കൊളംബോ: കൊളംബോ തുറമുഖത്തിന് സമീപം തീപിടിച്ച കപ്പല്‍ മുങ്ങി. സിംഗപ്പൂർ രജിസ്റ്റർ ചെയ്ത എംവി എക്സ്-പ്രസ് പേൾ എന്ന ചരക്ക് കപ്പലാണ് അപകടത്തില്‍പ്പെട്ടത്. കരയിലേക്ക് വലിച്ചെത്തിക്കാൻ ശ്രമം നടക്കുന്നതിനിടെയാണ് കപ്പല്‍ മുങ്ങിയത്. ആഴമുള്ള പ്രദേശമായതിനാല്‍ കപ്പല്‍ ഇനി ലഭിക്കില്ലെന്നും കരയ്‌ക്കെത്തിക്കാനുള്ള ശ്രമങ്ങള്‍ അവസാനിപ്പിച്ചതായും ശ്രീലങ്കൻ നേവി മീഡിയ വക്താവ് പറഞ്ഞു.
കപ്പലിന്‍റെ പിൻഭാഗം ഇപ്പോൾ 21 മീറ്റർ താഴ്ചയിൽ കടലിന്‍റെ അടിയിൽ സ്പർശിക്കുന്നുണ്ടെന്ന് പരിശോധനയില്‍ വ്യക്തമായിട്ടുണ്ട്. കപ്പലിന്‍റെ മുൻ‌ഭാഗം പൊങ്ങിക്കിടക്കുകയാണ്. അതേസമയം കപ്പലിൽ നിന്ന് എണ്ണ ഒഴുകുന്നത് തടയാൻ നാവികസേനയും തുറമുഖ അതോറിറ്റിയും ഉൾപ്പെടെ നിരവധി ടീമുകൾ സന്നദ്ധരാണെന്നും മൂന്ന് ഇന്ത്യൻ കപ്പലുകളും കപ്പൽ കൈകാര്യം ചെയ്യാൻ തയാറാണെന്നും നാവികസേന വക്താവ് പറഞ്ഞു.
മെയ് 21 നാണ് കപ്പലിൽ ഡെക്കിൽ തീപിടിത്തമുണ്ടായത്. നൈട്രിക് ആസിഡ് ചോർന്നതാണ് അപകടത്തിന് കാരണമായത്. മെയ് 20 ന് ചരക്ക് സാധങ്ങള്‍ വച്ചിരുന്ന സ്ഥലങ്ങളില്‍ നിന്ന് പുക ഉയർന്നിരുന്നു. തുറമുഖത്തിന് 9.5 നോട്ടിക്കൽ മൈൽ അകലെയാണ് കപ്പല്‍ നങ്കൂരമിടുന്നത്. ആകെയുണ്ടായിരുന്ന 1486 കണ്ടെയ്നറുകളില്‍ 25 ടൺ നൈട്രിക് ആസിഡ്, രാസവസ്തുക്കൾ, സൗന്ദര്യവർധക വസ്തുക്കൾ എന്നിവയാണ് ഉണ്ടായിരുന്നത്. 2021 മെയ് 15 ന് ഇന്ത്യയിലെ ഹസിറ തുറമുഖത്ത് നിന്നാണ് കപ്പല്‍ പുറപ്പെട്ടത്.
also read: ശ്രീലങ്കൻ തീരത്ത് കപ്പല്‍ തീപിടിത്തത്തിൽ സഹായവുമായി ഇന്ത്യ
