ജനീവ: കൊവിഡ് മഹാമാരി അവസാനിച്ചിട്ടില്ലെന്ന് മുന്നറിയിപ്പ് നൽകി ലോകാരോഗ്യ സംഘടന. കൊവിഡിന്‍റെ സ്വഭാവം മാറിയിരിക്കുന്നു. എന്നാൽ അത് പൂർണമായും ഇല്ലാതായിട്ടില്ല. 110 രാജ്യങ്ങളിൽ കൊവിഡ് കേസുകൾ ഉയരുകയാണെന്നും ഡബ്ല്യുഎച്ച്ഒ മുന്നറിയിപ്പ് നൽകി.
കേസുകൾ റിപ്പോർട്ട് ചെയ്യുന്നത് കുറയുന്നതിനാൽ ലഭ്യമാകുന്ന ജീനോമിക് സീക്വൻസും കുറവാണ്. അതിനാൽ ഒമിക്രോണിനെ ട്രാക്ക് ചെയ്യാനും പുതിയ വകഭേദങ്ങളെ വിശകലനം ചെയ്യാനുമുള്ള സാധ്യത കുറയുകയാണെന്നും ഡബ്ല്യുഎച്ച്ഒ ഡയറക്‌ടർ ജനറൽ ടെഡ്രോസ് അദാനോം ഗെബ്രിയേസസ് പറഞ്ഞു.
പല രാജ്യങ്ങളിലും ബിഎ.4, ബിഎ.5 എന്നീ വകഭേദങ്ങൾ കൂടുകയാണ്. 110 രാജ്യങ്ങളിൽ കേസുകൾ വർധിക്കുകയാണ്. ഇത് ആഗോളതലത്തിൽ മൊത്തത്തിലുള്ള കേസുകൾ 20 ശതമാനം വർധിക്കുന്നതിനും ലോകാരോഗ്യ സംഘടനയുടെ 6 മേഖലകളിൽ 3 എണ്ണത്തിലും മരണങ്ങൾ ഉയരുന്നതിനും കാരണമായി. കുറഞ്ഞത് 70 ശതമാനം ജനതയ്‌ക്കെങ്കിലും കൊവിഡ് പ്രതിരോധ വാക്‌സിനേഷൻ നൽകണമെന്ന് എല്ലാ രാജ്യങ്ങളോടും ലോകാരോഗ്യ സംഘടന ആവശ്യപ്പെട്ടിട്ടുണ്ടെന്നും ഗെബ്രിയേസസ് പറഞ്ഞു.
കഴിഞ്ഞ 18 മാസത്തിനിടെ ആഗോള തലത്തിൽ 12 ബില്യൺ വാക്‌സിനുകൾ വിതരണം ചെയ്‌തിട്ടുണ്ട്. എന്നാൽ മറുവശത്ത്, അവികസിത രാജ്യങ്ങളിൽ ആരോഗ്യ പ്രവർത്തകരും പ്രായമായവരും ഉൾപ്പെടെ ദശലക്ഷക്കണക്കിന് പേർ ഇനിയും വാക്‌സിനേഷൻ എടുത്തിട്ടില്ല. ഭാവിയിൽ ഉണ്ടാകാനിടയുള്ള കൊറോണ വൈറസിന്‍റെ തരംഗങ്ങൾ അവരെ ബാധിക്കാനുള്ള സാധ്യത കൂടുതലാണെന്നാണ് അതിനർഥമെന്നും അദ്ദേഹം പറഞ്ഞു. കുറഞ്ഞത് 70 ശതമാനം പേർക്ക് വാക്‌സിനേഷൻ എന്ന ലക്ഷ്യത്തിലേക്ക് 58 രാജ്യങ്ങൾ മാത്രം എത്തുമ്പോൾ താഴ്‌ന്ന വരുമാനമുള്ള രാജ്യങ്ങൾക്ക് അത് സാധ്യമാകുന്നില്ലെന്നും അദ്ദേഹം കൂട്ടിച്ചേർത്തു.
രോഗസാധ്യത കൂടുതലുള്ളവർ വാക്‌സിനുകൾ കൃത്യമായി സ്വീകരിക്കണം. കൊവിഡ് മഹാമാരിയുടെ നിർണായകഘട്ടം അവസാനിപ്പിക്കാൻ ലോക രാജ്യങ്ങൾ ഒരുമിച്ച് പ്രവർത്തിക്കണമെന്നും അതിനാവശ്യമായ എല്ലാ സംവിധാനവും തങ്ങളുടെ പക്കലുണ്ടെന്നും ട്രെഡോസ് അദാനോം പറഞ്ഞു.
Also Read: കൊവിഡ് രോഗികള്‍ക്ക് നാഡീ രോഗങ്ങള്‍ വരാനുള്ള സാധ്യത കൂടുതലെന്ന് പഠനം
