'കൈ വയ്‌ക്കാത്ത മേഖലകള്‍ ഇല്ല, പൃഥ്വി കേരളത്തിന്‍റെ കമല്‍ഹാസന്‍'; പുകഴ്‌ത്തലുമായി ബോളിവുഡ്‌ താരം

Vivek Oberoi in Kaduva promotions: സിനിമയെ സ്‌നേഹിക്കുന്ന ഒരാളാണ് പൃഥ്വിരാജ്‌ എന്നാണ് വിവേക്‌ ഒബ്‌റോയ്‌ പറയുന്നത്‌. 'കടുവ'യുടെ പ്രൊമോഷനുമായി ബന്ധപ്പെട്ട് കൊച്ചിയില്‍ മാധ്യമങ്ങളോട്‌ സംസാരിക്കുകയായിരുന്നു നടന്‍

Vivek Oberoi praises Prithviraj: പൃഥ്വിരാജിനെ കേരളത്തിന്‍റെ കമല്‍ഹാസനായി ഉപമിച്ച് ബോളിവുഡ്‌ താരം വിവേക്‌ ഒബ്‌റോയ്‌. പൃഥ്വിയുടെ ഏറ്റവും പുതിയ ചിത്രമായ 'കടുവ'യുടെ പ്രചാരണാര്‍ഥമാണ് താരത്തെ കുറിച്ചുള്ള വിവേക്‌ ഒബ്‌റോയുടെ പുകഴ്‌ത്തല്‍. സിനിമയെ സ്‌നേഹിക്കുന്ന ഒരാളാണ് പൃഥ്വിരാജ്‌ എന്നാണ് താരം പറയുന്നത്‌.

Vivek Oberoi in Kaduva promotions: 'പൃഥ്വിരാജ്‌ കൈ വയ്‌ക്കാത്ത മേഖലകളില്ല. അഭിനയിക്കും, പാട്ട് പാടും, ഡാന്‍സ്‌ കളിക്കും, സിനിമ നിര്‍മിച്ചിട്ടുണ്ട്‌, സംവിധാനം ചെയ്‌തിട്ടുണ്ട്‌. ഇത്തരത്തില്‍ സിനിമയെ ഒരുപാട്‌ സ്‌നേഹിക്കുന്ന ഒരാളാണ് പൃഥ്വിരാജ്‌, സിനിമയ്‌ക്ക് വേണ്ടി ജീവിക്കുന്ന ആളാണ് അദ്ദേഹം. എന്നെ ഒരുപാട്‌ രീതിയില്‍ പൃഥ്വിരാജ്‌ സ്വാധീനിച്ചിട്ടുണ്ട്‌', കടുവ'യുടെ പ്രൊമോഷനുമായി ബന്ധപ്പെട്ട് കൊച്ചിയില്‍ മാധ്യമങ്ങളോട്‌ സംസാരിക്കുകയായിരുന്നു വിവേക്‌.

Vivek Oberoi malayalam movies: 'കടുവ'യില്‍ വിവേകും സുപ്രധാന വേഷത്തിലെത്തുന്നുണ്ട്‌. പൃഥ്വിരാജിന്‍റെ ആദ്യ സംവിധാന സംരംഭമായ 'ലൂസിഫറി'ന് ശേഷം വിവേക്‌ ഒബ്‌റോയ്‌ പ്രതിനായക വേഷത്തിലെത്തുന്ന ചിത്രം കൂടിയാണിത്. സിനിമയില്‍ സംയുക്ത മേനോന്‍ ആണ് നായിക.

Kaduva stars: വിജയരാഘവന്‍, സിദ്ദിഖ്, അജു വര്‍ഗീസ്‌, അര്‍ജുന്‍ അശോകന്‍, സീമ, സുദേവ്‌ നായര്‍, കലാഭവന്‍ ഷാജോണ്‍, ദിലീഷ്‌ പോത്തന്‍, സായികുമാര്‍, ജനാര്‍ദ്ദനന്‍, രാഹുല്‍ മാധവ്‌, മീനാക്ഷി, പ്രിയങ്ക നായര്‍, റീനു മാത്യൂസ് തുടങ്ങിയവരും ചിത്രത്തിലുണ്ട്.

Prithviraj with Jinu Abraham: ജിനു വി എബ്രഹാമിന്‍റെതാണ് തിരക്കഥ. 'ആദം ജോണ്‍', 'ലണ്ടന്‍ ബ്രിഡ്‌ജ്‌', 'മാസ്‌റ്റേഴ്‌സ്‌' എന്നീ സിനിമകള്‍ക്ക് ശേഷം ജിനുവും പൃഥിരാജും വീണ്ടും ഒന്നിക്കുന്ന സിനിമയാണ് 'കടുവ'. ലിസ്‌റ്റിന്‍ സ്‌റ്റീഫനും, പൃഥ്വിരാജ്‌ പ്രൊഡക്ഷന്‍സും ചേര്‍ന്നാണ് നിര്‍മാണം. അഭിനന്ദന്‍ രാമാനുജം ഛായാഗ്രഹണവും ഷമീര്‍ മുഹമ്മദ്‌ എഡിറ്റിങും നിര്‍വഹിച്ചിരിക്കുന്നു. ജേക്‌സ്‌ ബിജോയ്‌ ആണ് സംഗീതം. മോഹന്‍ദാസ്‌ കലാസംവിധാനം ചെയ്‌തിരിക്കുന്നു.

Kaduva Release: ജൂലൈ ഏഴിനാണ് ചിത്രം റിലീസിനെത്തുക. നേരത്തെ ജൂണ്‍ 30ന്‌ റിലീസ് ചെയ്യാനായിരുന്നു തീരുമാനിച്ചിരുന്നത്‌. ചില അപ്രതീക്ഷിത കാരണങ്ങള്‍ കൊണ്ടാണ് സിനിമയുടെ റിലീസ്‌ ഡേറ്റ് നീട്ടുന്നതെന്നും 'കടുവ' ഇനി ജൂലൈ ഏഴിന് റിലീസ്‌ ചെയ്യുമെന്നും പൃഥ്വിരാജ്‌ തന്‍റെ സോഷ്യല്‍ മീഡിയ പേജുകളിലൂടെ അറിയിച്ചിരുന്നു.

Shaji Kailas career break: നീണ്ട ഇടവേളയ്‌ക്ക് ശേഷം ഷാജി കൈലാസ്‌ സംവിധാനം ചെയ്‌ത ചിത്രം കൂടിയാണിത്‌. 'കടുവ'യിലൂടെ ആറ്‌ വര്‍ഷത്തിന് ശേഷമാണ് ഷാജി കൈലാസ്‌ മലയാളത്തില്‍ മടങ്ങിയെത്തുന്നത്‌. 2012ല്‍ പൃഥ്വിരാജിനെ നായകനാക്കി 'സിംഹാസനം' എന്ന ചിത്രം സംവിധായകന്‍ ഒരുക്കിയിരുന്നു. 'ജിഞ്ചര്‍' (2013) ആണ് മലയാളത്തില്‍ ഏറ്റവും ഒടുവിലായി ഷാജി കൈലാസിന്‍റെതായി പുറത്തിറങ്ങിയത്.