ന്യൂയോർക്ക്: ആഗോള വിപണിയിൽ ക്രൂഡ് ഓയിൽ വില കുതിക്കുന്നു. 2008ന് ശേഷമുള്ള ഏറ്റവും ഉയർന്ന എണ്ണവിലയാണ് നിലവിൽ. ആഗോള വിപണിയിലേക്ക് ഇറാനിയൻ ക്രൂഡിന്‍റെ തിരിച്ചുവരവിലുണ്ടാകുന്ന കാലതാമസവും യുഎസും യൂറോപ്യൻ സഖ്യകക്ഷികളും റഷ്യയിൽ നിന്നുള്ള എണ്ണയുടെ ഇറക്കുമതി നിരോധിക്കുന്ന കാര്യം പരിഗണിക്കുന്നതുമാണ് എണ്ണവില കുതിച്ചുയരാൻ കാരണം.
യുക്രൈൻ സംഘർഷത്തെ തുടർന്ന് ലോകരാജ്യങ്ങൾ ഏർപ്പെടുത്തിയ ഉപരോധങ്ങൾ ടെഹ്‌റാനുമായുള്ള വ്യാപാരത്തെ ബാധിക്കില്ലെന്ന് യുഎസ് ഉറപ്പ് നൽകണമെന്ന് റഷ്യ ആവശ്യപ്പെട്ടിട്ടുണ്ട്. ഇതോടെ ലോകശക്തികളുമായുള്ള ഇറാന്‍റെ 2015ലെ ആണവ കരാർ നവീകരിക്കാനുള്ള ചർച്ചകൾ അനിശ്ചിതത്വത്തിലായിരിക്കുകയാണ്. ചൈനയും പുതിയ ആവശ്യങ്ങൾ ഉന്നയിച്ചിട്ടുണ്ടെന്ന് വൃത്തങ്ങൾ പറയുന്നു.
എന്നാൽ യുക്രൈൻ അധിനിവേശത്തിന്‍റെ പേരിൽ റഷ്യക്ക് മേൽ ഏർപ്പെടുത്തിയ ഉപരോധങ്ങൾക്ക് ഇറാനുമായുള്ള ആണവ കരാറുമായി യാതൊരു ബന്ധവുമില്ലെന്ന് യുഎസ് സ്റ്റേറ്റ് സെക്രട്ടറി ആന്‍റണി ബ്ലിങ്കൻ ഞായറാഴ്‌ച പറഞ്ഞു. അതേസമയം, റഷ്യൻ എണ്ണയുടെ ഇറക്കുമതി നിരോധിക്കുന്നത് യുഎസിന്‍റെയും യൂറോപ്യൻ സഖ്യകക്ഷികളുടെയും പരിഗണനയിലുണ്ടെന്നും ആന്‍റണി ബ്ലിങ്കൻ പറഞ്ഞു.
ബ്രെന്‍റ് ക്രൂഡ് ഓയിൽ വില ഞായറാഴ്‌ച വൈകിട്ട് 6.50ഓടെ 11.67 ഡോളർ ഉയർന്ന് ബാരലിന് 129.78 ഡോളറിലെത്തി. ഡബ്ല്യുടിഐ ക്രൂഡ് വില 10.83 ഡോളർ ഉയർന്ന് 126.51ലെത്തി. ഇറനിയൻ കരാർ വൈകുകയാണെങ്കിലും റഷ്യൻ ബാരലുകൾ വിപണിയിൽ നിന്ന് വളരെക്കാലം അകന്ന് നിൽകുകയാണെങ്കിലു വളരെ വേഗം എണ്ണ സംഭരണം കഴിയുമെന്ന് തിങ്ക് ടാങ്ക് എനർജി ആസ്പെക്‌ട്‌സിന്‍റെ സഹസ്ഥാപകയായ അമൃത സെൻ പറഞ്ഞു.
ഈ ആഴ്ച എണ്ണ ബാരലിന് 185 ഡോളറിനടുത്ത് ഉയരുമെന്ന് ജെപി മോർഗനിലെ വിശകലന വിദഗ്ധർ പറയുന്നു. ആഗോള വിതരണത്തിന്‍റെ ഏഴ് ശതമാനം എണ്ണയും ശുദ്ധീകരിച്ച എണ്ണ ഉത്പന്നങ്ങളും വിപണിയിലെത്തിക്കുന്നത് റഷ്യയാണ്. റഷ്യയുടെ എണ്ണ കയറ്റുമതി നിർത്തലാക്കുകയാണെങ്കിൽ വിപണിയിൽ 5 ദശലക്ഷം ബാരലിൽ കൂടുതൽ കുറവുണ്ടായേക്കാമെന്നും എണ്ണ വില ബാരലിന് 100 ഡോളറിൽ നിന്ന് 200 ഡോളറായി വർധിക്കുമെന്നും ബാങ്ക് ഓഫ് അമേരിക്കയിലെ വിശകലന വിദഗ്ധർ പറയുന്നു.
ഇറാനുമായുള്ള ആണവ കരാർ പുതുക്കിയാലും എണ്ണ വിതരണം പുനഃസ്ഥാപിക്കാൻ മാസങ്ങളെടുക്കുമെന്ന് വിശകലന വിദഗ്ധർ കണക്കുകൂട്ടുന്നു.
Also Read: റഷ്യ - യുക്രൈന്‍ യുദ്ധം : മധ്യസ്ഥ ചര്‍ച്ചയുമായി ഇസ്രയേല്‍, പുടിനെ കണ്ട് ബെന്നറ്റ്
