ഗസ: ഹമാസ് പിന്തുണയോടെ ഇസ്രയേൽ അതിർത്തിയിൽ പലസ്‌തീനികളുടെ പ്രതിഷേധം. പ്രതിഷേധത്തിനിടെ വെടിയുതിർത്ത് കൊണ്ട് പ്രതികരിച്ച ഇസ്രയേൽ സേനയ്ക്ക് നേരെ പ്രതിഷേധക്കാർ സ്ഫോടകവസ്തുക്കൾ എറിഞ്ഞു. രാത്രികാലങ്ങളിലെ പ്രതിഷേധങ്ങളുടെ പരമ്പരയിലെ ആദ്യത്തേതാണെന്നാണ് പ്രതിഷേധക്കാർ വിശേഷിപ്പിച്ച പ്രതിഷേധത്തിലൂടെ സാമ്പത്തിക ഉപരോധം ലഘൂകരിക്കാൻ ഇസ്രയേലിനെ സമ്മർദത്തിലാക്കുകയാണ് ലക്ഷ്യം. പ്രതിഷേധം ആഴ്ചയിലുടനീളം തുടരുമെന്നും പ്രതിഷേധത്തിന്‍റെ ആസൂത്രകർ പറഞ്ഞു.
പലസ്തീനിലെ ഉപരോധം നീക്കിയില്ലെങ്കിൽ ഇസ്രയേൽ അധിനിവേശം ശാന്തമായ അന്തരീക്ഷത്തിൽ ആയിരിക്കില്ലെന്ന് പ്രതിഷേധക്കാരുടെ വക്താവ് അബു ഉമർ അറിയിച്ചു.
കർശന ഉപരോധം ഏർപ്പെടുത്തി ഇസ്രയേൽ
2007ൽ പലസ്തീൻ അധികാരം ഹമാസ് നേടിയെടുത്തതിന് പിന്നാലെയാണ് ഇസ്രയേലും ഈജിപ്‌തും പലസ്തീന് മേൽ ഉപരോധം തീർത്തത്. ഗസയിലേക്കും പുറത്തേക്കും ചരക്കുകളുടെയും ആളുകളുടെയും സഞ്ചാരം നിയന്ത്രിക്കുന്ന ഉപരോധം ഗാസയുടെ സമ്പദ്‌വ്യവസ്ഥയ്ക്ക് മേൽ കടുത്ത ആഘാതമാണ് ഏൽപ്പിച്ചത്.
മെയ് മാസം നടന്ന ഇസ്രയേലും പലസ്തീനും തമ്മിലുള്ള 11 ദിവസം നീണ്ട യുദ്ധത്തിന് ശേഷം ഇസ്രയേൽ ഉപരോധം കർശനമാക്കിയിരുന്നു. രണ്ട് സൈനികരുടെ മൃതദേഹങ്ങൾ തിരികെ നൽകണമെന്നും ഹമാസ് തടവിലാക്കിയിരിക്കുകയാണെന്ന് കരുതപ്പെടുന്ന രണ്ട് ഇസ്രയേലി പൗരന്മാർക്ക് സ്വാതന്ത്ര്യം നൽകണമെന്നുമുള്ള ആവശ്യം ഉന്നയിച്ചാണ് ഇസ്രയേൽ ഉപരോധം കടുപ്പിക്കാൻ തീരുമാനിച്ചത്.
Also Read: കാബൂള്‍ വിമാനത്താവളത്തില്‍ വീണ്ടും ആക്രമണത്തിന് സാധ്യതയെന്ന് ബൈഡന്‍
ശനിയാഴ്‌ച നടന്ന പ്രതിഷേധത്തിനെ തുടർന്ന് ഇസ്രയേൽ സൈനികരുടെ ഭാഗത്ത് നിന്നുണ്ടായ വെടിവയ്പ്പിലും തുടർന്ന് പ്രതിഷേധക്കാരുടെ ഭാഗത്ത് നിന്നുണ്ടായ സ്ഫോടക വസ്തുക്കൾ ഉപയോഗിച്ചുള്ള ആക്രമണത്തെയും തുടർന്ന് ഇസ്രയേലിന്‍റെ ഭാഗത്ത് പരിക്കുകളൊന്നുമില്ലെന്ന് ഇസ്രയേൽ സൈന്യം അറിയിച്ചു.
എന്നാൽ ഒരാഴ്ച മുൻപ് സമാന രീതിയിൽ നടന്ന പ്രകടനത്തിനിടെ തലയ്ക്ക് വെടിയേറ്റ 12 വയസ് പ്രായമുള്ള കുട്ടി മരിച്ചതായി ശനിയാഴ്‌ച ഗസ ആരോഗ്യ ഉദ്യോഗസ്ഥർ അറിയിച്ചു.
