്‍ക്കും പരിക്കില്ല. എംബസിക്ക് വളരെ അടുത്ത് വൈകിട്ട് 5.48നായിരുന്നു പൊട്ടിത്തെറി ഉണ്ടായതെന്ന് നയതന്ത്രകാര്യാലയ വക്താവ് ഗുയ് നിര്‍ പറഞ്ഞു. സംഭവത്തെക്കുറിച്ച് ഡല്‍ഹി പൊലീസും സുരക്ഷ സേനയും അന്വേഷണം തുടങ്ങിയിട്ടുണ്ട് (Yesterday's blast near Israel Embassy).
ആശങ്കകളെ തുടര്‍ന്ന് ഡല്‍ഹിയിലെ കാര്യാലയത്തിന്‍റെ എല്ലാപരിപാടികളും നിര്‍ത്തിവയ്ക്കാന്‍ ഇസ്രയേലി ദേശീയ സുരക്ഷാകൗണ്‍സില്‍ നിര്‍ദ്ദേശിച്ചു. ജനക്കൂട്ടമുള്ള സ്ഥലങ്ങളില്‍ പോകരുതെന്നും ഇസ്രയേല്‍ പൗരന്‍മാരോട് നിര്‍ദ്ദേശിച്ചിട്ടുണ്ട്. മാളുകള്‍, ചന്തകള്‍ തുടങ്ങിയ സ്ഥലങ്ങളിലേക്ക് പോകരുതെന്നാണ് പ്രത്യേകമായി നിര്‍ദ്ദേശിച്ചിട്ടുള്ളത്. പാശ്ചാത്യരും ജൂതന്‍മാരും ഇസ്രയേലികളും കൂടുതലുള്ള സ്ഥലങ്ങള്‍ കേന്ദ്രീകരിച്ച് ആക്രമണ സാധ്യതയുള്ളതായാണ് ഇസ്രയേലിന്‍റെ വിലയിരുത്തല്‍.
ഭക്ഷണ ശാലകള്‍, ഹോട്ടലുകള്‍, പബ്ബുകള്‍ എന്നിവിടങ്ങളില്‍ ജാഗ്രത പുലര്‍ത്തണമെന്നും നിര്‍ദ്ദേശമുണ്ട്. വലിയ ജനക്കൂട്ടമുള്ള പരിപാടികളില്‍ പങ്കെടുക്കരുത്. സാമൂഹ്യമാധ്യമങ്ങളില്‍ വിവരങ്ങളോ ചിത്രങ്ങളോ അഭിപ്രായങ്ങളോ പോസ്റ്റ് ചെയ്യരുതെന്നും നിര്‍ദ്ദേശമുണ്ട്. സന്ദര്‍ശിക്കുന്ന സ്ഥലങ്ങളെക്കുറിച്ചുള്ള തത്സമയ വിവരങ്ങള്‍ നല്‍കരുതെന്നും ഇസ്രയേല്‍ അധികൃതര്‍ നിര്‍ദ്ദേശിച്ചു.
ഇസ്രയേല്‍ പ്രതീകങ്ങള്‍ പ്രദര്‍ശിപ്പിക്കരുതെന്നും നിര്‍ദ്ദേശമുണ്ട്. നയതന്ത്ര കാര്യാലയത്തിന് അടുത്തുള്ള സെന്‍ട്രല്‍ ഹിന്ദി പരിശീലന കേന്ദ്രത്തിന് സമീപമാണ് സ്ഫോടനമുണ്ടായത്. സംഭവത്തില്‍ ആരും മരിച്ചിട്ടില്ലെന്ന് കഴിഞ്ഞ ദിവസം ഇസ്രയേല്‍ സ്ഥിരീകരിച്ചിരുന്നു. ഡല്‍ഹി പൊലീസിലെ സ്പെഷ്യല്‍ സെല്‍, ബോംബ് നിര്‍വീര്യ വിഭാഗം തുടങ്ങിയവര്‍ സംഭവം ഉണ്ടായ ഉടന്‍ തന്നെ സ്ഥലത്തെത്തിയിരുന്നു. മൂന്ന് മണിക്കൂറോളം ഇവര്‍ പ്രദേശത്ത് തെരച്ചില്‍ നടത്തി.
ദേശീയ അന്വേഷണ ഏജന്‍സിയും പ്രദേശത്ത് തെരച്ചില്‍ നടത്തി. സംഭവത്തെ തുടര്‍ന്ന് ഇസ്രയേല്‍ നയതന്ത്ര കാര്യാലയത്തിലും സമീപത്തും സുരക്ഷ ശക്തമാക്കി. ഇസ്രയേല്‍ പലസ്തീന്‍ സംഘര്‍ഷം രൂക്ഷമായതോടെ ഇസ്രയേല്‍ പൗരന്‍മാര്‍ വിദേശയാത്ര ഒഴിവാക്കണമെന്ന് നിര്‍ദ്ദേശമുണ്ടായിരുന്നു. ഇസ്രയേലിനെതിരെ ലോകവ്യാപക പ്രതിഷേധം ശക്തമാകുന്ന സാഹചര്യത്തിലാണ് ഇത്തരമൊരു നിര്‍ദ്ദേശം. മുമ്പും ഡല്‍ഹിയിലെ ഇസ്രയേല്‍ നയതന്ത്ര കാര്യാലയത്തിന് നേരെയും ഇവരുടെ ജീവനക്കാര്‍ക്ക് നേരെയും ആക്രമണങ്ങള്‍ ഉണ്ടായിട്ടുണ്ട്. 2021ല്‍ ഇസ്രയേല്‍ നയതന്ത്ര കാര്യാലയത്തിന് പുറത്ത് ഒരു സ്ഫോടനം ഉണ്ടായി. അതില്‍ ഒരു കാര്‍ നശിച്ചിരുന്നു. പക്ഷേ ആളപയമുണ്ടായിരുന്നില്ല.
Also read: ന്യൂഡൽഹിയില്‍ ഇസ്രായേൽ എംബസിക്ക് സമീപം സ്ഫോടനം; എല്ലാവരും സുരക്ഷിതർ
2012ല്‍ ഇസ്രയേല്‍ സുരക്ഷാ ഉദ്യോഗസ്ഥന്‍റെ ഭാര്യക്ക് ആക്രമണത്തില്‍ പരിക്കേറ്റിരുന്നു. അവരുടെ കാറിന് നേരെ ആക്രമണം നടത്തുകയായിരുന്നു. ഇത്തവണ ഇസ്രയേല്‍ പലസ്തീന്‍ സംഘര്‍ഷം ആരംഭിച്ച ഉടന്‍ തന്നെ നയതന്ത്ര കാര്യാലയത്തിന് സുരക്ഷ കര്‍ശനമാക്കിയിരുന്നു.
