ഒട്ടാവ (കാനഡ): 18 വര്‍ഷത്തെ ദാമ്പത്യത്തിനൊടുവില്‍ കനേഡിയന്‍ പ്രധാനമന്ത്രി ജസ്റ്റിന്‍ ട്രൂഡോയും ഭാര്യ സോഫി ഗ്രിഗോയര്‍ ട്രൂഡോയും വേര്‍പിരിയുന്നു. കനേഡിയന്‍ ബ്രോഡ്‌കാസ്റ്റര്‍ - സിടിവി ഇന്നലെ (ഓഗസ്റ്റ് 02) വേര്‍പിരിയല്‍ വാര്‍ത്ത റിപ്പോര്‍ട്ട് ചെയ്‌തിരുന്നു. ജസ്റ്റിനും സോഫിയും തങ്ങളുടെ ഇന്‍സ്റ്റഗ്രാം ഹാന്‍ഡിലുകളിലും വിവരം പങ്കുവച്ചിട്ടുണ്ട്.
'അര്‍ഥവത്തായതും ബുദ്ധിമുട്ടുള്ളതുമായ നിരവധി സംഭാഷണങ്ങള്‍ക്ക് ശേഷം ഞങ്ങള്‍ വേര്‍പിരിയാന്‍ തീരുമാനിച്ചു' -ഇന്‍സ്റ്റഗ്രാമില്‍ പങ്കുവച്ച പ്രസ്‌താവനയില്‍ ജസ്റ്റിന്‍ വ്യക്തമാക്കി. 'ഇത്രനാള്‍ ഉണ്ടാക്കിയെടുത്തതിനും ഇനിയങ്ങോട്ടുള്ളതിനും വേണ്ടി, എല്ലായ്‌പ്പോഴും എന്ന പോലെ ഞങ്ങള്‍ പരസ്‌പരം ആഴത്തിലുള്ള സ്‌നേഹവും ബഹുമാനവും കാത്തുസൂക്ഷിച്ച് അടുത്ത കുടുംബമായി തന്നെ തുടരും' -പ്രസ്‌താവനയില്‍ പറയുന്നു. ജസ്റ്റിന്‍റെ പ്രസ്‌താവന സോഫിയുടെ ഇന്‍സ്റ്റഗ്രാം അക്കൗണ്ടിലും പങ്കിട്ടിട്ടുണ്ട്. ഈ സമയം തങ്ങളുടെ കുടുംബത്തിന്‍റെ സ്വകാര്യതയും കുട്ടികളുടെ വികാരവും മാനിക്കണമെന്ന് ജസ്റ്റിന്‍ ട്രൂഡോ ആവശ്യപ്പെട്ടു.
ജസ്റ്റിന്‍-സോഫി ദമ്പതികള്‍ക്ക് മൂന്ന് മക്കളാണ് ഉള്ളത്. ഇരുവരും നിയമപരമായ വേര്‍പിരിയല്‍ കരാറില്‍ ഒപ്പുവച്ചതായി പ്രധാനമന്ത്രിയുടെ ഓഫിസ് സ്ഥിരീകരിച്ചു. വേർപിരിയാനുള്ള അവരുടെ തീരുമാനവുമായി ബന്ധപ്പെട്ട് നിയമപരവും ധാർമ്മികവുമായ എല്ലാ നടപടികളും സ്വീകരിച്ചിട്ടുണ്ടെന്ന് പ്രധാനമന്ത്രിയുടെ ഓഫിസ് വക്താവ് അലിസണ്‍ മര്‍ഫി അറിയിച്ചു.
പ്രധാനമന്ത്രിയും സോഫിയും തങ്ങളുടെ കുട്ടികളെ സുരക്ഷിതമായ അന്തരീക്ഷത്തിൽ വളർത്തുന്നതിലാണ് ശ്രദ്ധ കേന്ദ്രീകരിക്കുന്നത്. ഇരുവരും അവരുടെ കുട്ടികളുടെ ജീവിതത്തിൽ സ്ഥിര സാന്നിധ്യമായിരിക്കുമെന്നും ട്രൂഡോയുടെ ഓഫിസ് അറിയിച്ചു. കനേഡിയന്‍ ജനത ഈ കുടുംബത്തെ ഇനിയും ഒരുമിച്ച് കാണും. അടുത്ത ആഴ്‌ച ആരംഭിക്കുന്ന അവധിക്കാലത്ത് ജസ്റ്റിനും സോഫിയും ഒരുമിച്ച് കുട്ടികള്‍ക്കൊപ്പം തന്നെയുണ്ടാകുമെന്നും പ്രധാനമന്ത്രിയുടെ ഓഫിസ് ഇറക്കിയ പ്രസ്‌താവനയില്‍ പറയുന്നു.
2005 മെയ്‌ 28നാണ് മോൺട്രിയലിൽ വച്ച് ജസ്റ്റിൻ ട്രൂഡോയും സോഫിയും വിവാഹിതരായത്. കഴിഞ്ഞ വർഷം നടന്ന വിവാഹ വാർഷികത്തിന് ശേഷം, സോഫി ഇരുവര്‍ക്കും ഇടയിലെ അഭിപ്രായ വ്യത്യാസങ്ങളും മറ്റും പറഞ്ഞ് സോഷ്യല്‍ മീഡിയയില്‍ കുറിപ്പ് പങ്കുവച്ചിരുന്നു. ദീര്‍ഘ കാല ബന്ധങ്ങളില്‍ പലതരത്തിലുള്ള വെല്ലുവിളികളും ഉണ്ടാകുമെന്ന് സോഫി തന്‍റെ കുറിപ്പില്‍ പരാമര്‍ശിച്ചിരുന്നു.
അതേസമയം, ഇക്കഴിഞ്ഞ മെയ്‌ മാസത്തില്‍ ചാള്‍സ് രാജാവിന്‍റെ കിരീടധാരണത്തില്‍ പങ്കെടുക്കാന്‍ ജസ്റ്റിന്‍ ട്രൂഡോയും സോഫിയും ഒരുമിച്ചാണ് ലണ്ടനിലേക്ക് പോയത്. മാര്‍ച്ചില്‍ ഔദ്യോഗിക സന്ദര്‍ശനത്തിന് ഒട്ടാവയില്‍ എത്തിയ യുഎസ് പ്രസിഡന്‍റ് ജോ ബൈഡനെയും പ്രഥമ വനിത ജില്‍ ബൈഡനെയും സ്വീകരിക്കാനും ജസ്റ്റിനൊപ്പം സോഫി ഉണ്ടായിരുന്നു.
