ഇത് 'ഷൈനിന്‍റെ കാവാലാ' ; അന്‍ഷയ്‌ക്കൊപ്പം തകർപ്പൻ നൃത്തച്ചുവടുകളുമായി നടന്‍

അൻഷ മോഹനൊപ്പം തകർപ്പൻ നൃത്തച്ചുവടുകളുമായി ആടിത്തിമിർക്കുകയാണ് ഷൈൻ

അടുത്തിടെയാണ് തമന്നയുടെ (Tamannaah Bhatia) തകർപ്പൻ നൃത്തച്ചുവടുകളുമായി ജയിലറിലെ 'കാവാലാ' (Kaavaalaa song) എന്ന ഗാനം പുറത്തിറങ്ങിയത്. റിലീസായതിന് തൊട്ടുപിന്നാലെ സോഷ്യൽ മീഡിയയിൽ ഉൾപ്പടെ കാവാലാ കൊടുങ്കാറ്റായി മാറി. ഇപ്പോൾ എവിടെയും 'കാവാലാ' തിമിര്‍പ്പാണ്. പുറത്തിറങ്ങി ദിവസങ്ങൾ പിന്നിട്ടിട്ടും സോഷ്യൽ മീഡിയ വാളുകളിൽ ഈ ​ഗാനം തരംഗം സൃഷ്‌ടിക്കുകയാണ്.

ചലച്ചിത്ര താരങ്ങൾ ഉൾപ്പടെ നിരവധി പേരാണ് തമന്നയെ പോലെ 'കാവാലാ'യ്‌ക്ക് ചുവടുകൾ വയ്‌ക്കാൻ ശ്രമിക്കുന്നത്. അത്തരത്തില്‍ ഒരു താരത്തിന്‍റെ കാവാലാ നൃത്തമാണ് ഇപ്പോൾ വൈറലാകുന്നത്. മലയാളികളുടെ പ്രിയ താരം ഷൈൻ ടോം ചാക്കോയാണ് (Shine Tom Chacko) ഈ വൈറൽ നൃത്തത്തില്‍. തമന്ന തകർത്താടിയ ​ഗാനത്തിലെ ഐക്കോണിക് സ്റ്റെപ്പിന് ചുവടുവയ്‌ക്കുകയാണ് നടൻ ഷൈൻ ടോം ചാക്കോ. അൻഷ മോഹന് (Ansha Mohan) ഒപ്പമാണ് ഷൈൻ നൃത്തം ചെയ്യുന്നത്.

ഏതായാലും അമൽ നീരദിന്‍റെ (Amal Neerad) 'ഭീഷ്‌മപർവം' (Bheeshmaparvam) സിനിമയിലൂടെ നല്ലൊരു ഡാൻസർ കൂടിയാണെന്ന് തെളിയിച്ച ഷൈൻ ഇത്തവണയും ആരാധകരെ നിരാശരാക്കുന്നില്ല. മനോഹരമായി തന്നെയാണ് ഷൈൻ 'കാവാലാ' അവതരിപ്പിച്ചിരിക്കുന്നത്. താരത്തിന്‍റെ ഹിപ്പ് മൂവ്മെന്‍റുൾപ്പടെ കൈയ്യടി നേടുന്നു. വീഡിയോ പുറത്തുവന്നതിന് പിന്നാലെ നിരവധി പേരാണ് അഭിനന്ദനങ്ങളുമായി കമന്‍റ് ബോക്‌സ് നിറയ്‌ക്കുന്നത്.

'രതിപുഷ്‌പം ഓർമ വന്നവരുണ്ടോ, രതിപുഷ്‌പത്തെ കടത്തിവെട്ടുമോ എന്നിങ്ങനെയാണ് ചിലരുടെ കമന്‍റുകൾ. ആ ഭീഷ്‌മ സ്റ്റെപ്പിനുമുന്നിൽ 'കാവാലാ' ഒക്കെ എന്ത് എന്ന് മറ്റുചിലർ. ഷൈൻ അണ്ണൻ തീ , ലെ ഷൈൻ: ഈ സീൻ ഒക്കെ നമ്മൾ പണ്ടേ വിട്ടതാ', എന്നിങ്ങനെയുമുണ്ട് കമന്‍റുകൾ.

അടുത്തിടെ ദിലീപ് ചിത്രം 'കൊച്ചി രാജാ'വിലെ 'തങ്ക കുട്ടാ..സിങ്ക കുട്ടാ..' എന്ന ​ഗാനത്തിന് ചുവടുകൾ വച്ച് ഷൈൻ ആരാധകരെ ഞെട്ടിച്ചിരുന്നു. മെറീന മൈക്കിള്‍, സ്വാസിക എന്നിവരോടൊപ്പമാണ് ഷൈന്‍ ഡാന്‍സ് കളിച്ചത്. വളരെ സ്റ്റൈലിഷ് ആയി ഡാൻസ് കളിക്കുന്ന ഷൈനിനെയാണ് വീഡിയോയിൽ കാണാന്‍ കഴിയുക.

അതേസമയം 'പമ്പരം' ആണ് ഷൈനിന്‍റേതായി അണിയറയില്‍ ഒരുങ്ങുന്ന ചിത്രം. അടുത്തിടെയാണ് ചിത്രത്തിന്‍റെ ഫസ്റ്റ് ലുക്ക് പോസ്റ്റർ അണിയറ പ്രവർത്തകർ പുറത്തുവിട്ടത്. ടൈം ലൂപ്പോ മിസ്റ്ററി ത്രില്ലറോ സൈക്കോ ത്രില്ലറോ ആണ് ചിത്രമെന്ന സൂചനയാണ് ഫസ്റ്റ് ലുക്ക് നല്‍കുന്നത്. കൂടാതെ ചാട്ടുളി, മഹാറാണി, നടികർ തിലകം, ഡാൻസ് പാർട്ടി തുടങ്ങി നിരവധി ചിത്രങ്ങളും ഷൈനിന്‍റേതായി അണിയറയില്‍ ഒരുങ്ങുന്നുണ്ട്.

ഷൈൻ ടോം ചാക്കോയ്‌ക്കൊപ്പം ജാഫർ ഇടുക്കി (Jaffer Idukki), കലാഭവൻ ഷാജോൺ (Kalabhavan Shajohn) എന്നിവരാണ് 'ചാട്ടുളി'യിൽ കേന്ദ്ര കഥാപാത്രങ്ങളായി എത്തുന്നത്. അതേസമയം ലാൽ ജൂനിയർ (Lal Jr) എന്ന ജീൻ പോൾ ലാൽ (Jean Paul Lal) സംവിധാനം ചെയ്യുന്ന 'നടികര്‍ തിലക'ത്തില്‍ (Nadikar Thilakam) ടൊവിനോ തോമസിനൊപ്പം മുഖ്യ വേഷത്തിലാകും ഷൈൻ എത്തുക.