ഫറോവമാരുടെ കാലത്ത് തുടങ്ങിയതാണ് ഈജിപ്തിലെ ഏകാധിപത്യ ഭരണം. എന്നാല്‍ അടിമത്വനുകത്തിനു കീഴില്‍ യാതനകളും വേദനകളും അനുഭവിച്ച ഒരു ജനത അവരുടെ സ്വാതന്ത്ര്യത്തിനും മനുഷ്യാവകാശങ്ങള്‍ക്കും വേണ്ടി കൈ ഉയര്‍ത്തി. സംസ്കൃതിയുടെ കളിത്തൊട്ടില്‍ എന്ന് വിളക്കപ്പെടുന്ന ഈജിപ്തിന്‍റെ മണ്ണിലന്ന് മുല്ലപ്പൂ വിപ്ലവത്തിന്‍റെ വിത്തുമുളച്ചു. പിന്നീട് കണ്ടത് ജനാധിപത്യത്തിന് വേണ്ടി ചരിത്രത്തിലിന്നോളം കണ്ടിട്ടില്ലാത്ത രക്തരൂക്ഷിതമായ മുറവിളികളായിരുന്നു.
മുല്ലപ്പൂ വിപ്ലവം അറബ് ലോകത്ത് വലിയ മാറ്റങ്ങള്‍ക്ക് വഴിവെച്ചു. സ്വാന്ത്ര്യം തങ്ങള്‍ക്കേറ്റ മുറിവുകള്‍ ഉണക്കുമെന്ന് കരുതിയ ഈജിപ്ഷ്യന്‍ ജനതക്ക് തെറ്റിയോ എന്ന ചോദ്യം വീണ്ടും ഉയരുകയാണ്. സംസ്കൃതിയുടെ നഗരം വീണ്ടും ജനാധിപത്യത്തിനായി മുറവിളി കൂട്ടുകയാണ്. ഇതൊരു രണ്ടാം മുല്ലപ്പൂ വിപ്ലവമാകുമൊ എന്നാണ് ലോകം ഉറ്റു നോക്കുന്നത്.
മുല്ലപ്പൂ വിപ്ലവത്തിന്‍റെ പ്രതിഫലനമെന്നോണം അധികാരത്തിലെത്തിയ പ്രസിഡന്‍റ് അബ്ദുല്‍ ഫത്താഹ് അല്‍ സിസിക്കെതിരെ കഴിഞ്ഞ വെള്ളിയാഴ്ച്ച ആയിരങ്ങള്‍ തെരുവിലിറങ്ങി. പ്രസിഡന്‍റിനെതിരെ സമൂഹ മാധ്യമങ്ങളില്‍ വൈറലായ ഒരു വീഡിയോ ആണ് പ്രതിഷേധങ്ങള്‍ക്ക് കാരണമായിരിക്കുന്നത്. രാജ്യത്തെ സമ്പന്നനും അഭിനേതാവുമായ മുഹമ്മദ് അലിയാണ് സിസിക്കെതിരെ സാമൂഹ്യ മാധ്യമം വഴി ആരോപണം ഉന്നയിച്ചത്. സിസി ജനങ്ങളെ പറ്റിക്കുകയാണെന്നും അദ്ദേഹം അഴിമതി വീരനാണെന്നും അലി പറയുന്നു.
ചൊവ്വാഴ്ച്ചയാണ് വീഡിയോ പുറത്ത് വന്നത്. ബുധനാഴ്ചയോടെ തന്നെ ജനം തെരുവിലിറങ്ങിയിരുന്നു. ജനാധിപത്യം സംരക്ഷിക്കുന്നതില്‍ പ്രസിഡന്‍റ് പരാജയപ്പെട്ടിരിക്കുന്നു എന്ന് ജനം ആവര്‍ത്തിക്കുന്നു. വ്യാഴാഴ്ച പ്രസിഡന്‍റ് ആരോപണം തള്ളുകയും രാജിയില്ലെന്ന് പ്രഖ്യാപിക്കുകയും ചെയ്തു. ഇതോടെ വെള്ളിയാഴ്ച പ്രതിഷേധം കനത്തു.
രാജ്യ തലസ്ഥാനമായ കെയ്റോയിലും ഏറ്റവും വലിയ നഗരങ്ങളായ അലക്സാഡ്രിയയിലും സ്വീസിലും ജനങ്ങള്‍ പ്രതിഷേധ റാലികള്‍ നടത്തി തുടങ്ങി. 2011ല്‍ ഹുസ്നി മുബാറഖിനെതിരെ നടത്തിയ പോരാട്ടങ്ങള്‍ക്ക് സമാനമായ പ്രതിഷേധങ്ങളാണ് നടക്കുന്നത്. 'അധികാരം ദുഷിപ്പിക്കും, പരമാധികാരം പരമമായും' എന്നു പറഞ്ഞ ജോണ്‍ ആക്ടന്‍റെ വാക്കുകള്‍ ചരിത്രത്തില്‍ വീണ്ടും ആവര്‍ത്തിക്കുകയാണ്. മുന്‍ പട്ടാള മേധാവികൂടിയയ പ്രസിഡന്‍റ് സിസി സായുധ സേനയെ ഉപയോഗിച്ച് പ്രതിഷേധങ്ങളെ ഇല്ലാതാക്കാന്‍ തുടങ്ങിയിരിക്കുന്നു.
അന്തര്‍ദേശീയ വാര്‍ത്താ മാധ്യമമായ അല്‍ ജസീറക്കടക്കം വിലക്ക് ഏര്‍പ്പെടുത്തിയിരിക്കുന്നു. 74 ഓളം പ്രവര്‍ത്തകരെ പൊലീസ് അറസ്റ്റ് ചെയ്തിട്ടുണ്ട്. സമാധാനപരമായ പ്രതിഷേധമായിട്ടും എന്തുകൊണ്ടാണ് അറസ്റ്റെന്നാണ് ജനങ്ങള്‍ ചോദിക്കുന്നത്. നഗരങ്ങളില്‍ പൊലീസ് പ്രക്ഷോഭങ്ങളെ ക്രൂരമായി അടിച്ചമര്‍ത്തുകയാണെന്ന് മിഡിലീസ്റ്റ് ആന്‍ഡ് നോര്‍ത്ത് ആഫ്രിക്ക എച്ച് ആര്‍ ഡബ്ലു (ഹ്യുമന്‍ റൈറ്റ് വാച്ച്) ഡെപ്യൂട്ടിയായ മൈക്കള്‍ പേജ് ലോകത്തെ അറിയിച്ചത്.
അതേസമയം പ്രസിഡന്‍റ് വെള്ളിയാഴ്ച്ച ന്യൂയോര്‍ക്കിലേക്ക് പറന്നു എന്നാണ് പുറത്തുവരുന്ന വിവരം. ഈജിപ്ത് ജനങ്ങളുടെ സ്വാതന്ത്ര്യവും അവകാശങ്ങളും സംരക്ഷിക്കണമെന്ന് യു.എന്‍ സെക്രട്ടറി ജനറല്‍ ഐക്യരാഷ്ട്ര സംഘടനയുടെ പൊതു അസംബ്ലിയില്‍ പറഞ്ഞിരുന്നു. പ്രതിഷേധത്തില്‍ യു.എന്‍ ഇടപെടല്‍കൂടി ഉണ്ടായതോടെ രണ്ടാം മുല്ലപ്പൂ വിപ്ലവത്തിന് ലോകം സാക്ഷിയാകുമോ എന്നാണ് എല്ലാവരും ഉറ്റുനോക്കുന്നത്.
