വാഷിംഗ്ടണ്‍: ഫിലിപ്പ് രാജകുമാരന്‍റെ സംസ്കാരച്ചടങ്ങുകളില്‍ ഹാരി രാജകുമാരന്‍റെ ഭാര്യ മേഗന്‍ മോര്‍ക്കല്‍ പങ്കെടുക്കില്ല. രണ്ടാം തവണയും ഗര്‍ഭിണിയായിരിക്കുന്ന മോര്‍ക്കല്‍ ഡോക്ടറുടെ നിര്‍ദേശപ്രകാരമാണ് അമേരിക്കയില്‍ നിന്നും ബ്രിട്ടനിലേക്കുള്ള യാത്ര ഒഴിവാക്കിയതെന്നാണ് ഔദ്യോഗിക വിശദീകരണം. 12 മണിക്കൂര്‍ നീളുന്ന യാത്രയും ചടങ്ങുകളും നിലവിലത്തെ അവസ്ഥയില്‍ മെഗാന് താങ്ങാനാകില്ല. ചടങ്ങുകളില്‍ ഹാരിക്കൊപ്പം ഉണ്ടാകണമെന്ന് മേഗന്‍ ആഗ്രഹിച്ചിരുന്നെന്നും രാജകുടുംബത്തിന്‍റെ വക്താവ് മാധ്യമങ്ങളെ അറിയിച്ചു.
ഔദ്യോഗിക വിശദീകരണം ആരോഗ്യപ്രശ്നങ്ങളെന്നാണെങ്കിലും ഫിലിപ്പിന്‍റെ സംസ്കാരച്ചടങ്ങുകളില്‍ മേഗന്‍റെ അസാന്നിധ്യം ശ്രദ്ധേയമാകും. രാജകുടുംബവുമായി അകല്‍ച്ചയിലായ ഹാരിയും മേഗനും രാജകീയ പദവികളുപേക്ഷിച്ച് അമേരിക്കയിലേക്ക് പോയതും പിന്നാലെയുണ്ടായ തുറന്ന് പറച്ചിലുകളും ലോക ശ്രദ്ധയാകര്‍ഷിച്ചിരുന്നു. ബെക്കിങ്ങ്ഹാം കൊട്ടാരത്തില്‍ ഒളിഞ്ഞും തെളിഞ്ഞും വംശീയ അധിക്ഷേപത്തിന് ഇരയായെന്ന മേഗന്‍റെ പരാമര്‍ശങ്ങള്‍ ലോകവ്യാപകമായി ചര്‍ച്ച ചെയ്യപ്പെട്ടു. തുടര്‍ന്നാണ് എഡിന്‍ബര്‍ഗ് പ്രഭുവിന്‍റെ സംസ്കാരച്ചടങ്ങുകളില്‍ നിന്ന് മേഗന്‍ വിട്ടുനില്‍ക്കുന്നതും. ഔദ്യോഗിക പദവികള്‍ ഉപേക്ഷിച്ച ശേഷവും ഹാരിയെ സസക്സ് പ്രഭുവെന്നും മേഗനെ പ്രഭ്വിയെന്നും അഭിസംബോധന ചെയ്ത കൊട്ടാരം വക്താവിന്‍റെ വാക്കുകളും ശ്രദ്ധേയമായി.
എലിസബത്ത് രാജ്ഞിയുടെ ഭര്‍ത്താവും എഡിന്‍ബര്‍ഗ് പ്രഭുവുമായ ഫിലിപ്പ് രാജകുമാരന്‍റെ സംസ്കാരച്ചടങ്ങുകളില്‍ രാജകുടുംബത്തില്‍ നിന്നുള്ളവര്‍ മാത്രമാകും പങ്കെടുക്കുക. 30 പേര്‍ക്ക് മാത്രമാണ് കര്‍ശന കൊവിഡ് നിയന്ത്രണങ്ങളില്‍ നടത്തുന്ന ചടങ്ങുകളില്‍ പങ്കെടുക്കാന്‍ അനുമതിയുള്ളത്. ഉറ്റ ബന്ധുക്കള്‍ മാത്രം പങ്കെടുക്കുന്നതിനാല്‍ പ്രധാനമന്ത്രി ബോറിസ് ജോണ്‍സണും ചടങ്ങുകളില്‍ നിന്നും വിട്ടുനില്‍ക്കുകയാണ്.
വെള്ളിയാഴ്ച വിന്‍ഡ്സര്‍ കൊട്ടാരത്തില്‍ വച്ചായിരുന്നു 99ാം വയസില്‍ ഫിലിപ്പ് രാജകുമാരന്‍റെ അന്ത്യം. 73 വര്‍ഷം നീണ്ട ദാമ്പത്യമാണ് എലിസബത്ത് രാജ്ഞിയും ഫിലിപ്പ് രാജകുമാരനും തമ്മിലുള്ളത്. ബ്രിട്ടീഷ് റോയല്‍ നേവിയില്‍ ഉന്നത സ്ഥാനങ്ങള്‍ വഹിച്ച ശേഷമാണ് ഫിലിപ്പ് രാജ്ഞിയുടെ പങ്കാളിയായത്. രാജകുമാരന് അന്ത്യാഞ്ജലികള്‍പ്പിച്ച് നിരവധിയാളുകളാണ് ബെക്കിങ്ങ്ഹാം കൊട്ടാരത്തിലേക്ക് ഒഴുകിയെത്തുന്നത്.
