ലണ്ടൻ:എസെക്‌സില്‍ കണ്ടെയ്നര് ലോറിയില്‍ നിന്നും 39 ചൈനീസ് പൗരന്മാരുടെ മൃതദേഹം കണ്ടെത്തിയ കേസിൽ രണ്ട് പേരെ കൂടി പൊലീസ് അറസ്റ്റ് ചെയ്തു. നോർത്ത് വെസ്റ്റ് ഇംഗ്ലണ്ടിലെ വാരിംഗ്ടണിൽ താമസിക്കുന്ന ഒരു പുരുഷനും സ്ത്രീയുമാണ് അറസ്റ്റിലായത്. നരഹത്യ, മനുഷ്യക്കടത്ത് ഗൂഢാലോചന എന്നീ വകുപ്പുകൾ പ്രകാരമാണ് അറസ്റ്റ്. മനുഷ്യക്കടത്ത് ഗൂഢാലോചനയിൽ നോർത്തേൺ അയർലൻഡിൽ നിന്നും പിടിയിലായ മോ റോബിൻസൺ പൊലീസ് കസ്റ്റഡിയിൽ തുടരുകയാണ്.
ഇന്ന് രാത്രിയോടെ പോസ്റ്റുമോർട്ടം നടത്തുമെന്ന് എസെക്സ് പൊലീസ് അറിയിച്ചു. അറസ്റ്റിലായ കുറ്റാരോപിതന്‍റെ ചോദ്യം ചെയ്യൽ തുടരുകയാണ്. ക്രിമിനൽ ഗ്രൂപ്പുകളെ തിരിച്ചറിയാനുള്ള അന്വേഷണം തുടങ്ങിയെന്ന് യു കെയുടെ ദേശീയ ക്രൈം ഏജൻസി റിപ്പോർട്ട് ചെയ്തു. കോളിളക്കം സൃഷ്ടിക്കുന്ന കേസ് മൈഗ്രേഷൻ മാഫിയകളെക്കുറിച്ചുള്ള ചർച്ചക്ക് തുടക്കമിട്ടിട്ടുണ്ട്.
