ഇന്ദ്രൻസ്, ഷഹീൻ സിദ്ദിഖ് ഒന്നിക്കുന്ന 'ടൂ മെൻ ആർമി' ; ടൈറ്റിൽ പോസ്റ്റർ പുറത്ത്

നിസാർ സംവിധാനം ചെയ്യുന്ന ചിത്രം എസ്. കെ. കമ്മ്യൂണിക്കേഷന്‍റെ ബാനറിൽ കാസിം കണ്ടോത്ത് ആണ് നിർമിക്കുന്നത്

ഇന്ദ്രൻസ് (Indrans), ഷഹീൻ സിദ്ദിഖ് (Shaheen Siddique) എന്നിവർ കേന്ദ്ര കഥാപാത്രങ്ങളായി പുതിയ ചിത്രം വരുന്നു. നിസാർ സംവിധാനം ചെയ്യുന്ന ചിത്രത്തിന്‍റെ ടൈറ്റിൽ പോസ്റ്റർ പുറത്തുവന്നു. 'ടൂ മെൻ ആർമി' (Two Men Army) എന്ന് പേരിട്ടിരിക്കുന്ന ചിത്രം എസ്.കെ.കമ്മ്യൂണിക്കേഷന്‍റെ ബാനറിൽ കാസിം കണ്ടോത്ത് ആണ് നിർമിക്കുന്നത്.

ടൈറ്റില്‍ സൂചിപ്പിക്കുന്നത് പോലെ രണ്ട് കഥാപാത്രങ്ങളെ ചുറ്റിപ്പറ്റിയാണ് 'ടൂ മെൻ ആർമി'യുടെ കഥ വികസിക്കുന്നത്. പണം ചിലവാക്കാതെ കെട്ടിപ്പൂട്ടി വച്ച് ഒറ്റയ്‌ക്ക് ജീവിക്കുന്നയാളാണ് ഇവരില്‍ ഒരാൾ. മറ്റൊരാൾ ആകട്ടെ ഈ പണത്തില്‍ നോട്ടമിട്ട് എത്തുന്ന ആളുമാണ്. ഈ രണ്ട് കഥാപാത്രങ്ങളുടെ മാനസിക സംഘർഷങ്ങളാണ് ചിത്രം വരച്ചുകാട്ടുന്നത്. പ്രസാദ് ഭാസ്‌കരനാണ് ചിത്രത്തിന്‍റെ രചന നിർവഹിക്കുന്നത്.

ഇന്ദ്രൻസ്, ഷഹീൻ സിദ്ദിഖ് ഒന്നിക്കുന്ന 'ടൂ മെൻ ആർമി'

ദയാനന്ദ് ഛായാഗ്രഹണം നിർവഹിക്കുന്ന ചിത്രത്തിന്‍റെ എഡിറ്റിങ് കൈകാര്യം ചെയ്യുന്നത് ജയചന്ദ്രകൃഷ്‌ണൻ ആണ്. ആന്‍റണി പോളിന്‍റെ വരികൾക്ക് അജയ് ജോസഫ് ഈണം പകരുന്നു. വത്സൻ കല സംവിധാനവും നിർവഹിക്കുന്നു.

പ്രൊഡക്ഷൻ കൺട്രോളർ - ഷാജി പട്ടിക്കര, എക്‌സിക്യുട്ടീവ് പ്രൊഡ്യൂസർ - ഷിയാസ് മണോലിൽ, മേക്കപ്പ് - റഹിം കൊടുങ്ങല്ലൂർ, വസ്‌ത്രാലങ്കാരം - സുകേഷ് താനൂർ, അസോസിയേറ്റ് ഡയറക്‌ടർ - റസൽ നിയാസ്, സ്റ്റിൽസ് - അനിൽ പേരാമ്പ്ര, പി.ആർ.ഒ - എ. എസ്. ദിനേശ് എന്നിവരാണ് ചിത്രത്തിന്‍റെ മറ്റ് അണിയറ പ്രവർത്തകർ.

'ഗരുഡൻ' പുരോഗമിക്കുന്നു: 11 വർഷത്തെ നീണ്ട ഇടവേളയ്‌ക്ക് ശേഷം സുരേഷ് ഗോപിയും (Suresh Gopi) ബിജു മേനോനും (Biju Menon) ഒന്നിക്കുന്ന ഗരുഡൻ (Garudan) എന്ന ചിത്രത്തിന്‍റെ ഷൂട്ടിങ് പുരോഗമിക്കുന്നു. മിഥുന്‍ മാനുവല്‍ തോമസിന്‍റെ (Midhun Manuel Thomas) തിരക്കഥയില്‍ സുരേഷ് ഗോപി നായകനാവുന്ന ഈ ചിത്രം നവാഗതനായ അരുൺ വർമയാണ് സംവിധാനം ചെയ്യുന്നത്.

ഇതിനിടെ സിനിമയുടെ ലൊക്കേഷനില്‍ നിന്ന് പകർത്തിയ വീഡിയോ പുറത്തുവന്നിരുന്നു. ചിത്രത്തിൽ വേഷമിടുന്ന പ്രധാന താരങ്ങളെയെല്ലാം ഉൾപ്പെടുത്തിക്കൊണ്ടുള്ള റീൽസ് ആണ് അണിയറക്കാര്‍ ഇപ്പോൾ പുറത്തുവിട്ടിരിക്കുന്നത്. സിദ്ദിഖ്, ജഗദീഷ്, സംവിധായകൻ മേജർ രവി എന്നിവർക്കൊപ്പം ചിത്രത്തിന്‍റെ പ്രൊഡ്യൂസർ ലിസ്റ്റിൻ സ്റ്റീഫൻ, സംവിധായകൻ അരുൺ വർമ എന്നിവരും റീൽസിൽ ഉണ്ട്.

ഒരു ക്രൈം ത്രില്ലർ ആയി അണിയിച്ചൊരുക്കുന്ന ചിത്രത്തിന്‍റെ ഷൂട്ടിങ് കൊച്ചിയിലാണ് നിലവില്‍ പുരോഗമിക്കുന്നത്. വൻ വിജയമായിരുന്ന 'അഞ്ചാം പാതിര' (Anjaam Pathiraa) എന്ന ക്രൈം ത്രില്ലർ ചിത്രത്തിന് ശേഷം മിഥുൻ മാനുവൽ തോമസ് തിരക്കഥ എഴുതുന്ന ചിത്രമാണ് 'ഗരുഡൻ'. സുരേഷ് ഗോപിയും ബിജു മേനോനും മിഥുൻ മാനുവൽ തോമസും ലിസ്റ്റിൻ സ്റ്റീഫനും ആദ്യമായി ഒന്നിക്കുന്ന ചിത്രം കൂടിയാണ് 'ഗരുഡൻ'.