ലണ്ടൻ: തെക്കുകിഴക്കൻ ഇംഗ്ലണ്ടിലെ കെന്‍റിൽ എം-20 മോട്ടോർവേയിൽ ബുധനാഴ്‌ച പൊലീസ് തടഞ്ഞ ലോറിയിൽ നിന്ന് ഒമ്പത് കുടിയേറ്റക്കാരെ രക്ഷപ്പെടുത്തി. പൊലീസിന് ലഭിച്ച രഹസ്യ വിവരത്തെ തുടർന്ന് പരിശോധന നടത്തുകയായിരുന്നു . ഇന്നലെ ഉച്ചകഴിഞ്ഞ് 3: 40 ഓടെയാണ് സംഭവം. ഒമ്പത് പേരെ സൗത്ത് ഈസ്റ്റ് കോസ്റ്റ് ആംബുലൻസ് സർവീസ് ഹോം ഓഫീസ് ഇമിഗ്രേഷൻ ഓഫീസർമാർക്ക് കൈമാറുന്നതിന് മുമ്പ് മുൻകരുതലായി പരിശോധന നടത്തിയിട്ടുണ്ടെന്ന് കെന്‍റ് പൊലീസ് വക്താവ് പറഞ്ഞു.
കുടിയേറ്റക്കാരടക്കം 39 പേരുടെ മൃതദേഹങ്ങൾ ഒരു റഫ്രിജറേറ്റർ ട്രക്കിൽ നിന്ന് കണ്ടെത്തിയതിന് മണിക്കൂറുകൾക്ക് ശേഷമാണ് സംഭവം. ഈ സംഭവവുമായി ബന്ധമുണ്ടെന്ന സംശയത്തെ തുടർന്ന് ട്രക്ക് ഡ്രൈവറെ അറസ്റ്റ് ചെയ്‌തിട്ടുണ്ട്. ഇക്കാര്യത്തിൽ കൂടുതൽ അന്വേഷണം നടന്നു വരികയാണ്.
