റഹ്മാനെ (Rahman) നായകനാക്കി പുതുമുഖ സംവിധായകന്‍ ചാള്‍സ് ജോസഫ് രചനയും സംവിധാനവും നിര്‍വഹിച്ച ചിത്രമാണ് 'സമാറ'. സയന്‍സ് ഫിക്ഷന്‍ വിഭാഗത്തിലുള്ള ക്രൈം ത്രില്ലറായ ചിത്രത്തിന്‍റെ ട്രെയിലർ (Samara Official Trailer) പുറത്തിറങ്ങി. കാണികളിൽ ഉദ്വേഗം നിറയ്ക്കുന്ന, ത്രസിപ്പിക്കുന്ന രംഗങ്ങൾ കോർത്തിണക്കിയ ട്രെയിലർ ശ്രദ്ധ നേടുകയാണ്.
- " class="align-text-top noRightClick twitterSection" data="">
പീകോക്ക് ആര്‍ട്ട് ഹൗസിന്‍റെ ബാനറില്‍ എം കെ സുഭാകരന്‍, അനുജ് വർഗീസ് വില്ല്യാടത്ത് എന്നിവര്‍ ചേര്‍ന്നാണ് ഈ ചിത്രം നിര്‍മിച്ചിരിക്കുന്നത്. ഓഗസ്റ്റ് നാലിന് ആണ് ചിത്രത്തിന്‍റെ റിലീസ്. മാജിക് ഫ്രെയിംസ് ആണ് 'സമാറ' തിയേറ്ററുകളില്‍ എത്തിക്കുന്നത്.
റഹ്മാന് പുറമെ തമിഴ് നടന്‍ ഭരത്, ബിനോജ് വില്ല്യ, 'മൂത്തോന്‍' എന്ന ചിത്രത്തിലൂടെ ശ്രദ്ധേ നേടിയ സഞ്ജന ദിപു എന്നിവരാണ് ചിത്രത്തിൽ പ്രധാന വേഷങ്ങളില്‍ എത്തുന്നത്. ഹിന്ദിയില്‍ ബജ്‌രംഗി ഭായ്‌ജാന്‍, ജോളി എല്‍എല്‍ബി 2, തമിഴില്‍ വിശ്വരൂപം 2 എന്നീ ചിത്രങ്ങളിലൂടെ പ്രശസ്‌തനായ ബോളിവുഡ് താരം മീര്‍സര്‍വാറും ചിത്രത്തില്‍ പ്രധാന വേഷത്തിലുണ്ട്. കൂടാതെ രാഹുല്‍ മാധവ്, ഗോവിന്ദ് കൃഷ്‌ണ, ടിനിജ്, ടോം സ്‌കോട്ട് തുടങ്ങിയവര്‍ക്കൊപ്പം 18 ഓളം പുതുമുഖ താരങ്ങളും 35 ഓളം വിദേശ താരങ്ങളും ചിത്രത്തില്‍ അണിനിരക്കുന്നു.
കുളു- മണാലി, ധര്‍മ്മശാല, ജമ്മു കശ്‌മീര്‍ എന്നിവിടങ്ങളിലായാണ് ചിത്രത്തിന്‍റെ ഭൂരിഭാഗം ചിത്രീകരണവും നടന്നത്. ഏറെ കാലത്തിന് ശേഷമാണ് കശ്‌മീരിന്‍റെ പശ്ചാത്തലത്തില്‍ ഒരു ചിത്രം ഒരുങ്ങുന്നത്. ദീപക് വാരിയർ ആണ് ചിത്രത്തിന്‍റെ സംഗീത സംവിധാനം നിർവഹിച്ചിരിക്കുന്നത്. പശ്ചാത്തല സംഗീതം ഒരുക്കിയിരിക്കുന്നത് ഗോപി സുന്ദർ ആണ്.
അകാലത്തില്‍ വിടപറഞ്ഞ പ്രശസ്‌ത ഗായകൻ കെകെ (KK)യുടെ ശബ്‌ദത്തില്‍ 'സമാറ' (Samara) യിലെ പുതിയ ഗാനം അണിയറ പ്രവർത്തകർ കഴിഞ്ഞ ദിവസം പുറത്തുവിട്ടിരുന്നു. ദീപക് വാര്യർ (Deepak Warrier) ഈണമിട്ട 'ദിൽബറോ' (Dilbaro) എന്ന ഗാനമാണ് പുറത്തിറങ്ങിയത്. ലക്ഷ്‌മി മോഹന് (Lakshmi Mohan) ഒപ്പമാണ് അന്തരിച്ച ഗായകൻ കെകെ ഈ ഗാനം ആലപിച്ചിരിക്കുന്നത്. 'സമാറ'യെന്ന ഈ ചിത്രത്തിന് വേണ്ടിയായിരുന്നു കെ കെ അവസാനമായി പാടിയതും.
READ MORE: കെകെയുടെ ശബ്‌ദം വീണ്ടും; റഹ്മാൻ ചിത്രം 'സമാറ'യിലെ പുതിയ ഗാനം പുറത്ത്
സിനു സിദ്ധാർഥ് ഛായാഗ്രഹണം നിർവഹിച്ചിരിക്കുന്ന ചിത്രത്തിന്‍റെ എഡിറ്റിങ് കൈകാര്യം ചെയ്‌തിരിക്കുന്നത് ആർ ജെ പപ്പൻ ആണ്. സൗണ്ട് ഡിസൈൻ - അരവിന്ദ് ബാബു, കോസ്റ്റ്യൂം - മരിയ സിനു, കലാസംവിധാനം - രഞ്ജിത്ത് കോത്തേരി, ചീഫ് അസോസിയേറ്റ് ഡയറക്‌ടർ - വിഷ്‌ണു ഐക്കരശ്ശേരി, സംഘട്ടനം - ദിനേശ് കാശി, പ്രൊഡക്ഷൻ കൺട്രോളർ - പ്രേമൻ പെരുമ്പാവൂർ, ഡിസൈനർ - മാമിജോ, സ്റ്റിൽസ് - സിബി ചീരൻ എന്നിവരാണ് ചിത്രത്തിലെ മറ്റ് അണിയറ പ്രവർത്തകർ.
ALSO READ: Samara Movie| റഹ്മാൻ നായകനായി 'സമാറ'; കയ്യടി നേടി ഫസ്റ്റ് ലുക്ക് പോസ്റ്റർ
